ഇന്ത്യയിലുടനീളം കാണപ്പെടുന്ന നിത്യഹരിത ഒരു കുറ്റിച്ചെടിയാണ് ആടലോടകം .ചെറിയ ആടലോടകം , വലിയ ആടലോടകം എന്നിങ്ങനെ രണ്ടുതരത്തിൽ ഈ സസ്യം കാണപ്പെടുന്നു . ചെറിയ ആടലോടകത്തിനെ ചിറ്റാടലോടകം എന്ന പേരിൽ അറിയപ്പെടുന്നു .
ആടലോടകം വിവിധ ഭാഷയിലുള്ള പേരുകൾ :
Botanical name : Justicia adhatoda . Family : Acanthaceae (Acanthus family) . Common name : Malabar Nut, white vasa, yellow vasa . Sanskrit: Atarusa, Simhasya, Vajin, Vaaska, Vasuka . Hindi: Arus, Arusa, Pramadya, Rus,Vajini, Visauta . Malayalam: Adalodakam . Tamil:Acalai, Atatotai, Attucam, Cinkam, Cuvatu, Pavattai, Vacai, Vacati . Telugu: Addasaramu . Kannada: Aadusoge, Karchi, Addasara, Atarusha .Marathi: Adulasa . Gujarati: Aradusi, Araduso . Bengali: Basak .
ആടലോടകം എവിടെ വളരുന്നു :
ഇന്ത്യയിലുടനീളം ആടലോടകം കാണപ്പെടുന്നു .എന്നാൽ ചെറിയ ആടലോടകം കേരളത്തിൽ മാത്രമേ കാണപ്പെടുന്നൊള്ളു . ചെറിയ ആടലോടകത്തിനാണ് ഔഷധഗുണങ്ങൾ കൂടുതലുള്ളത് .ഭാരതത്തിലെ ഔഷധ പാരമ്പര്യത്തിന്റെ മുഖ്യ കണ്ണികളിലൊന്നായ ഈ സസ്യം വേപ്പിന്റെ തൊട്ടടുത്ത സ്ഥാനമാണുള്ളത് .
പണ്ട് കാലത്ത് ഒട്ടുമിക്ക വീടുകളിലും ആടലോടകം ഒരു വേലിച്ചെടിയായി നട്ടുവളർത്തിയിരുന്നു . എന്നാൽ ഇന്ന് വളരെ അപൂർവമായേ ആടലോടകം കാണപ്പെടുന്നൊള്ളു . ഏതുതരം കാലാവസ്ഥയിലും വളരുന്ന ഒരു സസ്യമാണ് ആടലോടകം . കമ്പ് നട്ടും വിത്ത് പാകിയും ആടലോടകം കിളിർപ്പിക്കാവുന്നതാണ് .
ആടലോടകം ചെടിയുടെ പ്രത്യേകതകൾ :
ഏകദേശം 2 മീറ്റർ ഉയരത്തിൽ വളരുന്ന നിറയെ ഇലകളുള്ള ഒരു നിത്യഹരിത കുറ്റിച്ചെടിയാണ് ആടലോടകം . ഇതിന്റെ തളിരിലയിൽ ധാരാളം രോമങ്ങൾ കാണപ്പെടുന്നു .ഏപ്രിൽ ജൂലായ് മാസങ്ങളിലാണ് പൂക്കാലം .ആടലോടകത്തിന്റെ പൂവിന്റെ ദളപുടങ്ങൾക്ക് വെള്ള നിറമാണ് . പൂക്കൾ ചെറുതും നീളമുള്ളവയുമാണ് . മഴക്കാലം കഴിഞ്ഞാൽ കായകൾ വിളയും .കായ്ക്കുള്ളിൽ 2 മുതൽ 4 വിത്തുകൾ വരെ കാണും .ചെറിയ ആടലോടകം , വലിയ ആടലോടകം എന്നിങ്ങനെ രണ്ടുതരത്തിൽ ഈ സസ്യം കാണപ്പെടുന്നു . ചെറിയ ആടലോടകത്തിനെ ചിറ്റാടലോടകം എന്ന പേരിൽ അറിയപ്പെടുന്നു . ഇതിന്റെ ഇലകൾ ചെറുതായിരിക്കും .
ആടലോടകത്തിന്റെ ഔഷധഗുണങ്ങൾ :
വളരെയധികം ഔഷധഗുണമുള്ളൊരു സസ്യമാണ് ആടലോടകം .ഒട്ടുമിക്ക ആയുർവേദഗ്രന്ഥങ്ങളിലും ഈ സസ്യത്തിന്റെ ഔഷധഗുണങ്ങളെപ്പറ്റി പ്രതിപാദിക്കുന്നു .കഫം ഇല്ലാതാക്കാനുള്ള ഒരു മരുന്ന് ഈ സസ്യത്തിൽ നിന്നും ഉല്പാദിപ്പിക്കുന്നു . ശ്വാസകോശത്തിന്റെ സങ്കോചവികാസങ്ങളെ വർദ്ധിപ്പിക്കാനും രക്തത്തിലെ പ്ലേറ്റലറ്റുകളുടെ എണ്ണം വർദ്ധിപ്പിക്കാനും ആടലോടകത്തിന് കഴിവുണ്ട് . കുമിളുകൾ ,ബാക്ടീരിയകൾ , കീടങ്ങൾ എന്നിവയെ നശിപ്പിക്കാനുള്ള കഴിവ് ആടലോടകത്തിനുണ്ട് . അതുകൊണ്ട് ആടലോടകത്തിന്റെ ഇലയിട്ട് തിളപ്പിച്ച വെള്ളം ഒരു കീടനാശിനിയായി ഉപയോഗിക്കാം .ഒട്ടുമിക്ക കർഷകരുടെയും ഒരു ഉത്തമ സുഹൃത്താണ് ആടലോടകം . ആടലോടകത്തിന്റെ ഇല ,വേര് ,പൂവ് ,കായ് എന്നിവ ഔഷധങ്ങൾക്കായി ഉപയോഗിക്കുന്നു .
രാസഘടകങ്ങൾ :
ആടലോടകത്തിന്റെ ഇലയിൽ ബാഷ്പശീലമുള്ള ഒരു സുഗന്ധ തൈലം അടങ്ങിയിരിക്കുന്നു . വാസിസൈൻ എന്ന ആൽക്കലോയിഡ് ആടലോടകത്തിന്റെ വേരിൻമേൽ തൊലിയിൽ ധാരാളം അടങ്ങിയിരിക്കുന്നു .
രോഗപ്രതിവിധികൾ :
ചുമ ,കഫം ,ജലദോഷം ,ആസ്മ ,ചർദ്ദി, അമിത ആർത്തവം ,രക്താതിസാരം ,രക്തപിത്തം , തുടങ്ങിയ രോഗങ്ങൾക്ക് ഒരു ഉത്തമ പ്രതിവിധിയാണ് ആടലോടകം .
രസാദിഗുണങ്ങൾ :
രസം : തിക്തം, കഷായം . ഗുണം : ലഘു, രൂക്ഷം . വീര്യം : ശീതം . വിപാകം : കടു
ആടലോടകത്തിന്റെ ചില ഔഷധപ്രയോഗങ്ങൾ :
അമിത ആർത്തവം :
ആടലോടകത്തിന്റെ ഇലയുടെ നീര് ശർക്കരയിൽ ചേർത്ത് ദിവസം രണ്ടുനേരം വീതം കഴിച്ചാൽ അമിത ആർത്തവത്തിന് ശമനമുണ്ടാകും . 15 മില്ലി ഇലയുടെ നീര് 15 ഗ്രാം ശർക്കരയിൽ ചേർത്താണ് കഴിക്കേണ്ടത് .
കഫക്കെട്ടിന് :
ആടലോടകത്തിന്റെ ഇലയുടെ നീരും , തേനും ചേർത്ത് രാവിലെ വെറുംവയറ്റിൽ കഴിച്ചാൽ കഫക്കെട്ട് മാറും . ഈ സമയത്ത് എണ്ണ ചേർത്ത ഭക്ഷണം പരമാവധി ഒഴിവാക്കണം .
രക്തപിത്തം :
ആടലോടകത്തിന്റെ ഇലയുടെ നീര് 10 മില്ലി വീതം ദിവസം 2 നേരം വീതം കഴിച്ചാൽ രക്തപിത്തം ശമിക്കും .ആടലോടകത്തിന്റെ ഇലയുടെ നീരും ചന്ദനം അരച്ചതും ചേർത്ത് 15 മില്ലി വീതം ദിവസം 2 നേരം കഴിച്ചാലും രക്തപിത്തം ശമിക്കും .
രക്താതിസാരം :
ആടലോടകം സമൂലം കഷായം വച്ച് ദിവസം 2 നേരം വീതം കഴിച്ചാൽ രക്താതിസാരം മാറും .
ചുമ മാറാൻ :
ആടലോടകത്തിന്റെ ഇല ജീരകവും കൂട്ടി വറുത്ത് വെള്ളം തിളപ്പിച്ച് കുടിച്ചാൽ ചുമ മാറും .
ആടലോടകത്തിന്റെ ഇല വാട്ടി പിഴിഞ്ഞ നീര് ഒരു സ്പൂൺ തേനിൽ ചേർത്ത് ദിവസം 3 നേരം കഴിച്ചാലും ചുമ ശമിക്കും .
ചെവിവേദന മാറാൻ :
ആടലോടകത്തിന്റെ ഇല എണ്ണ കാച്ചി ചെവിയിൽ ഒഴിച്ചാൽ ചെവിവേദന മാറും .
വില്ലൻ ചുമയ്ക്ക് :
ആടലോടകത്തിന്റെ ഇല അരിഞ്ഞ് അരിയിൽ ചേർത്ത് വറുത്ത് ശർക്കരയും ചേർത്ത് പൊടിച്ച് കഴിച്ചാൽ വില്ലൻ ചുമ മാറും . 2 സ്പൂൺ വീതം ദിവസം മൂന്നുനേരം കഴിക്കണം .
ഒച്ചയടപ്പ് മാറാൻ :
ആടലോടകത്തിന്റെ ഇലയുടെ നീരും കുരുമുളകുപൊടിയും ചേർത്ത് കഴിച്ചാൽ ഒച്ചയടപ്പ് മാറിക്കിട്ടും .
രക്തം ചുമച്ചു തുപ്പുന്നതിന് :
ചെറിയ ആടലോടകത്തിന്റെ ഇലയുടെ നീരിൽ സമം തേനും ചേർത്ത് ഒരാഴ്ച പതിവായി കഴിച്ചാൽ രക്തം ചുമച്ചു തുപ്പുന്ന അവസ്ഥ മാറിക്കിട്ടും .
ബ്രോങ്കൈറ്റിസ് ;
ചെറിയ ആടലോടകത്തിന്റെ ഇല നിഴലിൽ ഉണക്കി കഷായം വച്ച് പഞ്ചസാരയും ചേർത്ത് കുറുക്കി സിറപ്പ് രൂപത്തിലാക്കി കുറച്ചു ദിവസം പതിവായി കഴിച്ചാൽ ബ്രോങ്കൈറ്റിസ് , ചുമ ,നെഞ്ചിലെ കഫക്കെട്ട് തുടങ്ങിയവ മാറിക്കിട്ടും .