ഇഞ്ചിപ്പുല്ല്: ഔഷധഗുണങ്ങളും ഉപയോഗങ്ങളും അറിയാം

 വീട്ടുവളപ്പിൽ നല്ല മണത്തോടെ വളരുന്ന ഒരു പുല്ലിനെക്കുറിച്ച് പറയുമ്പോൾ ആദ്യം ഓർമ്മ വരുന്നത് ഇഞ്ചിപ്പുല്ല് തന്നെയായിരിക്കും. വാസനപ്പുല്ല്, ലെമൺ ഗ്രാസ് എന്നിങ്ങനെ പല പേരുകളിലും അറിയപ്പെടുന്ന ഈ ചെടി ചായയ്ക്കും കഷായത്തിനുമൊക്കെ ഉപയോഗിക്കുന്നവരാണ് നമ്മളിൽ പലരും. പക്ഷേ, നല്ല മണം മാത്രമല്ല ഇഞ്ചിപ്പുല്ലിന്റെ പ്രത്യേകത. പരമ്പരാഗതമായി പല ആരോഗ്യപ്രശ്നങ്ങൾക്കും ഇതിന്റെ ഇലയും മറ്റുഭാഗങ്ങളും ഉപയോഗിച്ചുവരുന്നുണ്ട്.

Cymbopogon citratus എന്നാണ് ഇഞ്ചിപ്പുല്ലിന്റെ ശാസ്ത്രീയ നാമം. ഇഞ്ചിയോട് സാമ്യമുള്ള ഒരു പ്രത്യേക സുഗന്ധം നൽകുന്നതിനാലാണ് പല സ്ഥലങ്ങളിലും ഇതിനെ ഇഞ്ചിപ്പുല്ല് എന്ന് വിളിക്കുന്നത്. ദഹനക്കുറവ്, വയറിലെ അസ്വസ്ഥത, ജലദോഷവുമായി ബന്ധപ്പെട്ട ചില ബുദ്ധിമുട്ടുകൾ തുടങ്ങിയവയിൽ ഇഞ്ചിപ്പുല്ല് പരമ്പരാഗതമായി എങ്ങനെ ഉപയോഗിച്ചുവരുന്നു എന്നത് അറിയാൻ പലർക്കും താൽപര്യമുണ്ടാകും.

ഇഞ്ചിപ്പുല്ലിന്റെ ഔഷധഗുണങ്ങൾ എന്തൊക്കെയാണ്, എങ്ങനെയാണ് പരമ്പരാഗതമായി ഉപയോഗിച്ചിരുന്നത്, ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ എന്തൊക്കെയാണ് എന്നതെല്ലാം ഇനി നോക്കാം.

ഇഞ്ചിപ്പുല്ലിന്റെ ശാസ്ത്രനാമം: അറിയേണ്ട ചില കാര്യങ്ങൾ

വാസനപ്പുല്ലിന്റെയോ ഇഞ്ചിപ്പുല്ലിന്റെയോ ശാസ്ത്രനാമം തിരയുമ്പോൾ പലരും ആശയക്കുഴപ്പത്തിലാകാറുണ്ട്. ചിലയിടങ്ങളിൽ Cymbopogon citratus എന്നും, മറ്റു ചിലയിടങ്ങളിൽ Cymbopogon flexuosus എന്നും കാണാം. പഴയ രേഖകളിലോ ആയുർവേദ പുസ്തകങ്ങളിലോ ആണെങ്കിൽ Andropogon citratus, Andropogon cerifer എന്നൊക്കെയും കണ്ടേക്കാം.

യഥാർത്ഥത്തിൽ സസ്യശാസ്ത്രത്തിൽ Andropogon എന്ന് തുടങ്ങുന്ന പേരുകൾ നൂറ്റാണ്ടുകൾക്ക് മുൻപ് ഉപയോഗിച്ചിരുന്ന പഴയ പേരുകളാണ് (Synonyms). ഇന്നത്തെ ശാസ്ത്രലോകം അംഗീകരിച്ചിട്ടുള്ള ശരിയായ പേര് Cymbopogon തന്നെയാണ്.

നമ്മൾ കാണുന്ന ഇഞ്ചിപ്പുല്ലിൽ പ്രധാനമായും രണ്ട് വകഭേദങ്ങളാണ് ഉള്ളത്:

Cymbopogon citratus (വാസനപ്പുല്ല്): വീടുകളിൽ ഔഷധ ആവശ്യങ്ങൾക്കും രുചിക്കും സുഗന്ധത്തിനുമായി ആളുകൾ ഉപയോഗിക്കുന്ന ഇനമാണിത്. ഗ്രീൻ ടീ, സൂപ്പുകൾ, വിദേശ വിഭവങ്ങൾ എന്നിവയിലെല്ലാം ചേർക്കുന്ന 'ലെമൺഗ്രാസ്' ഈ വിഭാഗത്തിൽപ്പെടുന്നു.

Cymbopogon flexuosus (മലബാർ ഇഞ്ചിപ്പുല്ല്): കേരളത്തിൽ വാണിജ്യാടിസ്ഥാനത്തിൽ പുൽത്തൈലം (Cochin Lemongrass Oil) വാറ്റിയെടുക്കാൻ കൃഷി ചെയ്യുന്ന നാടൻ ഇഞ്ചിപ്പുല്ല് ഇതാണ്. ഇതിന് രൂക്ഷമായ മണവും എണ്ണയുടെ സാന്നിധ്യവും കൂടുതലായിരിക്കും.

ആയുർവേദ ഗ്രന്ഥങ്ങളിൽ ഇഞ്ചിപ്പുല്ലിനെക്കുറിച്ച്

ഇഞ്ചിപ്പുല്ലിന്റെ ഔഷധപ്രയോഗങ്ങളെക്കുറിച്ച് പറയുമ്പോൾ ആയുർവേദത്തിലെ ചില നിഘണ്ടു ഗ്രന്ഥങ്ങളിൽ കാണുന്ന പരാമർശങ്ങളും ശ്രദ്ധേയമാണ്. ഭൂതൃണം, ഭൂസ്തൃണം എന്നീ പേരുകളിൽ ഒരു ദ്രവ്യത്തെക്കുറിച്ച് ഭാവപ്രകാശ നിഘണ്ടു, കയ്യദേവ നിഘണ്ടു, രാജനിഘണ്ടു, ധന്വന്തരി നിഘണ്ടു തുടങ്ങിയ ഗ്രന്ഥങ്ങളിൽ ഗുണങ്ങളും പരമ്പരാഗത പ്രയോഗങ്ങളും വിവരിക്കുന്നുണ്ട്.

1. ഭാവപ്രകാശ നിഘണ്ടു (ഗൂഡൂച്യാദിവർഗ്ഗം)

ഭൂതൃണം കടുകം തിക്തം തീക്ഷ്ണോഷ്ണം രേചനം ലഘു ।

വിദാഹി ദീപനം രൂക്ഷമനേത്ര്യം മുഖശോധനമ് ॥

അവൃഷ്യം ബഹുവിട്കഞ്ച പിത്തരക്തപ്രദൂഷണമ് ॥ ൧൪൮ ॥

ഭാവപ്രകാശ നിഘണ്ടുവിലെ ഗൂഡൂച്യാദിവർഗ്ഗത്തിൽ ആചാര്യനായ ഭാവമിശ്രൻ ഭൂതൃണത്തിന്റെ (ഇഞ്ചിപ്പുല്ല്) ഗുണവീര്യവിപാകങ്ങളെയും കർമ്മങ്ങളെയും കൃത്യമായി പദങ്ങളിലൂടെ നിർവ്വചിക്കുന്നത്  ഇപ്രകാരം വായിച്ചെടുക്കാം:

ഭൂതൃണം: ഭൂമിയിൽ പടർന്നു പന്തലിച്ചു വളരുന്ന, സുഗന്ധവാഹിയായ ഇഞ്ചിപ്പുല്ലിനെയാണ് ഇവിടെ ഭൂതൃണം എന്ന നാമത്താൽ വ്യവഹരിക്കുന്നത്.

കടുകം തിക്തം : ഇതിന്റെ രസങ്ങൾ കടുവും (എരിവ്) തിക്തവുമാണ് (കയ്പ്). നാവിൽ തൊടുമ്പോൾ ആദ്യം എരിവും ഒപ്പം നേരിയ കയ്പും അനുഭവപ്പെടുന്നത് കഫ-മേദോ ദോഷങ്ങളെ ശമിപ്പിക്കാൻ ഈ ഔഷധത്തിനുള്ള സ്വാഭാവിക ശേഷിയെ വ്യക്തമാക്കുന്നു.

തീക്ഷ്ണോഷ്ണം: തീക്ഷ്ണം, ഉഷ്ണം എന്നീ രണ്ട് ഗുണങ്ങളുടെ സംയോജനമാണിത്. ശരീരത്തിലെ അതിസൂക്ഷ്മമായ സ്രോതസ്സുകളിലേക്ക് (ശരീര നാളികളിലേക്ക്) ആഴ്ന്നിറങ്ങി ചെന്ന് അടിഞ്ഞുകൂടിക്കിടക്കുന്ന കഫത്തെയും ആമത്തെയും (ദഹിക്കാത്ത വിഷാംശത്തെ) അലിയിച്ചു കളയാനുള്ള കർമ്മശേഷിയാണ് 'തീക്ഷ്ണം'. ശരീരത്തിൽ താപമുണ്ടാക്കി തണുപ്പിനെയും വാത-കഫങ്ങളെയും ശമിപ്പിക്കുന്ന വീര്യത്തെയാണ് 'ഉഷ്ണം' സൂചിപ്പിക്കുന്നത്.

രേചനം : ദഹിക്കാതെ കിടക്കുന്നതോ അടിഞ്ഞുകൂടിയതോ ആയ മലത്തെയും വാതത്തെയും താഴേക്ക് തള്ളി പുറന്തള്ളാൻ പ്രേരിപ്പിക്കുന്ന സ്വാഭാവമാണ് രേചനം. കുടലിലെ തടസ്സങ്ങളെ നീക്കി മലശോധന സുഗമമാക്കാൻ ഇത് സഹായിക്കുന്നു.

ലഘു : ശരീരത്തിന് ഭാരമുണ്ടാക്കാതെ വളരെ വേഗത്തിൽ ദഹിക്കുന്നതും, ദഹനശേഷി കുറഞ്ഞവർക്ക് പോലും യാതൊരു തടസ്സവുമില്ലാതെ ഉൾക്കൊള്ളാൻ കഴിയുന്നതുമായ ഗുണമാണ് ലഘു.

വിദാഹി : ആമാശയത്തിൽ വെച്ച് ദഹനപ്രക്രിയ നടക്കുമ്പോൾ നേരിയ തോതിൽ എരിച്ചിലോ അസിഡിറ്റിയോ ഉണ്ടാക്കുന്ന സ്വഭാവമാണിത്. ഉഷ്ണവീര്യവും കടുരസവും ഉള്ളതുകൊണ്ട് അമിതമായി ഉള്ളിൽ ചെന്നാൽ ഇത് വയറ്റിൽ ദാഹവും പുകച്ചിലും സൃഷ്ടിക്കാം.

ദീപനം : മന്ദീഭവിച്ചു കിടക്കുന്ന ജഠരാഗ്നിയെ (ദഹനശേഷിയെ) ആളിക്കത്തിക്കുന്ന ഗുണമാണിത്. ആഹാരത്തോട് താല്പര്യമുണ്ടാക്കാനും കഴിച്ച ഭക്ഷണത്തെ ശരിയായി പരിപാകം ചെയ്യാനും ഇത് അഗ്നിയെ ഉത്തേജിപ്പിക്കുന്നു.

രൂക്ഷം : ശരീരത്തിലെ അമിതമായ വഴുവഴുപ്പിനെയും കൊഴുപ്പിനെയും ഈർപ്പത്തെയും വറ്റിച്ചുണക്കുന്ന സ്വഭാവമാണ് രൂക്ഷഗുണം. കഫത്തെ ഇല്ലായ്മ ചെയ്യാൻ ഇത് ഉത്തമമാണെങ്കിലും ശരീരത്തിന് വരൾച്ചയുണ്ടാക്കാം.

അനേത്ര്യം : നേത്രങ്ങൾക്ക് ഹിതകരമല്ലാത്തത് എന്നാണ് ഇതിന്റെ അർത്ഥം. അമിതമായ ചൂടും രൂക്ഷതയും ഉള്ളതിനാൽ ഇത് കണ്ണിന്റെ കാഴ്ചശക്തിക്കോ നേത്രരോഗങ്ങൾക്കോ അനുയോജ്യമല്ല; അമിതോപയോഗം കണ്ണിന് ദോഷം ചെയ്യും.

മുഖശോധനം: വായയെ പൂർണ്ണമായും ശുദ്ധീകരിക്കുന്നത്. വായ്ക്കകത്ത് അടിഞ്ഞുകൂടുന്ന വഴുവഴുപ്പ്, അരുചി, കഫക്കെട്ട്, വായ്നാറ്റം എന്നിവയെ ഉന്മൂലനം ചെയ്ത് വായയ്ക്ക് ഉന്മേഷവും ശുചിത്വവും പ്രദാനം ചെയ്യുന്ന കർമ്മമാണിത്.

അവൃഷ്യം : ശുക്ലധാതുവിനെയോ ലൈംഗികശേഷിയെയോ പരിപോഷിപ്പിക്കാത്ത ഒന്നാണിത്. ഉഷ്ണ-തീക്ഷ്ണ സ്വഭാവം കൂടുതലായതിനാൽ ദീർഘകാലം അമിതമായി ഉപയോഗിച്ചാൽ ഇത് ധാതുക്ഷയത്തിന് കാരണമായേക്കാം.

ബഹുവിട്കം : 'വിട്' എന്നാൽ മലം; മലത്തിന്റെ അളവ് വർദ്ധിപ്പിക്കുന്നതും, വിസർജ്യത്തെ വിഘടിപ്പിച്ച് ശരീരം വിടാൻ പാകത്തിൽ കൂടുതലായി പുറന്തള്ളുന്നതുമായ അവസ്ഥയെ ഇത് കുറിക്കുന്നു.

പിത്തരക്തപ്രദൂഷണമ് : ശരീരത്തിലെ പിത്തദോഷത്തെയും രക്തധാതുവിനെയും ദുഷിപ്പിക്കുന്നത് അഥവാ കോപിപ്പിക്കുന്നത്. ഇതിന്റെ അമിതമായ ചൂടും എരിവും രക്തത്തിലെ ഉഷ്ണം വർദ്ധിപ്പിക്കുകയും പിത്തം കൂട്ടുകയും ചെയ്യുന്നതിനാൽ രക്തപിത്തം (Bleeding disorders), രക്തദൂഷിത ചർമ്മരോഗങ്ങൾ, അസിഡിറ്റി എന്നിവയുള്ളവർ ഇത് ഉപയോഗിക്കുമ്പോൾ അതീവ ജാഗ്രത പാലിക്കണമെന്ന് ആചാര്യൻ വ്യക്തമായി മുന്നറിയിപ്പ് നൽകുന്നു.

2. കയ്യദേവ നിഘണ്ടു .

ഭൂസ്തൃണഃ കടുകസ്തിക്തഃ തീക്ഷ്ണോഷ്ണോ രോചനോ ലഘുഃ ॥

വിദാഹീ ദീപനോ രൂക്ഷോ ചക്ഷുഷ്യോ വക്ത്രശോധനഃ ।

അവൃഷ്യോ ബഹുവിട്കഃ സ്യാത് രക്തപിത്തപ്രദൂഷണഃ ॥

കൃമികാസവമിശ്ലേഷ്മശ്വാസദദ്രുവിനാശനഃ ॥

കയ്യദേവ നിഘണ്ടുവിലെ ഓഷധിവർഗ്ഗത്തിൽ ആചാര്യനായ കയ്യദേവൻ ഭൂസ്തൃണത്തിന്റെ (ഇഞ്ചിപ്പുല്ല്) ഗുണകർമ്മങ്ങളെയും രോഗശമന ശേഷിയെയും പദങ്ങളിലൂടെ വിശദീകരിക്കുന്നത് ഇപ്രകാരമാണ്:

ഭൂസ്തൃണഃ : ഭൂമിയിൽ തഴച്ചുവളരുന്ന സുഗന്ധമുള്ള ഇഞ്ചിപ്പുല്ല് അഥവാ വാസനപ്പുല്ല്.

കടുകസ്തിക്തഃ : കടുവും (എരിവ്) തിക്തവുമായ (കയ്പ്) രണ്ട് പ്രധാന രസങ്ങൾ ഇതിൽ അടങ്ങിയിരിക്കുന്നു. ഇവ രണ്ടും കഫത്തെ ഇല്ലാതാക്കാനും വായയിലെ വഴുവഴുപ്പ് മാറ്റി ശുദ്ധിയുണ്ടാക്കാനും സഹായിക്കുന്നു.

തീക്ഷ്ണോഷ്ണോ : ശരീരത്തിലെ സൂക്ഷ്മമായ നാളികളിലേക്ക് തുളച്ചുകയറുന്ന 'തീക്ഷ്ണ' ഗുണവും, ശരീരത്തിൽ ചൂടുണ്ടാക്കി കഫവാതങ്ങളെ അലിയിച്ചു കളയുന്ന 'ഉഷ്ണ' വീര്യവും ഇതിനുണ്ട്.

രോചനോ : നാവിന് രുചിയുണ്ടാക്കുന്ന ഗുണമാണിത്. ദഹനക്കുറവ് മൂലമോ രോഗങ്ങൾ മൂലമോ ഉണ്ടാകുന്ന അരുചിയെയും മനംപിരട്ടലിനെയും മാറ്റി ആഹാരത്തോട് പ്രിയമുണ്ടാക്കുന്നു.

ലഘുഃ : വളരെ വേഗത്തിൽ ദഹിക്കുന്നതും ആമാശയത്തിൽ ഭാരമുണ്ടാക്കാത്തതുമായ ലഘുഗുണം.

വിദാഹീ : ദഹനപ്രക്രിയ നടക്കുന്ന സമയത്ത് ഉദരത്തിൽ നേരിയ എരിച്ചിലോ പുകച്ചിലോ ഉണ്ടാക്കുന്ന സ്വഭാവം.

ദീപനോ : മന്ദീഭവിച്ച ജഠരാഗ്നിയെ ആളിക്കത്തിച്ച് ദഹനശേഷിയെ ത്വരിതപ്പെടുത്തുന്ന കർമ്മം.

രൂക്ഷോ : ശരീരത്തിലെ അമിതമായ വഴുവഴുപ്പിനെയും കഫത്തെയും ഈർപ്പത്തെയും വറ്റിച്ചുണക്കുന്ന വരൾച്ച ഗുണം.

അചക്ഷുഷ്യോ : ശ്ലോകത്തിലെ 'രൂക്ഷോ ചക്ഷുഷ്യോ' എന്നത് വ്യാകരണനിയമപ്രകാരം സന്ധി ചേരുമ്പോൾ 'രൂക്ഷോചക്ഷുഷ്യോ' (രൂക്ഷഃ + അചക്ഷുഷ്യഃ) എന്നാണ് വായിക്കേണ്ടത്. അമിതമായ ചൂടും രൂക്ഷതയും ഉള്ളതിനാൽ ഇത് കണ്ണിന്റെ കാഴ്ചയ്ക്കോ നേത്രങ്ങൾക്കോ ഹിതകരമല്ല; അമിതോപയോഗം കണ്ണിന് ദോഷം ചെയ്യും.

വക്ത്രശോധനഃ : 'വക്ത്രം' എന്നാൽ വായ; വായ്ക്കകത്ത് അടിഞ്ഞുകൂടുന്ന ദുർഗന്ധം, കഫക്കെട്ട്, അരുചി എന്നിവയെ നീക്കി വായ ശുദ്ധീകരിക്കുന്നു.

അവൃഷ്യോ : ശുക്ലധാതുവിനെയോ പുരുഷബീജത്തെയോ പോഷിപ്പിക്കാത്തത്. ഉഷ്ണ-തീക്ഷ്ണ സ്വഭാവം ഉള്ളതുകൊണ്ട് അമിതോപയോഗം ധാതുക്ഷയത്തിന് കാരണമാകും.

ബഹുവിട്കഃ സ്യാത്: കുടലിൽ അടിഞ്ഞുകൂടിയ മലത്തെ വിഘടിപ്പിച്ച് വിസർജ്യത്തിന്റെ അളവ് വർദ്ധിപ്പിച്ച് പുറന്തള്ളുന്നു.

രക്തപിത്തപ്രദൂഷണഃ : ശരീരത്തിലെ ഉഷ്ണവും രൂക്ഷതയും വർദ്ധിപ്പിച്ച് രക്തധാതുവിനെയും പിത്തദോഷത്തെയും ഒരുപോലെ ദുഷിപ്പിക്കുന്നു. അതിനാൽ രക്തസ്രാവമുള്ളവരും അസിഡിറ്റി ഉള്ളവരും ഇത് ഉപയോഗിക്കുമ്പോൾ നിയന്ത്രണം പാലിക്കണം.

കൃമിവിനാശനഃ : ഉദരത്തിലെ കൃമികളെയും പരാദങ്ങളെയും നശിപ്പിച്ച് ഉദരശുദ്ധി വരുത്തുന്നു.

കാസവിനാശനഃ : കഫക്കെട്ട് മൂലം തൊണ്ടയിലും നെഞ്ചിലും ഉണ്ടാകുന്ന ചുമയെ ഇല്ലാതാക്കുന്നു.

വമിവിനാശനഃ : ദഹനക്കേട് മൂലമോ കഫദോഷം മൂലമോ ഉണ്ടാകുന്ന ഛർദ്ദിയെയും മനംപിരട്ടലിനെയും ശമിപ്പിക്കുന്നു.

ശ്ലേഷ്മവിനാശനഃ : ശ്വാസകോശത്തിലും ഉദരത്തിലും അമിതമായി അടിഞ്ഞുകൂടുന്ന കഫത്തെ (ശ്ലേഷ്മത്തെ) അലിയിച്ചു കളയുന്നു.

ശ്വാസവിനാശനഃ : കഫം നാളികളിൽ അടിഞ്ഞുണ്ടാകുന്ന ശ്വാസംമുട്ടലിനും വലിവുകൾക്കും ആശ്വാസം നൽകുന്നു.

ദദ്രുവിനാശനഃ : ത്വക്കിലുണ്ടാകുന്ന ഫംഗസ് ബാധ, വട്ടച്ചൊറി (Ringworm), ചിരങ്ങ് തുടങ്ങിയ ചർമ്മരോഗങ്ങളെ ശമിപ്പിക്കുന്നു

3. രാജനിഘണ്ടു (ശാല്മല്യാദിവർഗ്ഗം)

ഭൂതൃണം കടുതിക്തഞ്ച വാതസന്താപനാശനമ് ।

ഹന്തി ഭൂതഗ്രഹാവേശാൻ വിഷദോഷാംശ്ച ദാരുണാൻ ॥ ൧൨൨ ॥

രാജനിഘണ്ടുവിലെ ശാല്മല്യാദിവർഗ്ഗത്തിൽ ആചാര്യനായ നരഹരി പണ്ഡിതൻ ഭൂതൃണത്തിന്റെ (ഇഞ്ചിപ്പുല്ല്) സവിശേഷ ഗുണങ്ങളെയും രോഗശമന ശേഷിയെയും നിർവ്വചിക്കുന്നത് ഇപ്രകാരമാണ്:

ഭൂതൃണം : സുഗന്ധവാഹിയായ ഔഷധസസ്യമായ ഇഞ്ചിപ്പുല്ല് അഥവാ വാസനപ്പുല്ല്.

കടുതിക്തഞ്ച : കടുവും (എരിവ്) തിക്തവുമായ (കയ്പ്) രസങ്ങൾ ഇതിൽ പ്രധാനമായി നിലകൊള്ളുന്നു. കഫത്തെ അലിയിച്ചു കളയാനും, വായ ശുദ്ധീകരിക്കാനും, ദഹനശേഷിയെ ഉത്തേജിപ്പിക്കാനും ഈ ദ്വിവിധ രസങ്ങൾ സഹായിക്കുന്നു.

വാതസന്താപനാശനമ്: വാതകോപം മൂലമുണ്ടാകുന്ന അസഹ്യമായ ശരീരവേദന, കഴപ്പ്, സന്ധിവേദന എന്നിവയെയും, ജ്വരം (പനി) മൂലമുണ്ടാകുന്ന ആന്തരിക തപസ്സിനെയും (സന്താപം/ചൂട്) അസ്വസ്ഥതകളെയും ഒരുപോലെ ശമിപ്പിക്കുന്നു. വാത-കഫ സംബന്ധമായ പനികളിൽ ഇഞ്ചിപ്പുല്ല് ചായയായും ആവിയായും ഉപയോഗിക്കുന്നത് ഈ ഗുണം മുൻനിർത്തിയാണ്.

ഹന്തി : ഉന്മൂലനം ചെയ്യുന്നു അഥവാ വേരോടെ നശിപ്പിക്കുന്നു.

ഭൂതഗ്രഹാവേശാൻ : ആയുർവേദത്തിലെ അഷ്ടാംഗങ്ങളിൽ ഒന്നായ ഭൂതവിദ്യയിൽ വിവരിക്കുന്ന സൂക്ഷ്മാണുബാധകൾ (ബാക്ടീരിയ, വൈറസ് തുടങ്ങിയ അണുബാധകൾ), രോഗകാരികളായ ബാഹ്യഘടകങ്ങൾ, മാനസികമായ വിഭ്രാന്തികൾ എന്നിവയെ ഇല്ലാതാക്കുന്നു. ഇഞ്ചിപ്പുല്ല് പുകയ്ക്കുന്നതിലൂടെ അന്തരീക്ഷത്തിലെ വിഷാണുക്കളും കീടങ്ങളും നശിച്ചുപോകുന്നത് ഇതിന്റെ വിഷഹര സ്വഭാവത്തിന് ഉദാഹരണമാണ്.

വിഷദോഷാംശ്ച : ശരീരത്തിലേക്ക് ബാധിക്കുന്ന കൃത്രിമവിഷം (ഗരവിഷം), ജന്തുവിഷം തുടങ്ങിയ സകലവിധ വിഷാംശങ്ങളെയും അവ മൂലമുണ്ടാകുന്ന ദോഷങ്ങളെയും.

ദാരുണാൻ : അതീവ ഗുരുതരമായതും സങ്കീർണ്ണവുമായ വിഷാവസ്ഥകളെയാണ് 'ദാരുണം' എന്ന പദം കൊണ്ട് സൂചിപ്പിക്കുന്നത്. അത്തരം തീവ്രമായ വിഷാംശങ്ങളെപ്പോലും ചെറുത്തുതോൽപ്പിക്കാൻ പര്യാപ്തമായ വിഷഘ്ന (ആന്റിടോക്സിക്) പ്രഭാവം ഭൂതൃണത്തിനുണ്ട് എന്ന് ആചാര്യൻ വ്യക്തമാക്കുന്നു..

4. ധന്വന്തരി നിഘണ്ടു (കരവീരാദിവർഗ്ഗം)

ഭൂതൃണോ ലഘുരുഷ്ണശ്ച രൂക്ഷഃ ശ്ലേഷ്മാമയാപഹഃ ।

അസ്യ പ്രയോഗഃ സഹസാ ഹന്തി ജന്തൂൻ സമുദ്ധതാൻ ॥ ൪൭ ॥

ഭൂതൃണഃ കടുതിക്തശ്ച വാതസന്താനനാശനഃ ।

ഹന്തി ഭൂതഗ്രഹാവേശാൻ വിഷദോഷാംശ്ച ദാരുണാൻ ॥ ൪൮ ॥

പുസ്ത്വഘ്നഃ കടൂ രൂക്ഷോഷ്ണോ ഭൂസ്തൃണോ വക്ത്രശോധനഃ ।

ധന്വന്തരി നിഘണ്ടുവിലെ കരവീരാദിവർഗ്ഗത്തിൽ ഭൂതൃണത്തിന്റെ (ഇഞ്ചിപ്പുല്ല്) ഔഷധമൂല്യത്തെയും രോഗശമന ശേഷിയെയും ആയുർവേദ വീക്ഷണത്തിൽ  നിർവ്വചിക്കുന്നത് ഇപ്രകാരമാണ്:

ഭൂതൃണോ : സുഗന്ധത്തോടുകൂടി ഭൂമിയിൽ പടർന്നു വളരുന്ന ഇഞ്ചിപ്പുല്ല് അഥവാ വാസനപ്പുല്ല്.

ലഘുഃ : ശരീരത്തിൽ ഭാരമുണ്ടാക്കാതെ വളരെ എളുപ്പത്തിൽ ദഹിക്കുന്ന ലഘുവായ ഗുണം.

ഉഷ്ണശ്ച : ശരീരത്തിൽ ഊഷ്മാവ് വർദ്ധിപ്പിച്ച് തണുപ്പിനെയും വാത-കഫങ്ങളെയും ശമിപ്പിക്കുന്ന ഉഷ്ണവീര്യം.

രൂക്ഷഃ : ശരീരത്തിലെ അമിതമായ വഴുവഴുപ്പിനെയും ഈർപ്പത്തെയും കഫത്തെയും വറ്റിച്ചുണക്കുന്ന സ്വഭാവം.

ശ്ലേഷ്മാമയാപഹഃ : 'ശ്ലേഷ്മം' എന്നാൽ കഫം, 'ആമയം' എന്നാൽ രോഗം; കഫക്കെട്ട് മൂലം നെഞ്ചിലും തലയിലും ഉണ്ടാകുന്ന നീർക്കെട്ട്, പനി, ജലദോഷം, ചുമ തുടങ്ങിയ സകല കഫജന്യ രോഗങ്ങളെയും അപഹരിക്കുന്നത് അഥവാ പൂർണ്ണമായി ഇല്ലാതാക്കുന്നത്.

അസ്യ പ്രയോഗഃ : ഇതിന്റെ ഔഷധപരമായ പ്രയോഗം (കഷായമായോ, തൈലമായോ, ആവിയായോ ഉള്ള ഉപയോഗം).

സഹസാ : വളരെ വേഗത്തിൽ, പെട്ടെന്ന് തന്നെ ആശ്വാസം നൽകിക്കൊണ്ട്.

ഹന്തി : ഉന്മൂലനം ചെയ്യുന്നു.

ജന്തൂൻ : ഉദരത്തിലെ കൃമികൾ, പരാദങ്ങൾ, ശരീരത്തിൽ ബാധിക്കുന്ന രോഗാണുക്കൾ എന്നിവയെ.

സമുദ്ധതാൻ : നിയന്ത്രണമില്ലാതെ പെരുകുന്നതും അതിശക്തവുമായ കൃമിബാധകളെയും അണുബാധകളെയും പോലും സഹസാ (പെട്ടെന്ന്) നശിപ്പിക്കാൻ ഇതിലെ തീവ്രമായ സുഗന്ധതൈലത്തിന് ശേഷിയുണ്ട്.

ഭൂതൃണഃ: ഇഞ്ചിപ്പുല്ല്.

കടുതിക്തശ്ച : കടുവും (എരിവ്) തിക്തവുമായ (കയ്പ്) രസങ്ങൾ പ്രദാനം ചെയ്യുന്നത്.

വാതസന്താനനാശനഃ : ശരീരത്തിൽ തുടർച്ചയായി പടർന്നുപിടിക്കുന്ന വാതകോപത്തെയും വാതരോഗ പരമ്പരകളെയും, അതുമൂലമുണ്ടാകുന്ന തീവ്രമായ ശരീരവേദനകളെയും തടഞ്ഞു നിർത്തുന്നത്.

ഭൂതഗ്രഹാവേശാൻ ഹന്തി : ബാഹ്യമായ അണുബാധകൾ, വിഷാണുക്കൾ, സൂക്ഷ്മാണുക്കൾ എന്നിവയെയും മനസ്സിനെ ബാധിക്കുന്ന അസ്വസ്ഥതകളെയും ഒരുപോലെ അകറ്റുന്നു.

വിഷദോഷാംശ്ച ദാരുണാൻ: 'ദാരുണം' എന്നാൽ അതീവ ഗുരുതരമായത്; ശരീരത്തിലേക്ക് ബാധിക്കുന്ന അതികഠിനമായ വിഷബാധകളെയും അവ മൂലമുണ്ടാകുന്ന സങ്കീർണ്ണതകളെയും ശമിപ്പിക്കാനുള്ള വിഷഹര ശേഷി ഇതിനുണ്ട്.

പുസ്ത്വഘ്നഃ : പുംസ്ത്വത്തെ (ശുക്ലധാതുവിനെയും ലൈംഗികശേഷിയെയും) ഹനിക്കുന്നത് അഥവാ കുറയ്ക്കുന്നത് (അവൃഷ്യം). ഇതിന്റെ അമിതമായ ചൂടും രൂക്ഷതയും ശുക്ലധാതുവിനെ ക്ഷയിപ്പിക്കാൻ ഇടയാക്കുമെന്നതിനാൽ അമിതോപയോഗം ഒഴിവാക്കണമെന്ന് ആചാര്യൻ വ്യക്തമാക്കുന്നു.

കടൂ : എരിവ് രസമുള്ളത്.

രൂക്ഷോഷ്ണോ : രൂക്ഷഗുണത്തോടും ഉഷ്ണവീര്യത്തോടും കൂടിയത്.

ഭൂസ്തൃണോ: ഭൂസ്തൃണം അഥവാ ഇഞ്ചിപ്പുല്ല്.

വക്ത്രശോധനഃ: 'വക്ത്രം' എന്നാൽ വായ; വായ്ക്കകത്തെ ദുർഗന്ധം, വഴുവഴുപ്പ്, അരുചി എന്നിവ നീക്കം ചെയ്ത് വായ പൂർണ്ണമായി ശുദ്ധീകരിക്കുന്നത്.

ഇഞ്ചിപ്പുല്ലിന്റെ ഔഷധഗുണങ്ങൾ: ആയുർവേദ ഗ്രന്ഥങ്ങൾ പറയുന്നത്

നമ്മുടെ തൊടിയിൽ സുഗന്ധം പരത്തി നിൽക്കുന്ന ഇഞ്ചിപ്പുല്ലിനെ (ഭൂതൃണം) വെറുമൊരു ചായപ്പുല്ലായല്ല ആയുർവേദ ആചാര്യന്മാർ കണ്ടത്. ഭാവപ്രകാശവും കയ്യദേവ നിഘണ്ടുവും രാജനിഘണ്ടുവും ധന്വന്തരി നിഘണ്ടുവും ഒരേസ്വരത്തിൽ പറയുന്നത്, കഫത്തെയും വാതത്തെയും ശരീരത്തിൽ നിന്ന് തുരത്തിയോടിക്കാൻ ഇതിലും മികച്ചൊരു ഔഷധം വേറെയില്ലെന്നാണ്.

ഈ പ്രമാണ ശ്ലോകങ്ങൾ സൂക്ഷ്മമായി പരിശോധിച്ചാൽ ഇഞ്ചിപ്പുല്ല് ഏതെല്ലാം രോഗങ്ങൾക്ക് എങ്ങനെ ഫലപ്രദമായി ഉപയോഗിക്കാം എന്ന് വ്യക്തമായി മനസ്സിലാക്കാം.

ശ്വാസകോശ രോഗങ്ങളും കഫക്കെട്ടും (കാസ-ശ്വാസ-ശ്ലേഷ്മാമയഹരം)

മഴക്കാലത്തോ തണുപ്പുകാലത്തോ നെഞ്ചിൽ കഫം കെട്ടിപ്പിടിച്ച് ശ്വാസംമുട്ടലും ചുമയും വരാറുണ്ടല്ലോ. ശ്ലോകങ്ങളിൽ ഇഞ്ചിപ്പുല്ലിനെ 'ശ്ലേഷ്മാമയാപഹഃ' എന്നാണ് വിശേഷിപ്പിക്കുന്നത്—അതായത് കഫം മൂലമുണ്ടാകുന്ന സകല രോഗങ്ങളെയും ഇല്ലാതാക്കുന്നത്. ഇതിലെ ഉഷ്ണ-തീക്ഷ്ണ വീര്യം ശ്വാസനാളികളിൽ അടിഞ്ഞുകൂടിയ കട്ടികൂടിയ കഫത്തെ വേഗത്തിൽ അലിയിച്ചു കളയുന്നു. ഇടതടവില്ലാതെ വരുന്ന വരണ്ട ചുമ (കാസം), ശ്വാസമെടുക്കാനുള്ള ബുദ്ധിമുട്ട് (ശ്വാസം), കഫം മൂലമുള്ള വലിവ് എന്നിവയ്ക്ക് ഇഞ്ചിപ്പുല്ലിന്റെ ഇലയിട്ട് തിളപ്പിച്ച വെള്ളം കുടിക്കുന്നതും ആവി പിടിക്കുന്നതും പെട്ടെന്ന് ആശ്വാസം നൽകും.

ദഹനക്കേട്, അരുചി, ഛർദ്ദി (രോചനം, ദീപനം, വമിശമനം)

പനി വന്നിട്ടോ വയറ്റിലെ പ്രശ്നങ്ങൾ കൊണ്ടോ നാവിൽ ഒരു രുചിയുമില്ലാതെ വായ കൈച്ചിരിക്കുന്ന അവസ്ഥയിൽ ഇഞ്ചിപ്പുല്ല് അത്ഭുതങ്ങൾ കാണിക്കും. ആചാര്യന്മാർ ഇതിനെ 'വക്ത്രശോധന' അഥവാ 'മുഖശോധന' എന്നാണ് വിളിക്കുന്നത്. വായ്ക്കകത്തെ വഴുവഴുപ്പും വായ്നാറ്റവും മാറ്റി ഉന്മേഷവും സ്വാഭാവിക രുചിയും തിരികെ കൊണ്ടുവരാൻ (രോചനം) ഇതിന് കഴിയും. ഒപ്പം മന്ദഗതിയിലായ ദഹനപ്രക്രിയയെ ഉത്തേജിപ്പിക്കാനും (ദീപനം), അസിഡിറ്റിയോ ഗ്യാസോ കൊണ്ടുള്ള മനംപിരട്ടലും ഛർദ്ദിയും (വമി) തടയാനും ഇത് ഉത്തമമാണ്.

മലബന്ധവും കുടലിലെ മാലിന്യങ്ങളും (രേചനം, ബഹുവിട്കം)

ശ്ലോകങ്ങളിൽ 'രേചനം', 'ബഹുവിട്കം' എന്നീ രണ്ട് വാക്കുകൾ കാണാം. കുടലിൽ ദഹിക്കാതെ കിടക്കുന്ന പഴയ മാലിന്യങ്ങളെയും വായുവിനെയും താഴേക്ക് തള്ളി പുറന്തള്ളാൻ ഇഞ്ചിപ്പുല്ല് സഹായിക്കും. വയറ് വീർത്തു കെട്ടിനിൽക്കുന്ന അവസ്ഥയിലും മലശോധന ശരിയായി നടക്കാത്തപ്പോഴും ഇഞ്ചിപ്പുല്ല് ചേർത്ത കഷായം കുടിക്കുന്നത് മലത്തെ വിഘടിപ്പിച്ച് എളുപ്പത്തിൽ പുറന്തള്ളാൻ ശരീരത്തെ പ്രാപ്തമാക്കും.

വിട്ടുമാറാത്ത ശരീരവേദനയും പനിയും (വാതസന്താപനാശനം, വാതസന്താനം)

പനി വരുമ്പോൾ ശരീരം ചുട്ടുപൊള്ളുന്നതിനൊപ്പം അസ്ഥി തുളയ്ക്കുന്ന വേദനയും കഴപ്പും വരാറുണ്ട്. വാതകോപം മൂലമുണ്ടാകുന്ന ഇത്തരം കഠിനമായ വേദനകളെയും പനിയുടെ ചൂടിനെയും (സന്താപം) ഇല്ലാതാക്കാൻ ഇഞ്ചിപ്പുല്ലിന് പ്രത്യേക കഴിവുണ്ട്. മാത്രമല്ല, ധന്വന്തരി നിഘണ്ടുവിൽ പറയുന്ന 'വാതസന്താനനാശനം' എന്നത് ശ്രദ്ധേയമാണ്—ശരീരത്തിൽ ഒന്നിൽനിന്ന് മറ്റൊന്നിലേക്ക് എന്നപോലെ വിട്ടുമാറാതെ തുടരുന്ന വിട്ടുമാറാത്ത വാതരോഗ പരമ്പരകളെയും സന്ധിവേദനകളെയും ശമിപ്പിക്കാൻ ഇതിന്റെ ഉപയോഗം വഴി സാധിക്കും.

കൃമിശല്യവും രോഗാണുബാധകളും (കൃമിഘ്നം, ജന്തുനാശനം)

ഉദരത്തിൽ വിരശല്യമോ കൃമിബാധയോ പെരുകുമ്പോൾ 'സഹസാ ഹന്തി ജന്തൂൻ സമുദ്ധതാൻ' എന്നാണ് ശാസ്ത്രം പറയുന്നത്. അതിവേഗത്തിൽ പെരുകുന്ന ഏത് ശക്തമായ കൃമികളെയും പരാദങ്ങളെയും നിമിഷനേരം കൊണ്ട് നശിപ്പിക്കാനുള്ള ആന്റിപാരാസൈറ്റിക് ശേഷി ഇതിലടങ്ങിയിരിക്കുന്ന സുഗന്ധതൈലങ്ങൾക്കുണ്ട്.

ഫംഗസ് ബാധകളും ത്വക്ക് രോഗങ്ങളും (ദദ്രുവിനാശനം)

ഇഞ്ചിപ്പുല്ല് വെറുതെ കുടിക്കാൻ മാത്രമല്ല, തൊലിപ്പുറത്തെ രോഗങ്ങൾക്കും നല്ലൊരു മരുന്നാണ്. കയ്യദേവ നിഘണ്ടു ഇതിനെ 'ദദ്രുവിനാശനം' എന്നാണ് അടയാളപ്പെടുത്തുന്നത്. വട്ടച്ചൊറി (Ringworm), ഫംഗസ് അണുബാധകൾ, ചൊറിച്ചിൽ, ചെറിയ ചിരങ്ങുകൾ എന്നിവയുള്ള ഭാഗങ്ങളിൽ ഇഞ്ചിപ്പുല്ലിന്റെ നീരോ തൈലമോ വെളിച്ചെണ്ണയിൽ ചാലിച്ച് പുരട്ടുന്നത് അണുബാധകളെ ഇല്ലാതാക്കാൻ സഹായിക്കും.

വിഷബാധകളും അന്തരീക്ഷ ശുദ്ധീകരണവും (വിഷദോഷം, ഭൂതഗ്രഹാവേശം)

പഴയകാലത്ത് 'ദാരുണമായ വിഷദോഷങ്ങൾ' എന്ന് വിളിച്ചിരുന്ന ഭക്ഷ്യവിഷബാധ, ചെറു പ്രാണികളുടെ കടിയേറ്റുള്ള വിഷാംശം എന്നിവയുടെ കാഠിന്യം കുറയ്ക്കാൻ ഇത് ഉപയോഗിച്ചിരുന്നു. 'ഭൂതഗ്രഹാവേശം' ഇല്ലാതാക്കും എന്ന് പറഞ്ഞാൽ ബാഹ്യമായ അണുബാധകളെയും ബാക്ടീരിയ-വൈറസ് സാന്നിധ്യങ്ങളെയും തുരത്തുക എന്നാണ് അർത്ഥം. പണ്ട് വീടുകളിൽ ഇഞ്ചിപ്പുല്ല് പുകച്ചിരുന്നത് അന്തരീക്ഷത്തിലെ സൂക്ഷ്മാണുക്കളെയും കൊതുകിനെയും നശിപ്പിക്കാനായിരുന്നു.

ആയുർവേദം നൽകുന്ന ശക്തമായ മുന്നറിയിപ്പുകൾ

ഇഞ്ചിപ്പുല്ലിന്റെ ഗുണങ്ങൾ എത്രത്തോളമുണ്ടോ, അത്രതന്നെ അതിന്റെ പാർശ്വഫലങ്ങളെക്കുറിച്ചും ആചാര്യന്മാർ കൃത്യമായ മുന്നറിയിപ്പ് നൽകുന്നുണ്ട്. :

പിത്തരക്തപ്രദൂഷണം & വിദാഹി: ഇതിന് അമിതമായ ചൂടും എരിവും ഉള്ളതുകൊണ്ട് ശരീരത്തിൽ പിത്തവും രക്തത്തിലെ ചൂടും വർദ്ധിപ്പിക്കും. അസിഡിറ്റി, നെഞ്ചെരിച്ചിൽ, അൾസർ, മൂക്കിൽ നിന്നോ മലത്തിലൂടെയോ രക്തസ്രാവം ഉള്ളവർ (രക്തപിത്തം) ഇത് അധികം ഉപയോഗിക്കരുത്.

അനേത്ര്യം / അചക്ഷുഷ്യം: ഇതിന്റെ ഉഷ്ണ-രൂക്ഷ സ്വഭാവം കണ്ണിന് നല്ലതല്ല. അമിതമായി ഉപയോഗിക്കുന്നത് കാഴ്ചശക്തിയെയും കണ്ണിന്റെ ആരോഗ്യത്തെയും പ്രതികൂലമായി ബാധിച്ചേക്കാം.

അവൃഷ്യം / പുസ്ത്വഘ്നം: ഇത് ശരീരത്തിലെ ശുക്ലധാതുവിനെ കുറയ്ക്കുന്ന ഒന്നാണ്. അതിനാൽ പുരുഷന്മാർ ഇത് ദിവസേന കൂടിയ അളവിൽ ദീർഘകാലം കുടിക്കുന്നത് പ്രജനനശേഷിക്കും ലൈംഗികാരോഗ്യത്തിനും ദോഷം ചെയ്യും.

ചുരുക്കത്തിൽ, ജലദോഷം, കഫക്കെട്ട്, പനി, ദഹനക്കേട്, വാതവേദനകൾ എന്നിവ വരുമ്പോൾ ഒന്നോ രണ്ടോ ആഴ്ചത്തേക്ക് നിയന്ത്രിതമായ അളവിൽ കട്ടൻചായയിലോ കഷായമായോ ഇഞ്ചിപ്പുല്ല് ഉപയോഗിക്കുന്നത് ഉത്തമ ഔഷധമാണ്; എന്നാൽ ദിവസവും വെള്ളംപോലെ സ്ഥിരമായി കുടിക്കുന്നത് ഒഴിവാക്കുകയും വേണം.

ഇഞ്ചിപ്പുല്ലിന്റെ മണത്തിന് പിന്നിലെ രഹസ്യം എന്താണ്?

ഇഞ്ചിപ്പുല്ലിന്റെ ഇല ഞെരടുമ്പോൾത്തന്നെ മൂക്കിലേക്ക് തുളച്ചുകയറുന്ന ആ പ്രത്യേക നാരങ്ങാ മണത്തിന് പിന്നിൽ സിട്രാൽ (Citral) എന്ന പ്രകൃതിദത്ത ഘടകമാണ്. ഇതിന്റെ സത്തിൽ വലിയൊരു പങ്കും നിറഞ്ഞുനിൽക്കുന്നത് ജെറാനിയൽ (Geranial), നെറൽ (Neral) എന്നീ രണ്ട് സംയുക്തങ്ങൾ ചേർന്ന ഈ സിട്രാലാണ്. പരീക്ഷണശാലാ പഠനങ്ങൾ വ്യക്തമാക്കുന്നത്, ബാക്ടീരിയ, ഫംഗസ് തുടങ്ങിയ സൂക്ഷ്മാണുക്കളുടെ വളർച്ചയെ ഒരു പരിധിവരെ തടയാനും, കോശങ്ങളിലെ നേരിയ നീർക്കെട്ടുകൾ കുറയ്ക്കാനും ഈ ഘടകത്തിന് സഹായകരമാകാൻ കഴിഞ്ഞേക്കും എന്നാണ്.

ശരീരത്തിന് ക്ഷീണമോ അസ്വസ്ഥതയോ തോന്നുമ്പോൾ പലരും ഇഞ്ചിപ്പുല്ല് ചായ കുടിക്കുന്നത് കാണാം. ഇതിലടങ്ങിയിരിക്കുന്ന മൈർസീൻ (Myrcene) എന്ന സംയുക്തം പേശികൾക്ക് അയവുനൽകാനും, നേരിയ ആശ്വാസം പകരാനും തുണയേകുമെന്നാണ് പഠനങ്ങൾ സൂചിപ്പിക്കുന്നത്. അല്ലാതെ ശരീരവേദനയോ പനിയോ പൂർണ്ണമായി മാറ്റാനുള്ള ഒരു മെഡിക്കൽ ചികിത്സയല്ല ഇത്; മറിച്ച് രോഗാവസ്ഥകളിൽ ശരീരത്തിന് അല്പം ഉന്മേഷവും സ്വാഭാവിക ആശ്വാസവും നൽകാനാണ് പരമ്പരാഗതമായി ആളുകൾ ഇത് ഉപയോഗിക്കുന്നത്.

ഇലകളിൽ കാണുന്ന ജെറാനിയോൾ (Geraniol), ലിമോണീൻ (Limonene) എന്നിവ ആന്റിമൈക്രോബിയൽ ഗുണങ്ങളുള്ള ഘടകങ്ങളാണ്. ത്വക്കിലുണ്ടാകുന്ന ഫംഗസ് ബാധകളെ പ്രതിരോധിക്കാൻ ഇഞ്ചിപ്പുല്ല് പരമ്പരാഗതമായി ഉപയോഗിച്ചു വരുന്നത് ഇവയുടെ സാന്നിധ്യം മുൻനിർത്തിയാണ്. 

ഇഞ്ചിപ്പുല്ലിന്റെ ഗന്ധം ശ്വസിക്കുമ്പോൾ മനസ്സിന് വല്ലാത്തൊരു തെളിച്ചം തോന്നാൻ കാരണം ഇതിലെ ലിനാലൂൾ (Linalool) ആണ്. തലച്ചോറിന് സ്വാഭാവികമായ ശാന്തത നൽകാനും, മാനസിക പിരിമുറുക്കങ്ങൾക്ക് അയവുണ്ടാക്കാനും അരോമാതെറാപ്പിയിൽ ലെമൺഗ്രാസ് ഓയിൽ ഉപയോഗിക്കാറുണ്ട്. രാത്രികളിൽ നല്ലൊരു ഉറക്കം കിട്ടാൻ മനസ്സിനെ ഒരുക്കാൻ ഈ സുഗന്ധത്തിന് സാധിക്കും.

ഇതിനുപുറമെ, ഐസോഓറിയന്റിൻ (Isoorientin), ക്ലോറോജെനിക് ആസിഡ് (Chlorogenic acid) തുടങ്ങിയ പോളിഫെനോളുകളും ഇതിലുണ്ട്. ദഹനപ്രക്രിയ സുഗമമാക്കാനും കോശങ്ങളെ സംരക്ഷിക്കുന്ന ആന്റിഓക്സിഡന്റ് പ്രതിരോധം തീർക്കാനും ഇവ നല്ലതാണ്.

ഇഞ്ചിപ്പുല്ലിന്റെ ഗുണങ്ങൾക്ക് പിന്നിലെ ശാസ്ത്രം എന്താണ്?

നമ്മുടെ മുറ്റത്തെ ഇഞ്ചിപ്പുല്ലിനെ ആധുനിക ലാബുകളിൽ ശാസ്ത്രജ്ഞർ പരിശോധിച്ചപ്പോൾ, പരമ്പരാഗതമായി കേട്ടുപോന്ന ഗുണങ്ങളിൽ ചിലതിന് ശാസ്ത്രീയമായ സാധ്യതകളുണ്ടെന്ന് കണ്ടെത്തിയിട്ടുണ്ട്. 

അണുബാധകളെ പ്രതിരോധിക്കാനുള്ള സാധ്യതകൾ

പരീക്ഷണശാലകളിൽ ഇഞ്ചിപ്പുല്ലിന്റെ സത്ത് വെച്ച് നടത്തിയ പ്രാഥമിക പഠനങ്ങളിൽ, ഇതിലെ സിട്രാൽ എന്ന ഘടകത്തിന് ചില ബാക്ടീരിയകളുടെയും ഫംഗസുകളുടെയും വളർച്ചയെ ഒരു പരിധി വരെ നിയന്ത്രിക്കാൻ കഴിഞ്ഞേക്കുമെന്ന് കണ്ടെത്തിയിട്ടുണ്ട്. എന്നാൽ ഇത് ലാബിലെ ടെസ്റ്റ് ട്യൂബുകളിൽ മാത്രം കണ്ട ഫലമാണ്. മനുഷ്യരിൽ വരുന്ന സങ്കീർണ്ണമായ ബാക്ടീരിയൽ അണുബാധകൾക്കോ ഫംഗസ് രോഗങ്ങൾക്കോ ഉള്ള ഒരു ഔദ്യോഗിക ആന്റിബയോട്ടിക് ചികിത്സയായി ഇതിനെ ശാസ്ത്രലോകം അംഗീകരിച്ചിട്ടില്ല. സോപ്പുകളിലും പ്രകൃതിദത്ത ക്ലെൻസറുകളിലും ഇതിന്റെ തൈലം ചേർക്കുന്നത് ചർമ്മത്തിന്റെ സ്വാഭാവിക ശുചിത്വത്തിന് പിന്തുണ നൽകാൻ മാത്രമാണ്.

നീർക്കെട്ടും ശരീരത്തിലെ അസ്വസ്ഥതകളും

ശരീരത്തിൽ ക്ഷീണമോ അസ്വസ്ഥതകളോ തോന്നുമ്പോൾ ഇഞ്ചിപ്പുല്ല് ചേർത്ത ചായ കുടിക്കുന്നത് ചിലർക്ക് ആശ്വാസം നൽകാറുണ്ട്. ഇതിലടങ്ങിയിരിക്കുന്ന മൈർസീൻ പോലുള്ള സംയുക്തങ്ങൾക്ക് കോശങ്ങളിലെ നേരിയ നീർക്കെട്ടുകളെ പ്രതിരോധിക്കാൻ തുണയായേക്കാമെന്നാണ് ആദ്യഘട്ട പരീക്ഷണങ്ങൾ നൽകുന്ന സൂചന. 

ആമാശയ സംരക്ഷണവും ദഹനവും

വയറ്റിലെ ഗ്യാസും അസ്വസ്ഥതകളും വരുമ്പോൾ ഇഞ്ചിപ്പുല്ല് ചായ പണ്ടുമുതലേ ആളുകൾ കുടിക്കാറുണ്ട്. മൃഗങ്ങളിൽ നടത്തിയ ചില പരീക്ഷണശാലാ പഠനങ്ങൾ ചൂണ്ടിക്കാണിക്കുന്നത്, ഇതിലെ ആന്റിഓക്സിഡന്റുകൾ ആമാശയ ഭിത്തികളുടെ സംരക്ഷണത്തിന് ഒരു പരിധി വരെ സഹായകരമായേക്കാം എന്നാണ്. 

മനസ്സിനെ ശാന്തമാക്കാനുള്ള സ്വാധീനം

മനസ്സിന് നേരിയ അയവ് നൽകാനും വിശ്രമത്തിനും അരോമാതെറാപ്പിയിൽ ലെമൺഗ്രാസ് ഓയിൽ വ്യാപകമായി ഉപയോഗിക്കുന്നുണ്ട്. ഇതിന്റെ സുഗന്ധം ശ്വസിക്കുന്നത് നാഡീവ്യൂഹത്തിന് സ്വാഭാവികമായൊരു തെളിച്ചവും ഉന്മേഷവും നൽകാൻ സഹായിച്ചേക്കാമെന്ന് ചില നിരീക്ഷണങ്ങൾ പറയുന്നു. പക്ഷേ, ക്ലിനിക്കൽ ഡിപ്രഷനോ ഉത്കണ്ഠാരോഗങ്ങൾക്കോ ഉള്ള മെഡിക്കൽ ചികിത്സയല്ലിത്; പകരം, ദിവസത്തെ അല്പം ശാന്തമാക്കാൻ ഉപയോഗിക്കാവുന്ന ലളിതമായൊരു റിലാക്സേഷൻ രീതി മാത്രമാണിത്.

ഇഞ്ചിപ്പുല്ല് എന്തിനൊക്കെ ഉപയോഗിക്കുന്നു?

ഇഞ്ചിപ്പുല്ല് വീട്ടുവളപ്പിൽ വളർത്തുന്നത് പലർക്കും ചായയ്ക്ക് മണവും രുചിയും നൽകാൻ മാത്രമായിരിക്കും. എന്നാൽ ഇതിന് അതിലും കൂടുതൽ ഉപയോഗങ്ങളുണ്ട്. ഇലയിൽനിന്നുള്ള പ്രത്യേക നാരങ്ങാമണവും  സുഗന്ധതൈലവും തന്നെയാണ് ഇതിനെ ഇത്രയും ഉപയോഗപ്രദമാക്കുന്നത്.

 ഇഞ്ചിപ്പുല്ല് ചായ

ഏറ്റവും സാധാരണമായ ഉപയോഗം ഇഞ്ചിപ്പുല്ല് ചായയാണ്. ഇല ചെറുതായി മുറിച്ച് ചൂടുവെള്ളത്തിൽ ഇട്ട് തയ്യാറാക്കുന്ന ചായയ്ക്ക് നല്ലൊരു നാരങ്ങാസുഗന്ധമുണ്ടാകും. ചിലർ ഇഞ്ചിയോ തേനോ ചേർത്തും ഇത് കുടിക്കാറുണ്ട്.

പരമ്പരാഗതമായി ദഹനക്കുറവ്, അരുചി, വയറിലെ അസ്വസ്ഥത, കഫം, ചുമ തുടങ്ങിയ സാഹചര്യങ്ങളിൽ ഇഞ്ചിപ്പുല്ല് ഉപയോഗിച്ചുവരുന്നുണ്ട്.

ഭക്ഷണത്തിന് മണവും രുചിയും നൽകാൻ

ഇഞ്ചിപ്പുല്ലിന്റെ ഇല വിവിധ വിഭവങ്ങളിൽ സുഗന്ധത്തിനായി ഉപയോഗിക്കുന്നു. സൂപ്പ്, കറി, സോസ്, നൂഡിൽസ്, മറ്റ് ഏഷ്യൻ വിഭവങ്ങൾ എന്നിവയിൽ ഇത് പ്രധാനമായും ഒരു flavouring ingredient ആയാണ് ഉപയോഗിക്കുന്നത്.ഇലയുടെ നാരങ്ങാസുഗന്ധം ഭക്ഷണത്തിന് പ്രത്യേക രുചി നൽകും.

ഇളം തണ്ടിന്റെ ഉള്ളഭാഗം ഭക്ഷണമായി

നമ്മുടെ നാട്ടിൽ ഇഞ്ചിപ്പുല്ല് എന്ന് കേൾക്കുമ്പോൾ ചായയിടാനോ ആവി പിടിക്കാനോ എണ്ണയെടുക്കാനോ ഉള്ള ഒന്നായിട്ടാണ് മിക്കവരും കാണുന്നത്. എന്നാൽ ഇതിന്റെ ഇളം തണ്ടിന്റെ ഉൾക്കാമ്പ് (Heart of young shoot) ചോറിനൊപ്പം ഒരു പച്ചക്കറിയായി കഴിക്കാൻ പറ്റുമെന്ന കാര്യം പലർക്കും പുതിയൊരു അറിവായിരിക്കും.

വാഴപ്പിണ്ടിയുടെയോ മുളങ്കമ്പിന്റെയോ ഒക്കെ ഉൾഭാഗം എടുക്കുന്നതുപോലെയാണ് ഇവിടെയും ചെയ്യുന്നത്. തെക്കുകിഴക്കൻ ഏഷ്യയിലെ ചില രാജ്യങ്ങളിൽ, പ്രത്യേകിച്ച് ഇന്തോനേഷ്യ, തായ്‌ലൻഡ്, വിയറ്റ്നാം തുടങ്ങിയ സ്ഥലങ്ങളിൽ ഇളം തണ്ടിന്റെ ഉള്ളഭാഗം ഭക്ഷണത്തിൽ ഉപയോഗിക്കുന്ന രീതികൾ കാണാം.

ഇഞ്ചിപ്പുല്ലിന്റെ സുഗന്ധതൈലം

ഇഞ്ചിപ്പുല്ലിന്റെ ഇലയിൽനിന്ന് അവശ്യതൈലം (Essential oil) വാറ്റിയെടുക്കുന്നുണ്ട്. ഇതിലെ പ്രധാന സുഗന്ധഘടകമാണ് സിട്രാൽ (Citral).

സുഗന്ധവസ്തുക്കൾ, സോപ്പ്, സൗന്ദര്യവർധക വസ്തുക്കൾ, പെർഫ്യൂം, മറ്റ് personal-care ഉൽപ്പന്നങ്ങൾ എന്നിവയിൽ ഇഞ്ചിപ്പുല്ലിന്റെ എണ്ണ ഉപയോഗിക്കുന്നുണ്ട്.

 സുഗന്ധത്തിനും അരോമതെറാപ്പിയിലും

ഇഞ്ചിപ്പുല്ലിന്റെ ശക്തമായ നാരങ്ങാമണം കാരണം സുഗന്ധ ഉൽപ്പന്നങ്ങളിലും അരോമതെറാപ്പിയിലും ഇതിന്റെ എണ്ണ ഉപയോഗിക്കാറുണ്ട്. മുറിയിൽ മനോഹരമായ സുഗന്ധം നൽകുന്നതിനും ചിലർ ഇത് ഉപയോഗിക്കുന്നു.

കീടങ്ങളെ അകറ്റാൻ

ഇഞ്ചിപ്പുല്ലിന് സ്വാഭാവികമായ കീടനിരോധക (insect repellent) സ്വഭാവമുണ്ടെന്ന് പരമ്പരാഗതമായി ഉപയോഗിച്ചുവരുന്നു. പ്രത്യേകിച്ച് ഇഞ്ചിപ്പുല്ലിന്റെ സുഗന്ധമുള്ള എണ്ണ ചില കൊതുകുകൾ, ഈച്ചകൾ തുടങ്ങിയ കീടങ്ങളെ അകറ്റാൻ ഉപയോഗിക്കാറുണ്ട്.

ഇതിലെ citral, citronellal തുടങ്ങിയ സുഗന്ധഘടകങ്ങൾക്ക് ചില കീടങ്ങളെ അകറ്റുന്ന പ്രവർത്തനം ലബോറട്ടറി പഠനങ്ങളിൽ കണ്ടെത്തിയിട്ടുണ്ട്. അതിനാൽ ഇഞ്ചിപ്പുല്ലെണ്ണ ചില പ്രകൃതിദത്ത insect-repellent ഉൽപ്പന്നങ്ങളിലും ഉപയോഗിക്കുന്നു..

സോപ്പുകളിലും ക്ലെൻസറുകളിലും

ഇതിന്റെ സുഗന്ധത്തിനൊപ്പം ചില സൂക്ഷ്മജീവികൾക്കെതിരായ പ്രവർത്തനവും പഠിക്കപ്പെട്ടിട്ടുള്ളതിനാൽ, ഇഞ്ചിപ്പുല്ല് എണ്ണ വിവിധ സോപ്പുകളിലും ക്ലെൻസറുകളിലും personal-care ഉൽപ്പന്നങ്ങളിലും ഉപയോഗിക്കുന്നുണ്ട്.

വിറ്റാമിൻ Aയുടെ നിർമ്മാണവുമായി ബന്ധപ്പെട്ട്

നമ്മുടെ ഇഞ്ചിപ്പുല്ലിൽ, പ്രത്യേകിച്ച് കേരളത്തിൽ കൃഷി ചെയ്യുന്ന മലബാർ ഇഞ്ചിപ്പുല്ലിലെ (Cochin Lemongrass Oil) എണ്ണയിൽ 'സിട്രാൽ' (Citral) എന്ന ഘടകം വലിയ അളവിൽ അടങ്ങിയിട്ടുണ്ട്. ഫാർമസ്യൂട്ടിക്കൽ കമ്പനികൾ വലിയ ലാബുകളിലും ഫാക്ടറികളിലും വെച്ച് കൃത്രിമമായി വിറ്റാമിൻ എ നിർമ്മിച്ചെടുക്കാൻ ഉപയോഗിക്കുന്ന പ്രധാന അസംസ്കൃത വസ്തുവാണ് (Raw material) ഈ സിട്രാൽ. സിട്രാലിൽ നിന്ന് രാസപ്രക്രിയകളിലൂടെ 'അയണോൺ' (Ionone) എന്ന സംയുക്തം ഉണ്ടാക്കിയാണ് അവർ വിറ്റാമിൻ എ വികസിപ്പിച്ചെടുക്കുന്നത്. ലോകമെമ്പാടുമുള്ള മെഡിക്കൽ നിർമ്മാണ ശാലകളിലേക്ക് പുൽത്തൈലം കയറ്റി അയച്ചിരുന്നതിൽ വലിയൊരു പങ്ക് ഇത്തരം ആവശ്യങ്ങൾക്കായിരുന്നു.ഇവിടെ ഒരു കാര്യം നമ്മൾ വളരെ വ്യക്തമായി മനസ്സിലാക്കണം. ഇഞ്ചിപ്പുല്ല് വെറുതെ ചായയിട്ട് കുടിച്ചതുകൊണ്ട് ഒരാളുടെ ശരീരത്തിലെ വിറ്റാമിൻ എ കുറവ് പരിഹരിക്കപ്പെടില്ല.

 വീട്ടുവളപ്പിൽ വളർത്താൻ

ഇഞ്ചിപ്പുല്ല് വലിയ പരിചരണം ആവശ്യമില്ലാതെ വളർത്താൻ കഴിയുന്ന സസ്യമാണ്. നല്ല സുഗന്ധമുള്ളതിനാൽ വീട്ടുവളപ്പിലും അടുക്കളത്തോട്ടത്തിലും വളർത്താം. ആവശ്യത്തിന് ഇല മുറിച്ചെടുത്ത് ചായയ്ക്കും പാചകത്തിനും ഉപയോഗിക്കുകയും ചെയ്യാം.

പ്രാദേശിക നാമങ്ങൾ :

മലയാളം: ഇഞ്ചിപ്പുല്ല്, വാസനപ്പുല്ല്, നാരങ്ങാപ്പുല്ല്, പുൽത്തൈലപ്പുല്ല് ,ചുക്കുനാരിപ്പുല്ല് ,തെരുവപ്പുല്ല് ,തൈലപ്പുല്ല് ,വേവ്വപ്പുല്ല് , മലബാർ ഗ്രാസ്

ഇംഗ്ലീഷ്: Lemongrass, Fever grass, Malabar grass, Cochin grass, Citronella grass

സംസ്കൃതം: ഭൂതൃണം (Bhutrina), ഭൂസ്തൃണം (Bhustrina), സുഗന്ധതൃണം (Sugandhatrina), അതിഗന്ധ (Atigandha), ഛത്രം (Chatra)

ഹിന്ദി: നിംബു ഘാസ് (Nimbu ghas), ഹരീ ചായ് (Hari chai), ഗന്ധതൃൺ (Gandhatrin), അഗ്യാ ഘാസ് (Agyaghas)

തമിഴ്: എലുമിച്ചൈ പുല്ല് (Elumichai pullu), വസനൈ പുല്ല് (Vasanai pullu), കർപ്പൂരപ്പുല്ല് (Karpoorapullu)

തെലുങ്ക്: നിമ്മ ഗഡ്ഡി (Nimmagaddi), വാസന ഗഡ്ഡി (Vasana gaddi)

കന്നഡ: മജ്ജിഗെ ഹുല്ലു (Majjige hullu), നിംബെ ഹുല്ലു (Nimbe hullu), പുരാഹരി ഹുല്ലു (Purahari hullu)

മറാഠി: ഹിർവാ ചഹാ (Hirva chaha), ഒലാ ചഹാ (Ola chaha), ഗവതി ചഹാ (Gawati chaha)

ഗുജറാത്തി: ലീലീ ചാ (Lili cha)

ബംഗാളി: ഗന്ധബേന (Gandhabena), ലെബു ഘാസ് (Lebu ghas)

അറബിക്: ഇദ്ഖിർ (Izkhir / Idkhir)

ഇഞ്ചിപ്പുല്ലിന്റെ ഔഷധ പ്രയോഗങ്ങൾ എന്തൊക്കെയാണ്?

ഇഞ്ചിപ്പുല്ല് വെറുതെ നല്ല മണമുള്ള ഒരു പുല്ല് മാത്രമല്ല. നമ്മുടെ നാട്ടിൽ പണ്ടുമുതൽ തന്നെ ഇതിന്റെ ഇലയും സുഗന്ധതൈലവും പല ആവശ്യങ്ങൾക്കും ഉപയോഗിച്ചുവരുന്നുണ്ട്. ആയുർവേദ നിഘണ്ടുക്കളിൽ ഭൂതൃണം, ഭൂസ്തൃണം തുടങ്ങിയ പേരുകളിൽ ഇതിന്റെ ഗുണങ്ങളും ചില പരമ്പരാഗത പ്രയോഗങ്ങളും വിവരിക്കുന്നുണ്ട്.

നാട്ടുവൈദ്യപരമ്പരയിൽ ഇഞ്ചിപ്പുല്ല് വിവിധ ആരോഗ്യപ്രശ്നങ്ങൾക്കായി ഉപയോഗിച്ചിരുന്നതായി പറയപ്പെടുന്നു. ചുമ, പനി, ശ്വാസകോശവുമായി ബന്ധപ്പെട്ട ചില അസ്വസ്ഥതകൾ, വീക്കം, മോണയുടെ അസ്വസ്ഥതകൾ തുടങ്ങിയവയ്ക്കായി ഇതിന്റെ വിവിധ ഭാഗങ്ങൾ ഉപയോഗിച്ചിരുന്നുവെന്ന് പരമ്പരാഗത രേഖകളിൽ കാണാം.

ചില നാടൻ ചികിത്സാരീതികളിൽ ക്ഷയം (Tuberculosis), കുഷ്ഠം (Leprosy), ഫൈലേറിയ (Filariasis), മലേറിയ, കണ്ണിലെ വീക്കം, ന്യൂമോണിയ, രക്തക്കുഴലുകളുമായി ബന്ധപ്പെട്ട ചില പ്രശ്നങ്ങൾ എന്നിവയ്ക്കും ഇഞ്ചിപ്പുല്ല് ഉപയോഗിച്ചിരുന്നതായി രേഖപ്പെടുത്തിയിട്ടുണ്ട്.

ലെമൺഗ്രാസ് ഓയിൽ അഥവാ പുൽത്തൈലത്തെക്കുറിച്ച് പറയുമ്പോൾ ആദ്യംതന്നെ മനസ്സിൽ വെക്കേണ്ട വളരെ പ്രധാനപ്പെട്ട ഒരു കാര്യമുണ്ട്. നമ്മൾ ചായ തിളപ്പിക്കാൻ ഉപയോഗിക്കുന്ന ഇലയുടെ സ്വാഭാവമല്ല ഇതിന്റെ തൈലത്തിനുള്ളത്. പുൽത്തൈലം വളരെ വീര്യമേറിയ ഒന്നായതുകൊണ്ട് ഇത് ഒരിക്കലും നേരെ കുടിക്കാനോ ഉള്ളിലേക്ക് കഴിക്കാനോ പാടില്ല. അത് ആമാശയത്തിലെ ആവരണങ്ങൾക്ക് ഗുരുതരമായ പൊള്ളലും ആന്തരിക പ്രശ്നങ്ങളും ഉണ്ടാക്കും. എണ്ണ ഉപയോഗിക്കുമ്പോൾ മണത്തുനോക്കാനോ (Aromatherapy), അല്ലെങ്കിൽ മറ്റേതെങ്കിലും എണ്ണയിൽ കലർത്തി പുറത്ത് പുരട്ടാനോ മാത്രമാണ് സുരക്ഷിതം. ഉള്ളിൽ കഴിക്കാൻ ഇലയിട്ട് തിളപ്പിച്ച നേർത്ത ചായയാണ് ഉപയോഗിക്കേണ്ടത്.

ദഹനവും മനംപിരട്ടലും

യാത്ര ചെയ്യുമ്പോഴോ ദഹനക്കേട് മൂലമോ വല്ലാത്തൊരു മനംപിരട്ടൽ തോന്നുമ്പോൾ ലെമൺഗ്രാസ് ഓയിലിന്റെ നേർത്ത സുഗന്ധം ശ്വസിക്കുന്നത് തലച്ചോറിലെ നാഡികളെ ശാന്തമാക്കാൻ സഹായിക്കും. ഒരു തൂവാലയിൽ ഒന്നോ രണ്ടോ തുള്ളി എണ്ണ ഒഴിച്ച് മണത്തുനോക്കുന്നത് ഛർദ്ദിക്കാനുള്ള തോന്നലിന് പെട്ടെന്ന് അയവുണ്ടാക്കും. വയറ്റിൽ ഗ്യാസ് കെട്ടിനിന്ന് അസ്വസ്ഥത തോന്നുമ്പോൾ ഇഞ്ചിപ്പുല്ലിന്റെ ഇലയിട്ട് തിളപ്പിച്ച നേർത്ത ചായ കുടിക്കുന്നത് കുടലിന്റെ ചലനങ്ങളെ സഹായിക്കുമെങ്കിലും, അൾസറോ വിട്ടുമാറാത്ത ഗ്യാസ്ട്രൈറ്റിസോ ഉള്ളവർക്ക് ഇതൊരു ചികിത്സയല്ല.

ആർത്തവ സംബന്ധമായ ബുദ്ധിമുട്ടുകൾ

ആർത്തവസമയത്ത് അടിവയറ്റിൽ വരുന്ന കഠിനമായ വേദനയ്ക്കും പേശിവലിവിനും (Period Cramps) ആശ്വാസം കിട്ടാൻ ഈ തൈലം പുറമേ ഉപയോഗിക്കുന്നത് സഹായിക്കാറുണ്ട്. മൂന്നോ നാലോ തുള്ളി ലെമൺഗ്രാസ് ഓയിൽ അല്പം വെളിച്ചെണ്ണയിലോ നല്ലെണ്ണയിലോ ചാലിച്ച് അടിവയറ്റിൽ പതുക്കെ മസാജ് ചെയ്യുന്നത് അവിടുത്തെ പേശികൾക്ക് അയവുനൽകാനും രക്തയോട്ടം സുഗമമാക്കാനും നല്ലതാണ്.

പരമ്പരാഗതമായി ആർത്തവചക്രം ക്രമീകരിക്കാനും രക്തസ്രാവം കൃത്യമാക്കാനും ഇത് സഹായകരമാണെന്ന് പറയാറുണ്ട്. എന്നാൽ ഇതിന് പിന്നിൽ വലിയൊരു സുരക്ഷാ മുന്നറിയിപ്പുണ്ട്. ഗർഭപാത്രത്തിലെ പേശികളെ ചുരുക്കാനും രക്തയോട്ടം കൂട്ടാനും ഇതിന് ശേഷിയുള്ളതുകൊണ്ട്, ഗർഭിണികൾ ഒരു കാരണവശാലും ലെമൺഗ്രാസ് ഓയിലോ ഇത് അടങ്ങിയ ഉൽപ്പന്നങ്ങളോ ഉപയോഗിക്കാൻ പാടില്ല. ഗർഭാവസ്ഥയിൽ ഇത് ഉപയോഗിക്കുന്നത് അലസിപ്പോകലിന് (Miscarriage) വരെ കാരണമായേക്കാം.

കൂടാതെ, പി.സി.ഒ.ഡി (PCOD), തൈറോയ്ഡ് തകരാറുകൾ, ഹോർമോൺ വ്യതിയാനങ്ങൾ തുടങ്ങിയ സങ്കീർണ്ണമായ പ്രശ്നങ്ങൾ മൂലമുണ്ടാകുന്ന ആർത്തവ തടസ്സങ്ങൾക്ക് സ്വയംചികിത്സയായി ഇതിനെ കാണരുത്. ഇതിനൊക്കെ ഗൈനക്കോളജിസ്റ്റിന്റെ കൃത്യമായ പരിശോധനയും ശാസ്ത്രീയ ചികിത്സയുമാണ് ആവശ്യം.

തലവേദനയും പിരിമുറുക്കവും

ദിവസത്തെ കഠിനമായ ജോലിക്ക് ശേഷമോ വെയിൽ കൊണ്ടോ ഉണ്ടാകുന്ന ടെൻഷൻ തലവേദനകൾക്ക് പുൽത്തൈലത്തിന്റെ നേർത്ത സുഗന്ധം നല്ലൊരു അയവുണ്ടാക്കും. കുറച്ച് വെളിച്ചെണ്ണയിൽ ഒരു തുള്ളി പുൽത്തൈലം ചാലിച്ച് നെറ്റിത്തടങ്ങളിലും കഴുത്തിന്റെ പിൻഭാഗത്തും പതുക്കെ തടവുന്നത് രക്തയോട്ടം സുഗമമാക്കാനും പേശികളുടെ വലിവും തലയിലെ ഭാരവും കുറയ്ക്കാനും സഹായിക്കും. എങ്കിലും മൈഗ്രേൻ പോലുള്ള സങ്കീർണ്ണമായ പ്രശ്നങ്ങൾക്ക് ഇതൊരു ശാശ്വത ചികിത്സയല്ല.

കഫക്കെട്ടിനും ജലദോഷത്തിനും ആവി പിടിക്കൽ

തണുപ്പോ മഴയോ കാരണം മൂക്കടപ്പും നെഞ്ചിൽ കഫക്കെട്ടും ഉണ്ടാകുമ്പോൾ നല്ല തിളച്ച വെള്ളത്തിൽ രണ്ടു മൂന്ന് ഇലകൾ ചതച്ചിട്ട് ആവി പിടിക്കുന്നത് ശ്വാസതടസ്സം മാറാൻ നല്ലൊരു മാർഗ്ഗമാണ്. ഇതിലെ ബാഷ്പശീലമുള്ള സുഗന്ധം ശ്വാസകോശ നാളികളിലെ തടസ്സങ്ങൾ മാറ്റി പെട്ടെന്ന് ശ്വാസമെടുക്കാൻ തുണയാകും.

വായ്നാറ്റവും അരുചിയും അകറ്റാൻ

ഇഞ്ചിപ്പുല്ലിട്ട് തിളപ്പിച്ചാറിയ വെള്ളം വെച്ച് വായ കൊപ്ലിക്കുന്നത് പ്രകൃതിദത്തമായ മൗത്ത് വാഷായി പ്രവർത്തിക്കും. ഭക്ഷണം കഴിച്ച ശേഷമുള്ള വായ്നാറ്റം മാറ്റാനും, വായിലെ ബാക്ടീരിയകളെ അകറ്റാനും, പനി വരുമ്പോഴുള്ള നാവിന്റെ കയ്പ് മാറ്റി സ്വാഭാവിക രുചി തിരികെ കിട്ടാനും ഇത് പ്രയോജനപ്പെടുന്നു.

പേശിവലിവും സന്ധിവേദനകളും

പേശികൾ കോച്ചിപ്പിടിക്കുന്ന അവസ്ഥയിലും (Muscle cramps & spasms), സന്ധികളിലെ കഠിനമായ നീർക്കെട്ടും വേദനയും (Rheumatic pain) അലട്ടുമ്പോഴും വെളിച്ചെണ്ണയിൽ നേർപ്പിച്ച പുൽത്തൈലം പുരട്ടി മസാജ് ചെയ്യുന്നത് നല്ലൊരു സ്വാഭാവിക മാർഗ്ഗമാണ്. ഇതിലെ മൈർസീൻ പോലുള്ള സംയുക്തങ്ങൾ ചർമ്മത്തിന് ഇളംചൂട് പകരുകയും, രക്തചംക്രമണം വർദ്ധിപ്പിച്ച് പേശികൾക്ക് വേഗത്തിൽ അയവുനൽകുകയും ചെയ്യും. 

അത്‌ലറ്റ്സ് ഫൂട്ടും വട്ടച്ചൊറിയും (Athlete's foot & Ringworm)

കാലിലെ വിരലുകളുടെ ഇടയിൽ ഈർപ്പം തങ്ങിനിന്ന് ഉണ്ടാകുന്ന പൂപ്പൽബാധയ്ക്കും (Athlete's foot), വട്ടച്ചൊറിക്കും (Ringworm) പരമ്പരാഗതമായി ആളുകൾ പുൽത്തൈലം ചേർത്ത് ഉപയോഗിക്കാറുണ്ട്. ഇതിലെ സിട്രാലിന് ഫംഗസുകളെ ചെറുക്കാനുള്ള കഴിവുണ്ടെന്നത് ശരിയാണെങ്കിലും, ചൊറിഞ്ഞു പൊട്ടിയ തൊലിപ്പുറത്ത് ഇത് പുരട്ടുന്നത് കടുത്ത പുകച്ചിലിനും അലർജിക്കും കാരണമായേക്കാം. 

വയറിലെ ഗ്യാസിനും ദഹനക്കേടിനും ഇഞ്ചിപ്പുല്ല് ചായ

കനത്ത ആഹാരം കഴിച്ചുകഴിഞ്ഞ് വയറ് വീർത്തുകെട്ടി നിൽക്കുകയോ ഗ്യാസ് കയറി അസ്വസ്ഥത തോന്നുകയോ ചെയ്യുമ്പോൾ ചെയ്യാൻ പറ്റിയ ഏറ്റവും സുരക്ഷിതമായ ഒരു നാടൻ വഴിയാണിത്. പലരും തെറ്റിദ്ധരിച്ച് ഇതിന്റെ വീര്യമേറിയ തൈലം വെള്ളത്തിൽ ഒഴിച്ച് കുടിക്കാൻ നോക്കാറുണ്ട്; അത് ആമാശയത്തിലെ ആവരണങ്ങളെ പൊള്ളിക്കുകയേ ഉള്ളൂ. പകരം പറമ്പിൽ നിൽക്കുന്ന ഒന്നോ രണ്ടോ ഇഞ്ചിപ്പുല്ലിന്റെ പച്ചില പറിച്ചെടുത്ത് വൃത്തിയായി കഴുകി ചതച്ചെടുക്കുകയാണ് വേണ്ടത്.

ഒരു വലിയ ഗ്ലാസ് വെള്ളത്തിൽ ഈ ഇലയിട്ട് രണ്ടോ മൂന്നോ മിനിറ്റ് തിളപ്പിക്കുക. വെള്ളത്തിന് നേരിയ മഞ്ഞനിറവും ഇളം നാരങ്ങാ മണവും വരുമ്പോൾ തീ ഓഫ് ചെയ്ത് അരിച്ചെടുക്കാം. ഈ ഇളംചൂടുള്ള ചായ സാവധാനം കുടിക്കുന്നത് കുടലിലെ ചലനങ്ങളെ വേഗത്തിലാക്കാനും, കെട്ടിക്കിടക്കുന്ന ഗ്യാസ് പുറന്തള്ളി വയറിലെ കനപ്പ് മാറ്റാനും സഹായിക്കും. ദഹനം കുറച്ചുകൂടി എളുപ്പമാക്കാൻ വേണമെങ്കിൽ ഇല തിളപ്പിക്കുമ്പോൾ ഒരു നുള്ള് ജീരകമോ ചെറിയൊരു കഷ്ണം ചതച്ച ഇഞ്ചിയോ കൂടി ഇതിനൊപ്പം ചേർക്കാവുന്നതാണ്.

പേൻശല്യം ഇല്ലാതാക്കാൻ 

തലയിലെ പേൻശല്യം ഒഴിവാക്കാൻ വെളിച്ചെണ്ണയിൽ ഏതാനും തുള്ളി പുൽത്തൈലം ചേർത്ത് തലയോട്ടിയിൽ തേച്ചുപിടിപ്പിക്കുന്നത് ഒരു പരിധി വരെ പ്രാണികളെ തുരത്താൻ സഹായിച്ചേക്കാം.

കൊതുകിനെയും പ്രാണികളെയും തുരത്താൻ

ഇഞ്ചിപ്പുല്ലിലെ സിട്രാൽ ഗന്ധം പ്രാണികൾക്കും കൊതുകുകൾക്കും തീരെ ഇഷ്ടമല്ല. ഉണങ്ങിയ ഇലകൾ സാമ്പ്രാണിക്കൊപ്പം ചേർത്ത് പുകയ്ക്കുകയോ, ഇലകൾ ചതച്ച് ജനലരികിൽ വെക്കുകയോ ചെയ്താൽ കൊതുകുശല്യം നല്ലൊരു പരിധി വരെ കുറയ്ക്കാം. ഇതിന്റെ തൈലം വെള്ളത്തിൽ നേർപ്പിച്ച് സ്പ്രേ ചെയ്യുന്നത് ഈച്ചയും ഉറുമ്പും വരുന്നത് തടയും.

തറ തുടയ്ക്കാനും വീട് ഫ്രഷ് ആക്കാനും

വീട് മോപ്പ് ചെയ്യുമ്പോൾ വെള്ളത്തിൽ രണ്ടു തുള്ളി ലെമൺഗ്രാസ് ഓയിൽ ചേർത്താൽ വീടിനകത്തെ അഴുക്കുഗന്ധം മാറി എപ്പോഴും നല്ലൊരു ഉന്മേഷം നിറഞ്ഞുനിൽക്കും. കെമിക്കൽ സ്പ്രേകൾക്ക് പകരം റൂം ഡിഫ്യൂസറുകളിൽ ഈ എണ്ണ ഒഴിച്ചുവെക്കുന്നത് ദിവസത്തെ ക്ഷീണം മാറ്റി മനസ്സിന് നല്ല ശാന്തത നൽകും.

മലേറിയ പനിയിൽ ഉപയോഗം

ഇംഗ്ലീഷിൽ ഇഞ്ചിപ്പുല്ലിനെ 'ഫീവർ ഗ്രാസ്' (Fever grass) എന്ന് വിളിക്കാറുണ്ട്. ആഫ്രിക്കൻ രാജ്യങ്ങളിലും ലാറ്റിൻ അമേരിക്കയിലും നമ്മുടെ നാട്ടിലെ ചില നാട്ടുചികിത്സകളിലും മലമ്പനി (Malaria) വരുമ്പോൾ ഇഞ്ചിപ്പുല്ല് തിളപ്പിച്ച വെള്ളം കൊടുക്കുന്ന ഒരു രീതി പണ്ടുകാലത്തുണ്ടായിരുന്നു.

പണ്ടുകാലത്ത് ആളുകൾ ഇത് മലമ്പനിക്ക് കൊടുത്തതിന് പിന്നിൽ ലളിതമായ ഒരു കാരണമുണ്ട്. മലമ്പനി വരുമ്പോൾ കഠിനമായ കുളിരും വിറയലും ഉയർന്ന പനിയും വരാറുണ്ട്. ആ സമയത്ത് നല്ല ചൂടുള്ള ഇഞ്ചിപ്പുല്ല് ചായ കുടിക്കുമ്പോൾ ശരീരം നന്നായി വിയർക്കുകയും, പനിയുടെ ചൂടിന് താൽക്കാലികമായി ചെറിയൊരു അയവ് തോന്നുകയും ചെയ്യും.

ഇഞ്ചിപ്പുല്ലിലെ ചില ഘടകങ്ങൾക്ക് Plasmodium പരാന്നജീവികൾക്കെതിരെ ലബോറട്ടറി പഠനങ്ങളിൽ പ്രവർത്തനം കാണിച്ചിട്ടുണ്ടെങ്കിലും, മലേറിയയെ ചികിത്സിക്കാൻ ഇഞ്ചിപ്പുല്ല് മാത്രം മതിയെന്ന് തെളിയിച്ചിട്ടില്ല.

അതുകൊണ്ട് മലേറിയ സംശയിക്കുന്ന സാഹചര്യത്തിൽ പനി കുറയ്ക്കാൻ ഇഞ്ചിപ്പുല്ല് കഷായമോ ചായയോ മാത്രം ആശ്രയിക്കരുത്. പരിശോധനയും ആവശ്യമായ ആന്റിമലേറിയൽ ചികിത്സയും ഡോക്ടറുടെ നിർദേശപ്രകാരം തന്നെ സ്വീകരിക്കണം.

കടുത്ത തലവേദനയും പനിയും ഉള്ളപ്പോൾ

ചില പരമ്പരാഗത നാട്ടുവൈദ്യ രീതികളിൽ കടുത്ത തലവേദനയും പനിയും അനുഭവപ്പെടുമ്പോൾ ഉണക്കിയ ഇഞ്ചിപ്പുല്ലിന്റെ ഇലകൾ ചൂടുവെള്ളത്തിൽ ഇട്ട് കുറച്ചുനേരം വച്ച ശേഷം അരിച്ചെടുത്ത വെള്ളം കുളിക്കാൻ ഉപയോഗിച്ചിരുന്നതായി പറയപ്പെടുന്നു.

ഇത്തരത്തിൽ തയ്യാറാക്കിയ സുഗന്ധമുള്ള വെള്ളത്തിൽ കുളിക്കുന്നത് ശരീരത്തിന് ഒരു ഉന്മേഷവും ആശ്വാസവും നൽകാൻ സഹായിക്കുമെന്നതാണ് ഈ പരമ്പരാഗത പ്രയോഗത്തിന്റെ ആശയം. പ്രത്യേകിച്ച് ഇഞ്ചിപ്പുല്ലിന്റെ സുഗന്ധം മനസ്സിന് ശാന്തത നൽകാനും ശരീരത്തിലെ ക്ഷീണം കുറയ്ക്കാനും സഹായിക്കുമെന്ന വിശ്വാസമുണ്ട്.

ഈ വെള്ളം കൊണ്ട് കുളിക്കുമ്പോൾ കണ്ണിലേക്ക് ഒഴിക്കാതിരിക്കാൻ ശ്രദ്ധിക്കണം. ഇഞ്ചിപ്പുല്ലിലെ ഘടകങ്ങൾ കണ്ണിന് അസ്വസ്ഥതയും പുകച്ചിലും ഉണ്ടാക്കാൻ സാധ്യതയുള്ളതുകൊണ്ട് തലയൊഴിയാതെ കഴുത്തിന് താഴേക്ക് കുളിക്കുന്നതാണ് നല്ലത്.

പേശീവേദനയ്ക്കുള്ള തൈലക്കൂട്ട്

ശരീരത്തിൽ കഴപ്പോ പേശികളിൽ വിട്ടുമാറാത്ത വേദനയോ ഉണ്ടാകുമ്പോൾ നല്ലെണ്ണയിലോ വെളിച്ചെണ്ണയിലോ ഇതിന്റെ കുറച്ചു തുള്ളി എണ്ണ ചാലിച്ച് പുരട്ടി തടവുന്നത് പേശികൾക്ക് നല്ലൊരു അയവും ആശ്വാസവും നൽകും.

ഇഞ്ചിപ്പുല്ല് ഉപയോഗിക്കുമ്പോൾ ഇതിന്റെ ചൂടുണ്ടാക്കാനുള്ള സ്വഭാവം ശ്രദ്ധിക്കണം. അതുകൊണ്ട് കടുത്ത അസിഡിറ്റിയോ അൾസറോ ഉള്ളവരും ഗർഭിണികളും ഇത് ഉള്ളിലേക്ക് അമിതമായി കഴിക്കുന്നത് ഒഴിവാക്കണം. തൊലിപ്പുറത്ത് എണ്ണ ഉപയോഗിക്കുമ്പോൾ നേരിട്ട് പുരട്ടാതെ വെളിച്ചെണ്ണയിലോ ഒലിവ് ഓയിലിലോ കലർത്തി മാത്രം പുരട്ടാനും ശ്രദ്ധിക്കണം .

നാഡികളെ ശാന്തമാക്കാനും പിരിമുറുക്കം കുറയ്ക്കാനും (Nerve Tonic & Sedative)

ഇഞ്ചിപ്പുല്ലിലെ ഘടകങ്ങൾക്ക് നാഡീവ്യൂഹത്തെ ശാന്തമാക്കാനുള്ള സ്വാഭാവിക ശേഷിയുണ്ട്. ദിവസത്തിന്റെ അവസാനമുണ്ടാകുന്ന കടുത്ത മാനസിക സമ്മർദ്ദവും അസ്വസ്ഥതയും അകറ്റാൻ ഒരു കപ്പ് ഇഞ്ചിപ്പുല്ല് ചായ കുടിക്കുന്നത് മനസ്സിനും ശരീരത്തിനും നല്ലൊരു റിലാക്സേഷൻ നൽകും. തലച്ചോറിന് തണുപ്പേകി സ്വാഭാവികമായ ഉറക്കത്തിലേക്ക് നയിക്കാൻ സഹായിക്കുന്ന നേരിയ സെഡേറ്റീവ് (Sedative) സ്വഭാവം ഇതിനുണ്ട്. എങ്കിലും ഉറക്കഗുളികകൾക്കോ കടുത്ത വിഷാദരോഗത്തിനുള്ള സൈക്യാട്രിക് മരുന്നുകൾക്കോ പകരമായി ഇതിനെ കാണരുത്; ടെൻഷൻ മാറ്റി ശരീരത്തിന് വിശ്രമം നൽകാനുള്ള ഒരു സപ്പോർട്ട് മാത്രമാണിത്.

വിയർപ്പ് വർദ്ധിപ്പിച്ച് പനിയുടെ അസ്വസ്ഥത കുറയ്ക്കൽ (Diaphoretic)

പനി വരുമ്പോൾ ശരീരം നന്നായി വിയർത്താൽ ശരീരോഷ്മാവും വേദനയും കുറയുന്നത് സാധാരണമാണ്. ആയുർവേദത്തിൽ 'സ്വേദനം' എന്ന് വിശേഷിപ്പിക്കുന്ന ഈ പ്രക്രിയയെ ത്വരിതപ്പെടുത്താൻ ഇഞ്ചിപ്പുല്ലിന് കഴിയും. ഇതിട്ട് തിളപ്പിച്ച ചൂടുവെള്ളമോ ചായയോ കുടിക്കുമ്പോൾ ചർമ്മത്തിലെ സുഷിരങ്ങൾ വഴി വിയർപ്പ് പുറന്തള്ളപ്പെടുകയും, പനിയോടനുബന്ധിച്ചുള്ള കഠിനമായ വിറയലും കഴപ്പും മാറി ശരീരത്തിന് പെട്ടെന്ന് അയവ് അനുഭവപ്പെടുകയും ചെയ്യും.

ശരീരത്തിലെ അമിത ജലാംശം പുറന്തള്ളൽ (Diuretic)

ശരീരത്തിൽ അടിഞ്ഞുകൂടുന്ന അമിതമായ നീർക്കെട്ടും മാലിന്യങ്ങളും മൂത്രത്തിലൂടെ പുറന്തള്ളാൻ പ്രേരിപ്പിക്കുന്ന ഡൈയൂററ്റിക് (Diuretic) ഗുണം ഇഞ്ചിപ്പുല്ലിനുണ്ട്. ശരീരത്തിലെ ഉപ്പിന്റെയും ജലാംശത്തിന്റെയും അളവ് ക്രമീകരിക്കാനും, വയറു വീർത്തുനിൽക്കുന്ന അവസ്ഥ ഒഴിവാക്കാനും ഇത് സഹായിക്കും. എന്നാൽ രക്തസമ്മർദ്ദത്തിനോ വൃക്കരോഗങ്ങൾക്കോ ഡോക്ടർമാർ നൽകുന്ന ഡൈയൂററ്റിക് മരുന്നുകൾക്ക് പകരമായി ഇത് ഉപയോഗിക്കരുത്. വൃക്കകളുടെ സ്വാഭാവിക ശുദ്ധീകരണ പ്രക്രിയയെ പിന്തുണയ്ക്കുന്ന ആരോഗ്യകരമായ ഒരു ഹെർബൽ പാനീയമായി മാത്രമേ ഇതിനെ കാണാവൂ.

ഇഞ്ചിപ്പുല്ല് ചായയുടെ പരമ്പരാഗത ഉപയോഗങ്ങൾ

മൂന്നോ നാലോ ഉണങ്ങിയ ഇഞ്ചിപ്പുല്ലിന്റെ ഇലയിട്ട് തിളപ്പിച്ചെടുക്കുന്ന നേർത്ത ചായയോ കഷായമോ പലവിധ ശാരീരിക അസ്വസ്ഥതകൾക്ക് പരമ്പരാഗതമായി ഉപയോഗിച്ചു വരുന്ന ഒന്നാണ്. ശാസ്ത്രീയമായി പറയുന്ന പല ഗുണങ്ങളും ഈയൊരു ലളിതമായ പാനീയത്തിൽ അടങ്ങിയിട്ടുണ്ട്.

വയറ്റിൽ ഗ്യാസ് കയറിയോ ആർത്തവസമയത്തോ ഉണ്ടാകുന്ന കോച്ചിപ്പിടുത്തത്തിനും പേശിവലിവിനും (Antispasmodic) ഈ ചൂടുചായ കുടിക്കുന്നത് പെട്ടെന്ന് അയവുനൽകും. ആമാശയത്തിലെയും കുടലിലെയും പേശികൾ വലിഞ്ഞുമുറുകുന്നത് തടഞ്ഞ് സ്വാഭാവിക അയവ് കൊണ്ടുവരാൻ ഇതിലെ ചൂടിനും ഘടകങ്ങൾക്കും കഴിയും.

ശരീരം മുഴുവൻ തല്ലിയൊടിച്ചതുപോലെയുള്ള വേദനകൾക്കും പേശികളിലെ നീർക്കെട്ടിനും (Analgesic & Anti-inflammatory) ഇത് നല്ലൊരു സ്വാഭാവിക ആശ്വാസമാണ്. കഠിനമായ ജോലി കഴിഞ്ഞോ വ്യായാമം കഴിഞ്ഞോ ഉണ്ടാകുന്ന ക്ഷീണവും തളർച്ചയും മാറ്റാൻ ഇതിലെ മൈർസീൻ പോലുള്ള ഘടകങ്ങൾ പേശികൾക്ക് സുഖം പകരും. 

പനി വരുമ്പോൾ ശരീരോഷ്മാവ് നിയന്ത്രിക്കാൻ (Antipyretic) പണ്ടുള്ളവർ ഇത് കൊടുക്കാറുണ്ട്. ഇഞ്ചിപ്പുല്ല് ചായ കുടിക്കുമ്പോൾ ശരീരം നന്നായി വിയർക്കുകയും, ആ വിയർപ്പിലൂടെ പനിയുടെ കാഠിന്യവും ചൂടും കുറഞ്ഞ് ശരീരത്തിന് പെട്ടെന്ന് കുളിർമ്മ തോന്നുകയും ചെയ്യും.

ശരീരത്തിൽ അടിഞ്ഞുകൂടുന്ന അമിത ജലാംശവും മാലിന്യങ്ങളും മൂത്രത്തിലൂടെ പുറന്തള്ളാൻ (Diuretic) ഇത് സഹായിക്കും. കൈകാലുകളിലോ വയറ്റിലോ നീർക്കെട്ട് തോന്നുമ്പോഴും, ശരീരത്തിലെ വിഷാംശങ്ങളെ പുറന്തള്ളാനും ഈ പാനീയം ഉത്തമമാണ്. 

ദിവസത്തിന്റെ അലച്ചിലുകൾക്ക് ശേഷം മനസ്സിനെ ശാന്തമാക്കാനും നല്ലൊരു ഉറക്കം കിട്ടാനും സഹായിക്കുന്ന സ്വാഭാവിക സെഡേറ്റീവ് (Sedative) ഗുണം ഇതിനുണ്ട്. രാത്രി കിടക്കുന്നതിന് മുൻപ് ഈ ചായ ഇളംചൂടോടെ കുടിക്കുന്നത് നാഡികളുടെ പിരിമുറുക്കം അയയ്ക്കാനും, അനാവശ്യമായ ചിന്തകൾ കുറച്ച് സ്വസ്ഥമായി ഉറങ്ങാനും മനസ്സിനെ ഒരുക്കും.

ഇഞ്ചിപ്പുല്ല് ചേരുവയുള്ള പ്രധാന ഔഷധങ്ങൾ

ഭൂസ്തൃണാദി കഷായം (Bhustrinadi Kwatha)

ആയുർവേദ ശാസ്ത്രഗ്രന്ഥങ്ങളിൽ പരാമർശിക്കുന്ന പരമ്പരാഗത കഷായക്കൂട്ടാണിത്.

ഇഞ്ചിപ്പുല്ലിനൊപ്പം ചുക്ക്, കുരുമുളക്, തിപ്പലി (ത്രികടു), തുളസി തുടങ്ങിയവ ചേർത്ത് തയ്യാറാക്കുന്ന ഈ കഷായം കടുത്ത കഫക്കെട്ട്, വിട്ടുമാറാത്ത ചുമ (കാസം), ശ്വാസതടസ്സം, കൃമിശല്യം എന്നിവയ്ക്ക് ശമനമായി നിർദ്ദേശിക്കാറുണ്ട്.

മൈയാക്സിൽ പെയിൻ റിലീഫ് ഓയിൽ (Myaxyl Pain Relief Oil)

പേശികളിലെ വലിവ്, ചെറിയ സന്ധിവേദന, കട്ടിപ്പ് തുടങ്ങിയ അസ്വസ്ഥതകളിൽ പുറമേ പുരട്ടി മസാജ് ചെയ്യാൻ ഉപയോഗിക്കുന്ന ഒരു ആയുർവേദ ലിനിമെന്റാണ് മൈയാക്സിൽ. ഇതിലടങ്ങിയിരിക്കുന്ന ഇഞ്ചിപ്പുൽത്തൈലം, നന്ദ്യാർവട്ടം, ദേവദാരു തുടങ്ങിയ ഔഷധചേരുവകൾ പേശികൾക്കും സന്ധികൾക്കും ആശ്വാസം നൽകുന്നതിനായി പരമ്പരാഗതമായി ഉപയോഗിക്കുന്നു.

മറ്റു ചില ഉപയോഗങ്ങൾ

തൊണ്ടയുമായി ബന്ധപ്പെട്ട ഉൽപ്പന്നങ്ങളിൽ:

ഇഞ്ചിപ്പുല്ലിലെ സുഗന്ധമുള്ള ഘടകങ്ങളും സത്തും ചില ഹെർബൽ സിറപ്പുകൾ, ഗാർഗിൾ മിശ്രിതങ്ങൾ തുടങ്ങിയവയിൽ ചേരുവയായി ഉപയോഗിക്കാറുണ്ട്. തൊണ്ടയിലെ അസ്വസ്ഥതയ്ക്ക് ആശ്വാസം നൽകുന്നതിനും ഫ്രഷ് അനുഭവം നൽകുന്നതിനുമാണ് ഇത്തരം ഉൽപ്പന്നങ്ങളിൽ ഇത് ഉപയോഗിക്കുന്നത്.

മൂക്കടപ്പിനും സുഗന്ധ ഇൻഹേലറുകളിലും:

ഇഞ്ചിപ്പുല്ലെണ്ണയുടെ ശക്തമായ സുഗന്ധം കാരണം നാച്ചുറൽ ഇൻഹേലറുകൾ, റോൾ-ഓണുകൾ, ബാഷ്പീകരണ ഉൽപ്പന്നങ്ങൾ എന്നിവയിലും ഇത് ഉപയോഗിക്കുന്നു. സുഗന്ധം ശ്വസിക്കുന്നത് മൂക്കടപ്പുള്ള സമയത്ത് താൽക്കാലികമായ ആശ്വാസാനുഭവം നൽകാം.

ധൂപന മിശ്രിതങ്ങളിലും കീടനിരോധക ഉൽപ്പന്നങ്ങളിലും:

ഇഞ്ചിപ്പുല്ലിന്റെ ഉണങ്ങിയ ഇലകളും സുഗന്ധമുള്ള എണ്ണയും ചില ധൂപന മിശ്രിതങ്ങളിലും പ്രകൃതിദത്ത കീടനിരോധക ഉൽപ്പന്നങ്ങളിലും ഉപയോഗിക്കാറുണ്ട്. ഇതിന്റെ ശക്തമായ സുഗന്ധം ചില കീടങ്ങളെ അകറ്റാൻ സഹായിക്കുന്നതിനാലാണ് ഇത്തരം ഉപയോഗങ്ങൾ.

കൊതുക് പ്രതിരോധത്തിനായി ഉപയോഗിക്കുന്ന ഹെർബൽ സ്പ്രേകൾ, ലോഷനുകൾ തുടങ്ങിയവയിലും ഇഞ്ചിപ്പുല്ലെണ്ണ ഒരു ചേരുവയായി കാണാം.

 ⚠️ സുപ്രധാന മുന്നറിയിപ്പ് (Disclaimer)

ഈ ലേഖനത്തിൽ നൽകിയിരിക്കുന്ന വിവരങ്ങൾ ആയുർവേദ ഗ്രന്ഥങ്ങൾ, ഔഷധസസ്യങ്ങളെക്കുറിച്ചുള്ള പഠനങ്ങൾ, കേരളത്തിലെ പാരമ്പര്യ അറിവുകൾ എന്നിവയെ അടിസ്ഥാനമാക്കി തയ്യാറാക്കിയതാണ്. ഓരോ ഔഷധസസ്യത്തിന്റെയും ഗുണങ്ങൾ, പരമ്പരാഗത ഉപയോഗങ്ങൾ, വിവിധ ആയുർവേദ ഔഷധങ്ങളിൽ അവയുടെ പങ്ക് എന്നിവയെക്കുറിച്ചുള്ള പൊതുവായ അറിവുകൾ പങ്കുവെക്കുക എന്നതാണ് ഈ ലേഖനത്തിന്റെ ഉദ്ദേശ്യം.

ഇവിടെ നൽകിയിരിക്കുന്ന വിവരങ്ങൾ സ്വയം ചികിത്സ നടത്താനുള്ള മാർഗനിർദേശമല്ല. ഒരേ രോഗത്തിന് പോലും ഓരോ വ്യക്തിയുടെയും ശരീരപ്രകൃതി, പ്രായം, ആരോഗ്യസ്ഥിതി, രോഗത്തിന്റെ തീവ്രത എന്നിവ അനുസരിച്ച് ചികിത്സാരീതി മാറാം. അതുകൊണ്ട് ഒരു  ആയുർവേദ ഡോക്ടറുടെ നിർദേശമില്ലാതെ ഈ ലേഖനത്തിലെ വിവരങ്ങൾ മാത്രം അടിസ്ഥാനമാക്കി ഔഷധങ്ങൾ ഉപയോഗിക്കരുത്.

സ്വയം ചികിത്സ ചിലപ്പോൾ ആരോഗ്യത്തിന് ഗുരുതരമായ പ്രശ്നങ്ങൾ ഉണ്ടാക്കാൻ ഇടയാക്കും. അതിനാൽ എന്തെങ്കിലും ആരോഗ്യപ്രശ്നങ്ങൾ ഉണ്ടെങ്കിൽ, അംഗീകൃത ആയുർവേദ ഡോക്ടറുടെയോ മറ്റ് ആരോഗ്യവിദഗ്ധരുടെയോ നിർദേശം തേടുന്നതാണ് ഏറ്റവും സുരക്ഷിതം.

ഈ ലേഖനത്തിലെ വിവരങ്ങൾ ഒരു കാരണവശാലും പ്രൊഫഷണൽ വൈദ്യോപദേശത്തിനോ രോഗനിർണയത്തിനോ ചികിത്സയ്ക്കോ പകരമല്ല.

📢 വില്ലേജ് ടിപ്‌സിനൊപ്പം ചേരാം

ഔഷധസസ്യങ്ങൾ, കൃഷി, ആരോഗ്യം, നാട്ടറിവുകൾ എന്നിവയെക്കുറിച്ചുള്ള പുതിയ ലേഖനങ്ങൾ ലഭിക്കാൻ Village Tips കമ്മ്യൂണിറ്റിയിൽ അംഗമാകൂ.

📱 WhatsApp

📢 Telegram

💬 ആറാട്ടായ് (Arattai)

© പകർപ്പവകാശ അറിയിപ്പ് (Copyright Notice)

ഈ ബ്ലോഗിൽ പ്രസിദ്ധീകരിക്കുന്ന ലേഖനങ്ങൾ എന്റെ പഠനം, ഗവേഷണം, ഗ്രന്ഥപരിശോധന, എഴുത്ത് എന്നിവയ്ക്കായി ചെലവഴിച്ച സമയത്തിന്റെയും പരിശ്രമത്തിന്റെയും ഫലമാണ്.

✅ ഷെയർ ചെയ്യാം

ഈ ലേഖനത്തിന്റെ ലിങ്ക് (URL) വാട്‌സ്ആപ്പ്, ഫേസ്ബുക്ക്, ടെലഗ്രാം, മറ്റ് സോഷ്യൽ മീഡിയ പ്ലാറ്റ്ഫോമുകൾ എന്നിവയിൽ ഷെയർ ചെയ്യുന്നതിനെ ഞാൻ സന്തോഷപൂർവം സ്വാഗതം ചെയ്യുന്നു.

🚫 ഉള്ളടക്കം പകർത്തരുത്

ഈ ലേഖനത്തിലെ ഉള്ളടക്കം മുഴുവനായോ ഭാഗികമായോ എന്റെ അനുമതിയില്ലാതെ മറ്റേതെങ്കിലും വെബ്സൈറ്റിലോ ബ്ലോഗിലോ സോഷ്യൽ മീഡിയ പേജുകളിലോ യൂട്യൂബ് സ്ക്രിപ്റ്റായോ ഇ-ബുക്കായോ അച്ചടി പ്രസിദ്ധീകരണമായോ പുനഃപ്രസിദ്ധീകരിക്കുകയോ പകർത്തുകയോ ചെയ്യരുത്.

ലേഖനത്തിന്റെ ആശയം ഉപയോഗിക്കുകയോ വിവരങ്ങൾ പങ്കുവെക്കുകയോ ചെയ്യേണ്ടി വന്നാൽ, ഒറിജിനൽ ലേഖനത്തിന്റെ ലിങ്ക് നൽകുക. മറ്റുള്ളവരുടെ അറിവിനും പരിശ്രമത്തിനും അർഹമായ അംഗീകാരം നൽകുന്നത് നല്ലൊരു ഓൺലൈൻ സംസ്കാരത്തിന്റെ ഭാഗമാണ്.

എന്റെ പഠനവും പരിശ്രമവും മാനിക്കുകയും ഈ ബ്ലോഗിന്റെ വളർച്ചയ്ക്ക് പിന്തുണ നൽകുകയും ചെയ്യുന്ന എല്ലാ വായനക്കാർക്കും ഹൃദയം നിറഞ്ഞ നന്ദി. 🙏

© All Rights Reserved.