മുരിങ്ങ (Moringa oleifera) വെറുമൊരു സാധാരണ മരമല്ല; ഇത് 'അത്ഭുത മരം' (Miracle Tree) എന്നും 'ജീവിതത്തിന്റെ വൃക്ഷം' (Tree of Life) എന്നും അറിയപ്പെടുന്നു. ഇലകൾ മുതൽ വേരുകൾ വരെ ഔഷധഗുണങ്ങളാൽ സമ്പന്നമായ മുരിങ്ങയെ, ലോകമെമ്പാടുമുള്ള ആരോഗ്യ വിദഗ്ധർ ഒരു 'സൂപ്പർ ഫുഡ്' ആയാണ് കാണുന്നത്. പോഷകങ്ങളുടെ ഈ കലവറ നമ്മുടെ ശരീരത്തിന് നൽകുന്ന അത്ഭുത ഗുണങ്ങൾ നിരവധിയാണ് .ആയുർവേദ പ്രകാരം മുരിങ്ങ വാത കഫ ദോഷങ്ങളെ ശമിപ്പിക്കുന്നു .കണ്ണിന്റെ കാഴ്ച്ചശക്തി മെച്ചപ്പെടുത്തുന്നതിനും ലൈംഗീക ശേഷി വർധിപ്പിക്കുന്നതിനും മുരിങ്ങ ഉത്തമമാണ് .നിരവധി മരുന്നുകളിലും മുരിങ്ങ ഒരു ഘടകമാണ് ,മുരിങ്ങയുടെ ഇലകളും പൂക്കളും കായും വളരെ അധികം ആരോഗ്യ ഗുണങ്ങളുള്ളതാണ് .സംസ്കൃതത്തിൽ ശിഗ്രു എന്ന പേരിലാണ് മുരിങ്ങ പൊതുവെ അറിയപ്പെടുന്നത് .
Botanical name : Moringa oleifera .
Family : Moringaceae (Drumstick family).
Synonyms : Moringa zeylanica .
🌿 മുരിങ്ങയുടെ ആയുർവേദ ഗുണങ്ങൾ .
രുചിയും ദഹനശക്തിയും വർധിപ്പിക്കും .രക്തസമ്മർദം കുറയ്ക്കാൻ സഹായിക്കുന്നു .വാതരോഗങ്ങൾ ,നീര് ,വേദന എന്നിവയ്ക്കും നല്ലതാണ് .ശരീരത്തിലെ കൊഴുപ്പും പൊണ്ണത്തടിയും കുറയ്ക്കാൻ സഹായിക്കുന്നു .വയറിളക്കം ,വയറുവേദന ,വയറു വീർപ്പ് ,വയറ്റിലെ മുഴ എന്നിവയ്ക്കും നല്ലതാണ് .പുരുഷ ബീജങ്ങളുടെ എണ്ണം വർധിപ്പിക്കും .ഹൃദ്രോഗത്തിനും കരൾ പ്ലീഹ രോഗങ്ങൾക്കും നേത്രരോഗങ്ങൾക്കും നല്ലതാണ് .കണ്ണിന്റെ കാഴ്ച്ചശക്തി വർധിപ്പിക്കും .
രക്തം ശുദ്ധീകരിക്കും .ചർമ്മ രോഗങ്ങൾ,മുഖക്കുരു എന്നിവയ്ക്കും നല്ലതാണ് .കൃമിശല്യം ഇല്ലാതാക്കും .മുറിവുകൾ ,വ്രണം ,ചതവ് എന്നിവയ്ക്കും നല്ലതാണ് .വിഷശമന ശക്തിയുണ്ട് .പനി ,ചുമ ,ജലദോഷം ,കഫക്കെട്ട് ,ആസ്മ ,ബ്രോങ്കൈറ്റിസ്, തലവേദന എന്നിവയ്ക്കും നല്ലതാണ് .മൂത്രം വർധിപ്പിക്കും ,മൂത്രത്തിൽ കല്ലിനും നല്ലതാണ് .ആർത്തവപ്രശ്നങ്ങൾ ,അമിത ആർത്തവം ,ആർത്തവ വേദന എന്നിവയ്ക്കും നല്ലതാണ് .അപസ്മാരം ,ഉന്മാദം എന്നിവയ്ക്കും നല്ലതാണ് .തൊലി ഗർഭച്ഛിദ്രം ഉണ്ടാക്കും .മൂലക്കുരു ,മഞ്ഞപ്പിത്തം എന്നിവയ്ക്കും നല്ലതാണ് .ഗ്രന്ഥി വീക്കത്തിനും നല്ലതാണ് .
വിതരണം .
ഇന്ത്യയിൽ ഉടനീളം മുരിങ്ങ കൃഷി ചെയ്യുന്നുണ്ട്. പ്രത്യേകിച്ച്, തമിഴ്നാട്, ആന്ധ്രാപ്രദേശ്, കർണാടക, കേരളം തുടങ്ങിയ തെക്കേ ഇന്ത്യൻ സംസ്ഥാനങ്ങളിൽ മുരിങ്ങ ഒരു പ്രധാന കാർഷിക വിളയായും വീട്ടുപറമ്പുകളിലെ അവശ്യ സസ്യമായും വ്യാപകമായി കാണപ്പെടുന്നു.
സസ്യവിവരണം .
ശരാശരി 8 മീറ്റർ ഉയരത്തിൽ വരെ ശാഖോപശാഖകളായി വളരുന്ന ചെറിയ വൃക്ഷം .കാണ്ഡം ബലമില്ലാത്തതാണ് .തൊലിക്ക് പച്ചകലർന്ന ചാരനിറം .പൂക്കൾ വെളുത്ത നിറത്തിലും കുലകളായി ഉണ്ടാകുകയും ചെയ്യുന്നു .ആയുർവേദ ഗ്രന്ഥങ്ങളിൽ പൂക്കളുടെ നിറത്തെ അടിസ്ഥാനപ്പെടുത്തി വിവിധ ഇനം മുരിങ്ങകളെപ്പറ്റി പറയുന്നുണ്ട് .
🌿 മുരിങ്ങ (Moringa oleifera): ആയുർവേദത്തിലെ ഇനങ്ങൾ .
ആയുർവേദത്തിലെ പ്രമുഖ നിഘണ്ടു ഗ്രന്ഥങ്ങൾ മുരിങ്ങയെ (ശിഗ്രു) പ്രധാനമായും അതിന്റെ നിറത്തെയും ഗുണത്തെയും അടിസ്ഥാനമാക്കി വിവിധ ഇനങ്ങളായി തരംതിരിച്ചിരിക്കുന്നു.
ഭാവപ്രകാശ നിഘണ്ടു പ്രകാരമുള്ള 3 ഇനങ്ങൾ .
1 . ശ്യാമ (Shyama - കറുത്ത ഇനം): കറുപ്പ് നിറത്തോടുകൂടിയ മുരിങ്ങ ..
2 .ശ്വേത (Shveta - വെളുത്ത ഇനം): വെളുത്ത നിറത്തോടുകൂടിയ മുരിങ്ങ .
3 .രക്ത (Rakta - ചുവന്ന ഇനം): ചുവപ്പ് നിറത്തോടുകൂടിയ ഇനം .
രാജ നിഘണ്ടു പ്രകാരമുള്ള 4 ഇനങ്ങൾ .
1.ശിഗ്രു (Śigru): പൊതുവായ ഇനം..
2.നീല ശിഗ്രു (Nila Śigru): നീല നിറമുള്ള ഇനം.
3.ശ്വേത ശിഗ്രു (Shveta Śigru): വെളുത്ത ഇനം.
4.രക്ത ശിഗ്രു (Rakta Śigru): ചുവന്ന ഇനം.
ചുരുക്കത്തിൽ മുരിങ്ങയുടെ വിവിധ ഇനങ്ങളെ നിറത്തെയും ഗുണത്തെയും അടിസ്ഥാനമാക്കി ആയുർവേദത്തിൽ തരം തിരിച്ചിരിക്കുന്നു. ഇവയിൽ ശ്വേത ശിഗ്രു എന്ന ഇനമാണ് സാധാരണയായി ഔഷധാവശ്യങ്ങൾക്കും ഭക്ഷണത്തിനും ഉപയോഗിക്കുന്ന പ്രധാന ഇനം..
🌿 മുരിങ്ങയിലെ പ്രധാന രാസഘടകങ്ങൾ.
1. ഫൈറ്റോകെമിക്കൽസ് (ഔഷധഗുണമുള്ള സംയുക്തങ്ങൾ).
ഐസോതയോസയനേറ്റുകൾ (Isothiocyanates): മുരിങ്ങയിലെ ഏറ്റവും പ്രധാനപ്പെട്ട ഔഷധ സംയുക്തങ്ങളാണിവ. ഇതിന് വീക്കം കുറയ്ക്കുന്ന (Anti-inflammatory) ഗുണങ്ങളുണ്ട്.
പോളിഫെനോളുകൾ (Polyphenols): ക്വെർസെറ്റിൻ (Quercetin), കാമ്പ്ഫെറോൾ (Kaempferol), ക്ലോറോജെനിക് ആസിഡ് (Chlorogenic Acid).
ആൽക്കലോയിഡുകൾ (Alkaloids): മൊറിനജിൻ (Morinagine).
ഗ്ലൂക്കോസിനോലേറ്റുകൾ (Glucosinolates): മുരിങ്ങയുടെ എരിവുള്ള രുചിക്ക് കാരണമാകുന്നതും പല ഔഷധഗുണങ്ങൾക്കും സഹായിക്കുന്നതും ഇവയാണ്.
ഫീനോളിക് ആസിഡുകൾ (Phenolic Acids): ഓക്സിഡേഷൻ തടയാൻ സഹായിക്കുന്നു.
പ്രോട്ടീൻ: മുരിങ്ങയിലയിൽ ഉയർന്ന അളവിൽ പ്രോട്ടീനും അവശ്യ അമിനോ ആസിഡുകളും (Essential Amino Acids) അടങ്ങിയിരിക്കുന്നു.
വിറ്റാമിനുകൾ: വിറ്റാമിൻ C,വിറ്റാമിൻ A ,ബി-കോംപ്ലക്സ് വിറ്റാമിനുകൾ (B1, B2, B3).
ധാതുക്കൾ (Minerals):കാത്സ്യം (Calcium),ഇരുമ്പ് (Iron),പൊട്ടാസ്യം (Potassium),മഗ്നീഷ്യം (Magnesium),സിങ്ക് (Zinc).
മുരിങ്ങയുടെ ഈ രാസസംയുക്തങ്ങളുടെ സംയോജനമാണ് അതിനെ വാത രോഗങ്ങൾ, വീക്കം, പ്രതിരോധശേഷി കുറവ് തുടങ്ങിയ വിവിധ രോഗാവസ്ഥകളിൽ ഫലപ്രദമായ ഒരു ഔഷധമാക്കി മാറ്റുന്നത്.
പ്രാദേശികനാമങ്ങൾ .
മലയാളം - മുരിങ്ങ.
ഹിന്ദി - സഹ്ജൻ (Sahjan), മുന്ഗാ (Munga).
തമിഴ - മുരുങ്കൈ (Murungai).
തെലുങ്ക് - മുനഗകയ (Munagakaya).
കന്നഡ - നുഗ്ഗേകായി (Nuggekayi).
മറാത്തി - ഷെവ്ഗാ (Shevga).
ബംഗാളി - സജ്നെ (Sajne).
ഗുജറാത്തി - സഹ്ജൻ (Sahjan).
ഒറിയ - സജ്ന (Sajna).
🌿 മുരിങ്ങ (ശിഗ്രു): സംസ്കൃത പര്യായങ്ങൾ .
ശിഗ്രു (Śigru): ഇതാണ് ഏറ്റവും സാധാരണയായി ഉപയോഗിക്കുന്ന പേര്.ശക്തമായ ഔഷധഗുണം ഉള്ളതും വേഗത്തിൽ വളരുന്നത്' എന്നും അർത്ഥമാക്കുന്നു.
ശോഭഞ്ജന (Shobhanjana): ശുഭകരമായ വൃക്ഷം എന്ന്അർത്ഥമാക്കുന്നു .
ബഹുമൂല (Bahumula) :വൃക്ഷത്തിന് ധാരാളം വേരുകളുള്ളത് എന്ന് അർത്ഥമാക്കുന്നു .
ഘനച്ഛദ (Ghanachada):വൃക്ഷത്തിൽ ധാരാളം ഇലകൾ തിങ്ങിനിറഞ്ഞത് എന്ന് അർത്ഥമാക്കുന്നു .
മൂലകപർണ്ണി (Mulakaparni): ഇതിന്റെ ഇലകൾ മുള്ളങ്കിക്ക് സമാന ഗുണങ്ങളുള്ളത് എന്ന് അർത്ഥമാക്കുന്നു .
ഹരിതശാക (Harita saka ) : മുരിങ്ങയില പച്ചക്കറിയായി ഉപയോഗിക്കുന്നു എന്ന് അർത്ഥമാക്കുന്നു .
തീക്ഷ്ണഗന്ധ (Teekshnagandha): ശക്തമായതും എരിവുള്ളതുമായ ഗന്ധമുള്ളത് എന്ന് അർത്ഥമാക്കുന്നു .
അക്ഷീവ (Aksheeva): ലഹരിയുടെ ഫലങ്ങളെ ഇല്ലാതാക്കാൻ കഴിവുള്ളത് എന്ന് അർത്ഥമാക്കുന്നു .
മോചക (Mochaka): രോഗങ്ങൾ ഭേദമാക്കാൻ സഹായിക്കുന്നത്.
വിദ്രധിഘ്ന (Vidradhighna): പരുക്കൾ മാറ്റാൻ വളരെ ഉപയോഗപ്രദമായത് .
🌿 മുരിങ്ങയുടെ ഔഷധയോഗ്യമായ ഭാഗങ്ങൾ.
ഇല (Leaves - പത്രം): വൈറ്റമിനുകൾ, ധാതുക്കൾ, പ്രോട്ടീൻ, ആന്റി ഓക്സിഡന്റുകൾ എന്നിവയുടെ ഏറ്റവും വലിയ ഉറവിടം. പ്രമേഹം, കൊളസ്ട്രോൾ നിയന്ത്രണം, വീക്കം കുറയ്ക്കുന്നതിനും പോഷകാഹാരക്കുറവിനും ഉത്തമം.
കായ് (Pods - ഫലം): ഭക്ഷണമായും മരുന്നായും ഉപയോഗിക്കുന്നു. നാരുകൾ (Fibers), വിറ്റാമിൻ സി എന്നിവയാൽ സമ്പന്നമാണ്. സന്ധിവേദന, കരളിന്റെ ആരോഗ്യം എന്നിവയ്ക്ക് സഹായിക്കുന്നു.
വേര് (Root - മൂലം): വാതഹരമാണ്. കഷായങ്ങൾ, തൈലങ്ങൾ എന്നിവയിൽ ഉപയോഗിക്കുന്നു . സന്ധിവാതം, വേദന എന്നിവയ്ക്ക് ഉപയോഗപ്രദം .
തൊലി (Bark ): ദഹന സംബന്ധമായ പ്രശ്നങ്ങൾക്കും (dyspepsia), ചിലതരം വീക്കങ്ങൾക്കും വേദനകൾക്കും ഉപയോഗിക്കുന്നു .
വിത്ത് (Seeds - ബീജം): മുരിങ്ങ എണ്ണ (Ben Oil) ഉണ്ടാക്കാൻ ഉപയോഗിക്കുന്നു. എണ്ണയ്ക്ക് ആന്റിഓക്സിഡന്റ് ഗുണങ്ങളുണ്ട്. ചർമ്മരോഗങ്ങൾക്കും മുടിക്കും ഉത്തമം. വിത്തുകൾ വെള്ളം ശുദ്ധീകരിക്കാനും ഉപയോഗിക്കാറുണ്ട്
പൂവ് (Flowers - പുഷ്പം): സാധാരണയായി ഭക്ഷണത്തിലും ചില ഔഷധ പ്രയോഗങ്ങളിലും ഉപയോഗിക്കുന്നു. ഉയർന്ന അളവിൽ കാൽസ്യം, പൊട്ടാസ്യം എന്നിവ അടങ്ങിയിരിക്കുന്നു. ജലദോഷം, ചുമ എന്നിവയ്ക്ക് പ്രതിവിധിയായും ചായ ഉണ്ടാക്കാനും ഉപയോഗിക്കാറുണ്ട്.
രസാദിഗുണങ്ങൾ .
രസം -കടു ,കഷായം ,തിക്തം .
ഗുണം -ലഘു ,രൂക്ഷം , തീക്ഷ്ണം,സരം .
വീര്യം -ഉഷ്ണം .
വിപാകം -കടു .
📢 ശ്രദ്ധിക്കുക : ഔഷധസസ്യങ്ങളും അവയുടെ ഗുണങ്ങളും അവ ഏതെല്ലാം മരുന്നുകളിൽ ചേരുവയുണ്ടന്നും അവ ഏതെല്ലാം രോഗങ്ങൾക്ക് ഉപയോഗിക്കുന്നു എന്നും ഒരു ഏകദേശ വിവരണം മാത്രമാണ് ഇവിടെ നൽകിയിരിക്കുന്നത് .ഇത് അറിവിലേക്ക് മാത്രമുള്ളതാണ് .രോഗനിര്ണയം,ചികിത്സ എന്നിവ ഉദ്ദേശിച്ചുള്ളതല്ല .അതിനാൽ ഒരു ആയൂർവ്വേദ ഡോക്ടറുടെ നിർദേശമില്ലാതെ ഇവിടെ പറഞ്ഞിരിക്കുന്ന കാര്യങ്ങൾ നോക്കി സ്വയം ചികിൽത്സിക്കരുത് .
💊 മുരിങ്ങ (ശിഗ്രു) ചേർന്ന ചില ആയുർവേദ ഔഷധങ്ങൾ .
മുറിവെണ്ണ (Murivenna).
മുറിവെണ്ണ പ്രധാനമായും മുറിവുകൾ, വേദന, വീക്കം എന്നിവ ചികിത്സിക്കാൻ പുറമെ പുരട്ടാനാണ് ഉപയോഗിക്കുന്നത്.മുറിവുകൾ, ചതവുകൾ, ഉളുക്കുകൾ, പൊള്ളലുകൾ എന്നിവ വേഗത്തിൽ ഉണങ്ങാൻ സഹായിക്കുന്നു. ഇത് മുറിവിൽ അണുബാധ ഉണ്ടാകുന്നത് തടയാനും സഹായിക്കും ,പേശീ വേദന, സന്ധി വേദന, തലവേദന, കഴുത്ത് വേദന എന്നിവയ്ക്ക് ആശ്വാസം നൽകുന്നു.സന്ധികളിലും പേശികളിലുമുണ്ടാകുന്ന നീർക്കെട്ട് (വീക്കം) കുറയ്ക്കാൻ ഫലപ്രദമാണ്.ശരീരത്തിൽ ഉണ്ടാകുന്ന ക്ഷതങ്ങൾ, ഉളുക്കുകൾ, ചതവുകൾ, എല്ലുകൾക്ക് സ്ഥാനചലനം സംഭവിക്കാതെ ഉണ്ടാകുന്ന പരിക്കുകൾ (Closed Fractures) എന്നിവയ്ക്ക് മസാജ് ചെയ്യാൻ ഉപയോഗിക്കുന്നു. നാഡീ സംബന്ധമായ വേദനകൾ, നടുവേദന, കഴുത്തു വേദന, തോളിലെ വേദന എന്നിവയ്ക്ക് ചൂടോടെ പുറമെ പുരട്ടുന്നത് ആശ്വാസം നൽകും.
നിംബഹരിദ്രാദി ചൂർണം (Nimbaharidradi Churnam).
ചർമ്മരോഗങ്ങൾക്കും രക്തശുദ്ധിക്കും വേണ്ടി ഉപയോഗിക്കുന്ന ഒരു പ്രധാന ആയുർവേദ ചൂർണ്ണ (പൊടി രൂപത്തിലുള്ള ഔഷധം) യോഗമാണ് നിംബഹരിദ്രാദി ചൂർണം .രക്തത്തിലെ മാലിന്യങ്ങൾ നീക്കം ചെയ്യാനും രക്തം ശുദ്ധീകരിക്കാനും.ഉപയോഗിക്കുന്നു .ഇത് ചർമ്മരോഗങ്ങൾ വീണ്ടും വരുന്നത് തടയാൻ സഹായിക്കും.മരുന്നിന്റെ പേര് സൂചിപ്പിക്കുന്ന പോലെ നിംബ (Nimba): വേപ്പ് (Neem),ഹരിദ്ര (Haridra): മഞ്ഞൾ (Turmeric) എന്നിവയാണ് ഇതിലെ പ്രധാന ചേരുവ .കരപ്പൻ (Eczema), സോറിയാസിസ് (Psoriasis) പോലുള്ള വിട്ടുമാറാത്തതും ചൊറിച്ചിലുമുള്ള ചർമ്മ രോഗങ്ങൾ, ചർമ്മത്തിലെ ചൊറിച്ചിൽ ,ചർമ്മത്തിലോ ശരീരത്തിലോ ഉണ്ടാകുന്ന വീക്കവും നീർക്കെട്ടും ,ഉണങ്ങാത്ത വ്രണങ്ങൾ ,ശരീരം ചൊറിഞ്ഞു തടിക്കുന്ന അലർജി അവസ്ഥകൾ തുടങ്ങിയവയുടെ ചികിത്സയിൽ നിംബഹരിദ്രാദി ചൂർണം ഉപയോഗിക്കുന്നു .
യഷ്ടീമധുകാദി കേര തൈലം (Yashtimadhukadi Kera Tailam) .
ഈ തൈലം പ്രധാനമായും തല, മുടി, കണ്ണ്, ചർമ്മം എന്നിവിടങ്ങളിലെ പ്രശ്നങ്ങൾക്ക് ചികിത്സയായി ഉപയോഗിക്കുന്നു.പിത്ത ദോഷത്തെ ശമിപ്പിക്കാനും തണുപ്പ് നൽകാനും ഉപയോഗിക്കുന്ന ഒരു പുറമെ പുരട്ടാനുള്ള തൈലമാണ് .ചൊറി ,ചൊറിച്ചിൽ ,കരപ്പൻ മുതലായവയുടെ ചികിത്സയിൽ ഇത് ഉപയോഗിക്കുന്നു .തലയിലെ അമിതമായ ചൂട്, പിത്തം മൂലമുള്ള ചൊറിച്ചിൽ, തലയോട്ടിയിലെ എരിച്ചിൽ എന്നിവയ്ക്ക് ശമനം നൽകുന്നു. തലയിൽ തേച്ചു മസാജ് ചെയ്യുന്നത് മനസ്സിന് ശാന്തത നൽകാനും നല്ല ഉറക്കം ലഭിക്കാനും സഹായിക്കും. ചെറിയ മുറിവുകൾ, പൊള്ളലുകൾ എന്നിവയുടെ പാടുകൾ മാറ്റി വേഗത്തിൽ ഉണങ്ങാൻ സഹായിക്കുന്നു. ഇത് കണ്ണിന് വളരെ ഗുണകരമാണ്. ഈ തൈലം പതിവായി തലയിൽ തേച്ചു കുളിക്കുന്നത് കണ്ണിന് കുളിർമ നൽകാനും കാഴ്ച ശക്തി മെച്ചപ്പെടുത്താനും സഹായിക്കും.മുഖക്കുരു, മുഖത്തെ പാടുകൾ, കറുത്ത പാടുകൾ എന്നിവയുടെ ചികിത്സയ്ക്ക് ഉപയോഗിക്കാറുണ്ട്. ചർമ്മത്തിന് സ്വാഭാവികമായ തിളക്കവും നിറവും നൽകാൻ സഹായിക്കുന്നു.മരുന്നിന്റെ പേര് സൂചിപ്പിക്കുന്ന പോലെ യഷ്ടീമധു (Licorice / അതിമധുരം) പ്രധാന ചേരുവയായി, വെളിച്ചെണ്ണയിൽ (കേര തൈലം) കാച്ചി ഉണ്ടാക്കുന്ന ഒരു ആയുർവേദ ഔഷധ തൈലമാണ്.
ചന്ദ്രശൂരാദി കഷായം - Chandrasuradi Kashayam .
പ്രധാനമായും ആവർത്തിച്ചുള്ള വിരബാധയുടെ ചികിത്സയിൽ ചന്ദ്രശൂരാദി കഷായം ഉപയോഗിക്കുന്നു .
കൊട്ടംചുക്കാദി തൈലം - Kottamchukkadi Tailam .
പേരു സൂചിപ്പിക്കുന്നപോലെ കൊട്ടം (Kushta), ചുക്ക് (Shunti) എന്നിവ പ്രധാന ചേരുവകളായ ഈ തൈലം ശക്തമായ വാതഹരവും വേദന സംഹാരിയുമാണ് .സന്ധികളിലെ വേദന, വീക്കം (നീർക്കെട്ട് ,തരിപ്പ് ,കഴപ്പ് ,കടച്ചിൽ ,ശരീരത്തിലെ പേശികൾക്ക് ഉണ്ടാകുന്ന കടുപ്പം (Stiffness), വലിവ്, വേദന,കഴുത്തിന് ചുറ്റുമുള്ള വേദന, തോളെല്ല് വേദന (Frozen Shoulder), സെർവിക്കൽ സ്പോണ്ടിലൈറ്റിസ്, നടുവേദന (Low Back Pain) ഉൾപ്പെടെയുള്ള വാത സംബന്ധമായ വേദനകൾ തുടങ്ങിയവയുടെ ചികിത്സയിൽ ഇത് പുറമെ പുരട്ടുവാൻ ഉപയോഗിക്കുന്നു .
ചിഞ്ചാദി തൈലം (hinchadi Tailam ).
എല്ലാത്തരം സന്ധിവേദനകൾക്കും, പ്രത്യേകിച്ച് വാതം മൂലമുള്ള വേദനകൾ ,സന്ധികളിലും പേശികളിലും ഉണ്ടാകുന്ന വീക്കവും നീർക്കെട്ടും, പുറം വേദന, പേശികൾക്ക് ഉണ്ടാകുന്ന കടുപ്പം,പക്ഷാഘാതം,ഉളുക്ക് ,വേദന എന്നിവയുടെ ചികിത്സയിൽ ചിഞ്ചാദി തൈലം പുറമെ പുരട്ടുവാൻ ഉപയോഗിക്കുന്നു .പേരു സൂചിപ്പിക്കുന്ന പോലെ പുളിയില (ചിഞ്ച) ആണ് ഇതിലെ പ്രധാന ചേരുവ.പുളിയുടെ ഔഷധഗുണത്തെ പറ്റി മറ്റൊരു പോസ്റ്റിൽ എഴുതിയിട്ടുണ്ട് .അതുകൂടി വായിക്കാം .
സുദർശനാസവം (Sudarsanasavam).
ഈ ഔഷധം പ്രധാനമായും പനി, കരൾ രോഗങ്ങൾ, ദഹനക്കുറവ് എന്നിവയുടെ ചികിത്സയ്ക്കാണ് ഉപയോഗിക്കുന്നത്.എല്ലാത്തരം പനികൾക്കും, പ്രത്യേകിച്ച് ദീർഘനാളായി നീണ്ടുനിൽക്കുന്നതും, ഇടവിട്ടു വരുന്നതുമായ പനി, പനി പോലുള്ള രോഗങ്ങൾ മാറിയ ശേഷം ഉണ്ടാകുന്ന ക്ഷീണവും ബലക്കുറവും ,കരൾ രോഗങ്ങൾ ,വിശപ്പില്ലായ്മ, വയറുവീർപ്പ് തുടങ്ങിയവയുടെ ചികിത്സയിൽ സുദർശനാസവം ഉപയോഗിക്കുന്നു .
സാരസ്വത ഘൃതം(Saraswataghritam).
സാരസ്വത ഘൃതം എന്നത് ആയുർവേദത്തിലെ ഏറ്റവും പ്രസിദ്ധമായ മസ്തിഷ്ക പോഷക ഔഷധങ്ങളിൽ (Brain Tonic) ഒന്നാണ്. ഇത് പ്രധാനമായും ബുദ്ധിശക്തി വർദ്ധിപ്പിക്കാനും മാനസികാരോഗ്യം മെച്ചപ്പെടുത്താനുമാണ് ഉപയോഗിക്കുന്നത് .സാരസ്വത എന്ന പേര് വിദ്യാദേവതയായ സരസ്വതിയിൽ നിന്ന് വന്നതാണ്, ഇത് ബുദ്ധിശക്തിയുമായി ബന്ധപ്പെട്ട ഗുണങ്ങളെ സൂചിപ്പിക്കുന്നു .ഓർമ്മശക്തി (Memory), ഏകാഗ്രത (Concentration), ബുദ്ധിശക്തി (Intellect) എന്നിവ വർദ്ധിപ്പിക്കാൻ സഹായിക്കുന്നു. കുട്ടികളിൽ പഠനശേഷി മെച്ചപ്പെടുത്താൻ ഇത് ഉത്തമമാണ്.ഉത്കണ്ഠ (Anxiety), വിഷാദം (Depression), മാനസിക സമ്മർദ്ദം (Mental Stress) എന്നിവ കുറയ്ക്കാൻ സഹായിക്കുന്നു. മനസ്സിലെ പിരിമുറുക്കങ്ങൾ ലഘൂകരിക്കുന്നു.സംസാരശേഷി (Speech) മെച്ചപ്പെടുത്താനും സംസാര വൈകല്യങ്ങൾ (Speech Defects) പരിഹരിക്കാനും ഇത് ഉപയോഗിക്കാറുണ്ട്.തലച്ചോറിന് ആവശ്യമായ പോഷകങ്ങൾ നൽകി തലച്ചോറിൻ്റെ ആരോഗ്യം നിലനിർത്തുന്നു.അപസ്മാരം (Epilepsy) പോലുള്ള നാഡീ സംബന്ധമായ രോഗങ്ങളുടെ ചികിത്സയിൽലും ഇത് ഉപയോഗിക്കുന്നു .
മിശ്രകസ്നേഹം (Misrakasneham) .
വിട്ടുമാറാത്ത മലബന്ധം ,ഹെർണിയ ,വൃഷണവീക്കം തുടങ്ങിയവയുടെ ചികിത്സയിൽ ഉപയോഗിക്കുന്ന ഒരു ഔഷധ നെയ്യാണ് മിശ്രകസ്നേഹം .മിശ്രക എന്നാൽ കലർന്നത് എന്നാണർത്ഥം, സ്നേഹം എന്നാൽ നെയ്യ്, എണ്ണ ,അതായത്, നെയ്യ്, എണ്ണ ,പാൽ എന്നീ പല ചേരുവകളും ചേർത്ത ഒരു പ്രത്യേക ഔഷധക്കൂട്ട് ആണിത്.ഇതിൽ ആവണക്കെണ്ണ ഒരു ഘടകമാണ് .ശക്തമായ വിരേചന ഗുണമുള്ള ഒരു ഔഷധമാണിത് . ശരീരത്തിലെ വിഷവസ്തുക്കളെ അലിയിച്ച് ദഹനനാളത്തിലേക്ക് കൊണ്ടുവരാൻ വേണ്ടി ഇത് പഞ്ചകർമ്മ ചികിത്സയിലും ഉപയോഗിക്കുന്നു .ശരീരത്തിൽ ഉണ്ടാകുന്ന കുരുക്കൾ, നീർക്കെട്ടുകൾ ,വാതം മൂലമുണ്ടാകുന്ന സന്ധി വേദന, മരവിപ്പ്, പേശികളുടെ ബലക്കുറവ്, ശരീരത്തിൻ്റെ വരൾച്ച തുടങ്ങിയവയുടെ ചികിത്സയിലും ഇത് ഉപയോഗിക്കുന്നു .
നിർഗുണ്ഡ്യാദി കഷായം - Nirgundyadi Kashayam .
ദഹനസംബന്ധമായ രോഗങ്ങളുടെയും ശ്വാസകോശസംബന്ധമായ രോഗങ്ങളുടെയും വാത സംബന്ധമായ രോഗങ്ങളുടെയും ചികിത്സയിൽ ഉപയോഗിക്കുന്ന ഒരു ഔഷധമാണ് നിർഗുണ്ഡ്യാദി കഷായം .പേരു സൂചിപ്പിക്കുന്ന പോലെ കരിനൊച്ചി (Nirgundi - Vitex negundo) യാണ് ഇതിലെ പ്രധാന ചേരുവ .കരിനൊച്ചി ഒരു ശക്തമായ വാതഹരവും വീക്കം കുറയ്ക്കുന്ന ഔഷധവുമാണ്.സന്ധികളിൽ ഉണ്ടാകുന്ന കടുപ്പം (Stiffness), വേദന, നീർക്കെട്ട്,ആമവാതം ഉൾപ്പെടെയുള്ള വാത സംബന്ധമായ വേദനകൾ ,പനിയോടനുബന്ധിച്ച് ഉണ്ടാകുന്ന കഠിനമായ ശരീരവേദന, തലവേദന, വയറുവീർപ്പ്, ഗ്യാസ് സംബന്ധമായ പ്രശ്നങ്ങൾ,ജലദോഷം ,ചുമ തുടങ്ങിയവയുടെ ചികിത്സയിൽ ഈ ഔഷധം ഉപയോഗിക്കുന്നു .
ധനദനയനാദി കഷായം(Dhanadanayanadi kashayam).
ധനദനയനാദി കഷായംഎന്നത് ആയുർവേദത്തിലെ വളരെ പ്രധാനപ്പെട്ട ഒരു കഷായമാണ്. ഇത് ശക്തമായ വാതഹര ഗുണങ്ങളോടു കൂടിയതാണ് .ശിരസ്സ്, കഴുത്ത്, മുഖം എന്നിവിടങ്ങളിൽ വാതദോഷം വർദ്ധിക്കുന്നത് മൂലമുണ്ടാകുന്ന രോഗങ്ങളെ ചികിത്സിയിലാണ് ഇത് പ്രധാനമായും ഉപയോഗിക്കുന്നത് .മുഖപക്ഷാഘാതം (Bell's Palsy): മുഖത്തെ പേശികളെ ബാധിക്കുന്ന പക്ഷാഘാതം ചികിത്സിക്കാൻ ഇത് ഏറ്റവും കൂടുതൽ ഉപയോഗിക്കുന്നു. പൊതുവായ പക്ഷാഘാതത്തിൻ്റെ (ശരീരത്തിൻ്റെ ഒരു വശം തളർന്നു പോകുന്നത്) ചികിത്സയിലും ഇത് ഉപയോഗിക്കാറുണ്ട്.കഴുത്ത്, തോൾ, കൈകൾ എന്നിവിടങ്ങളിലെ പേശികളുടെയും സന്ധികളുടെയും കടുപ്പം ,തലയുടെയും കഴുത്തിൻ്റെയും ഭാഗങ്ങളിലുള്ള കഠിനമായ വാത വേദനകൾ തുടങ്ങിയവയുടെ ചികിത്സയിൽ ഈ ഔഷധം ഉപയോഗിക്കുന്നു .
കർപ്പാസാസ്ഥ്യാദി തൈലം (Karpasasthyadi Tailam) .
കർപ്പാസാസ്ഥ്യാദി തൈലം എന്നത് ആയുർവേദത്തിൽ പ്രധാനമായും ശക്തമായ വാത രോഗങ്ങളെ ചികിത്സിക്കാൻ ഉപയോഗിക്കുന്ന ഒരു തൈലമാണ് .പേരു സൂചിപ്പിക്കുന്ന പോലെ കർപ്പാസം (പരുത്തിച്ചെടി - Cotton plant) ഇതിലെ ഒരു പ്രധാന ചേരുവയാണ്.ഈ തൈലം പ്രധാനമായും പുറമെ പുരട്ടാനും (അഭ്യംഗം, പിഴിച്ചിൽ, കിഴി), ചിലപ്പോൾ ആന്തരികമായും (നസ്യം, വസ്തി) എന്നിവയ്ക്കും ഉപയോഗിക്കാറുണ്ട്. പക്ഷാഘാതം, മുഖപക്ഷാഘാതം, കൈകാലുകൾക്ക് ഉണ്ടാകുന്ന തളർച്ച (Paraplegia), ഞരമ്പുകൾക്ക് ഉണ്ടാകുന്ന ബലക്കുറവ്,പേശികൾക്ക് ഉണ്ടാകുന്ന കഠിനമായ വേദന, കോച്ചിപ്പിടുത്തം, തരിപ്പ്,പേശികൾക്ക് ഉണ്ടാകുന്ന കഠിനമായ വേദന, കോച്ചിപ്പിടുത്തം ,തരിപ്പ് തുടങ്ങിയവയുടെ ചികിത്സയിൽ ഈ തൈലം ഉപയോഗിക്കുന്നു .
വരണാദി കഷായം - Varanadi Kashayam .
വരണാദി കഷായം പ്രധാന കഫ, മേദസ്സ് (കൊഴുപ്പ്) എന്നിവയുടെ അസന്തുലിതാവസ്ഥ മൂലമുണ്ടാകുന്ന രോഗങ്ങളെ ചികിത്സിക്കാനാണ് ഇത് ഉപയോഗിക്കുന്നത്.അമിതവണ്ണം ,ഫാറ്റി ലിവർ,കഫദോഷം കാരണമുണ്ടാകുന്ന തലവേദന, സൈനസ് സംബന്ധമായ അസ്വസ്ഥതകൾ, മൈഗ്രേൻ ,ദഹനക്കേട്, വയറുവേദന, വയറുവീർപ്പ് (Bloating).കഴുത്തിലെ ലിംഫ് നോഡുകൾക്ക് (Lymph Nodes) ഉണ്ടാകുന്ന വീക്കം, മറ്റ് ഗ്രന്ഥിവീക്കങ്ങൾ ,തുടങ്ങിയവയുടെ ചികിത്സയിൽ ഇത് ഉപയോഗിച്ചു വരുന്നു .പേരു സൂചിപ്പിക്കുന്ന പോലെ വരുണ (നീർമാതളം - Crateva religiosa) ഇതിൽ ഒരു പ്രധാന ചേരുവയാണ് .
ആരഗ്വധാദി കഷായം (Aragvadhadi Kashayam ) .
ആരഗ്വധാദി കഷായം എന്നത് കഫ-പിത്ത ദോഷങ്ങളെ ശമിപ്പിക്കാനും , ചർമ്മരോഗങ്ങൾക്കും രക്തം ശുദ്ധീകരിക്കാനും ഉപയോഗിക്കുന്ന ഔഷധമാണ്. പേരു സൂചിപ്പിക്കുന്ന പോലെ ആരഗ്വധം (Aragvadha -Cassia fistula) കണിക്കൊന്നയാണ് ഇതിലെ പ്രധാന ചേരുവ .വിവിധതരം ത്വക്ക് രോഗങ്ങൾ, ചൊറിച്ചിൽ, എക്സിമ, സോറിയാസിസ് ,ഉണങ്ങാത്ത വ്രണങ്ങൾ ,കഫ-പിത്ത ദോഷങ്ങൾ കാരണമുള്ള ചില തരം പനി,ചില പ്രത്യേക കാരണങ്ങളാൽ ഉണ്ടാകുന്ന ഛർദ്ദി,പ്രമേഹം തുടങ്ങിയവയുട ചികിത്സയിൽ ഇത് ഉപയോഗിക്കുന്നു .
🌟മുരിങ്ങയില കഴിക്കുന്നത് കൊണ്ടുള്ള പ്രധാന ഗുണങ്ങൾ.
മുരിങ്ങയിലയിൽ ധാരാളം വിറ്റാമിനുകളും ധാതുക്കളും അടങ്ങിയിട്ടുണ്ട്. ഇത് നിങ്ങളുടെ ശരീരത്തിന് ആവശ്യമായ പല പോഷകങ്ങളും നൽകുന്നു.
വിറ്റാമിനുകൾ: വിറ്റാമിൻ A, വിറ്റാമിൻ C, വിറ്റാമിൻ E, വിറ്റാമിൻ B കോംപ്ലക്സ് (B1, B2, B3, B6, ഫോളേറ്റ്) എന്നിവയുടെ മികച്ച ഉറവിടമാണിത്.
ധാതുക്കൾ: കാൽസ്യം, ഇരുമ്പ്, പൊട്ടാസ്യം, മഗ്നീഷ്യം, ഫോസ്ഫറസ്, സിങ്ക് എന്നിവ ധാരാളമായി അടങ്ങിയിരിക്കുന്നു.
പ്രോട്ടീൻ: പേശികളുടെ വളർച്ചയ്ക്ക് ആവശ്യമായ അമിനോ ആസിഡുകൾ ഉൾപ്പെടെയുള്ള പ്രോട്ടീൻ ഇതിൽ ധാരാളമുണ്ട്.
💪 രോഗപ്രതിരോധ ശേഷി വർദ്ധിപ്പിക്കുന്നു : മുരിങ്ങയിലയിൽ ധാരാളമായുള്ള വിറ്റാമിൻ സി (Vitamin C) അണുബാധകളെ ചെറുക്കാനും പ്രതിരോധശേഷി കൂട്ടാനും സഹായിക്കുന്നു.ക്വെർസെറ്റിൻ (Quercetin), ക്ലോറോജെനിക് ആസിഡ് (Chlorogenic Acid) പോലുള്ള ശക്തമായ ആന്റിഓക്സിഡന്റുകൾ ഇതിൽ അടങ്ങിയിരിക്കുന്നു. ഇത് കോശങ്ങൾക്ക് കേടുപാടുകൾ വരുത്തുന്ന ഫ്രീ റാഡിക്കലുകളെ ചെറുക്കാൻ സഹായിക്കുന്നു. മുറിവുകൾ, നീര്, വേദന എന്നിവ കുറയ്ക്കാൻ സഹായിക്കുന്നു .
💖 ഹൃദയാരോഗ്യം മെച്ചപ്പെടുത്തുന്നു : മുരിങ്ങയില സ്ഥിരമായി കഴിക്കുന്നത് കൊളസ്ട്രോളിന്റെ അളവ് കുറയ്ക്കാൻ സഹായിക്കുമെന്ന് ചില പഠനങ്ങൾ സൂചിപ്പിക്കുന്നു.
🩸പ്രമേഹ നിയന്ത്രണം : രക്തത്തിലെ പഞ്ചസാരയുടെ അളവ് നിയന്ത്രിക്കാൻ മുരിങ്ങയില സഹായിക്കുമെന്ന് ഗവേഷണങ്ങൾ പറയുന്നു. പ്രമേഹമുള്ളവർക്ക് ഇത് ഭക്ഷണത്തിൽ ഉൾപ്പെടുത്തുന്നത് ഗുണകരമാണ്.
✨ചർമ്മത്തിനും മുടിക്കും : മുരിങ്ങയിലയിലെ വിറ്റാമിൻ A, E, സിങ്ക് പോലുള്ള ധാതുക്കൾ ചർമ്മത്തിന്റെയും മുടിയുടെയും ആരോഗ്യം നിലനിർത്താൻ സഹായിക്കുന്നു. ഇത് അകാല വാർദ്ധക്യം, അകാല നര എന്നിവ തടയാനും ഉപകരിക്കും.
🤰ദഹനം മെച്ചപ്പെടുത്തുന്നു : മുരിങ്ങയിലയിൽ നാരുകൾ ധാരാളമുള്ളതിനാൽ ദഹനവ്യവസ്ഥയുടെ സുഗമമായ പ്രവർത്തനത്തിനും മലബന്ധം (Constipation) ഒഴിവാക്കാനും സഹായിക്കുന്നു .
🤰മുലപ്പാൽ വർധിപ്പിക്കുന്നു : മുലയൂട്ടുന്ന അമ്മമാർക്ക് മുലപ്പാൽ വർദ്ധിപ്പിക്കാൻ ഇത് പാരമ്പര്യമായി ഉപയോഗിക്കാറുണ്ട്.
🤰കരളിന്റെ സംരക്ഷണം : കരളിന്റെ ആരോഗ്യം മെച്ചപ്പെടുത്താനും വിഷാംശം നീക്കാനും സഹായിക്കുന്നു.
🌿മുരിങ്ങയുടെ ചില ഔഷധപ്രയോഗങ്ങൾ .
1 .ലൈംഗീക താത്പര്യക്കുറവിന് മുരിങ്ങക്ക കഷായം : ഒരു മുരിങ്ങക്കായ കഷണങ്ങളാക്കി മുറിച്ച് ആവ്യശ്യത്തിന് ഉപ്പും വെള്ളവും ചേർത്ത് വേവിച്ച് വൈകുന്നേരങ്ങളിൽ ഭക്ഷണത്തിന് മുമ്പ് കഴിക്കുന്നത് ലൈംഗിക താൽപ്പര്യക്കുറവ് (Libido loss) പരിഹരിക്കാൻ സഹായിക്കുന്നു .മുരിങ്ങക്കുരു അരച്ച് പാലിൽ ചേർത്ത് കിടക്കാൻ നേരം കഴിക്കുന്നത് പുരുഷന്മാരിലെ ശീഘ്രസ്കലനം മാറാൻ നല്ലതാണ് .മുരിങ്ങയില ഇട്ട് വെള്ളം തിളപ്പിച്ച് ദിവസവും ഒരു നേരം കഴിക്കുന്നത് കൊളസ്ട്രോൾ ,രക്തസമ്മർദം എന്നിവ കുറയ്ക്കുന്നതിനും ലൈംഗീകശേഷി വർധിപ്പിക്കുന്നതിനും നല്ലതാണ് .
⚠️ ശ്രദ്ധിക്കേണ്ട കാര്യങ്ങൾ : ലൈംഗിക ശേഷിക്കുറവ് മാനസികമോ മറ്റു ഗുരുതരമായ ഒരു ആരോഗ്യ പ്രശ്നത്തിൻ്റെ ലക്ഷണമോ, ഹോർമോൺ വ്യതിയാനങ്ങളോ ആകാം. ആയുർവേദ ഡോക്ടറെയോ അല്ലെങ്കിൽ ഒരു യൂറോളജിസ്റ്റിനെയോ / സെക്സോളജിസ്റ്റിനെയോ കണ്ട് കൃത്യമായ രോഗനിർണ്ണയം നടത്തേണ്ടത് അത്യാവശ്യമാണ് . മുരിങ്ങക്ക കഷായം ഒരു സപ്ലിമെൻ്റ് എന്ന നിലയിൽ മാത്രം ഉപയോഗിക്കുക.
ആർത്തവ വേദന ,നടുവേദന ,മുഖക്കുരു എന്നിവയ്ക്ക് മുരിങ്ങയില കഷായം : ഒരു പിടി മുരിങ്ങയില 400 മില്ലി വെള്ളത്തിൽ തിളപ്പിച്ച് 100 മില്ലിയാക്കി വറ്റിച്ച് ദിവസവും കഴിക്കുന്നത് ആർത്തവ വേദന ,നടുവേദന ,മുഖക്കുരു എന്നിവ ഇല്ലാതാകാൻ സഹായിക്കുന്നു .മുരിങ്ങയില കഷായം വാതത്തെയും കഫ ദോഷത്തെയും സന്തുലിതമാക്കുന്നു .വാത ദോഷത്തിന്റെ പ്രധാന ലക്ഷണം വേദനയാണ് (സന്ധി വേദന, നടുവേദന, മുതലായവ). മുരിങ്ങയിലയുടെ വേദനാസംഹാരിയായ സ്വഭാവം വാതത്തെ ശമിപ്പിക്കാൻ ഉപകരിക്കുന്നു..മുരിങ്ങയ്ക്ക് വരണ്ട (Ruksha), ലഘുവായ (Light) സ്വഭാവങ്ങളുണ്ട്. ഇത് കഫ ദോഷത്തിന്റെ ഭാരമേറിയതും എണ്ണമയമുള്ളതുമായ (Heavy and Unctuous ഗുണങ്ങളെ കുറയ്ക്കാൻ സഹായിക്കുന്നു.
ചെങ്കണ്ണ് മാറാൻ മുരിങ്ങയില നീര് : മുരിങ്ങയില നീര് 2 തുള്ളി വീതം കണ്ണിലൊഴിക്കുന്നത് ചെങ്കണ്ണ് മാറാൻ നല്ലതാണ് .കണ്ണിനു ചുറ്റുമുള്ള വീക്കം മാറാൻ മുരിങ്ങയില അരച്ച് കണ്ണിനു ചുറ്റും പുരട്ടുന്നത് നല്ലതാണ് .
മുഖക്കുരുവും മുഖത്തെ കറുത്ത പാടുകളും മാറ്റാൻ മുരിങ്ങയില നീരും നാരങ്ങാ നീരും : മുരിങ്ങയില അരച്ച് പേസ്റ്റാക്കി ചെറുനാരങ്ങാ നീരും ചേർത്ത് മുഖത്ത് പുരട്ടുന്നത് മുഖക്കുരുവും മുഖത്തെ കറുത്ത പാടുകളും മാറാൻ സഹായിക്കുന്നു .മുരിങ്ങയിലയ്ക്ക് വീക്കം തടയുന്ന ഗുണങ്ങളും അണുക്കളെ പ്രതിരോധിക്കുന്ന ഗുണങ്ങളുമുണ്ട്. ഇത് മുഖക്കുരു ഉണ്ടാക്കുന്ന ബാക്ടീരിയകളെ തടയാനും ചുവപ്പും വീക്കവും കുറയ്ക്കാനും സഹായിക്കുന്നു.നാരങ്ങാനീരിൽ അടങ്ങിയിട്ടുള്ള സിട്രിക് ആസിഡ് (Citric Acid) ഒരു സ്വാഭാവിക ആൽഫാ ഹൈഡ്രോക്സി ആസിഡ് (AHA) ആണ്. ഇത് ചർമ്മത്തിലെ മൃതകോശങ്ങളെ (Dead Cells) നീക്കം ചെയ്യാനും അതുവഴി കറുത്ത പാടുകളുടെ നിറം കുറയ്ക്കാനും സഹായിക്കുന്നു.
രുചിയില്ലായ്മ ,വയറുവേദന ,വയറു വീർപ്പ് എന്നിവയ്ക്ക് മുരിങ്ങ പൂവ് : ഒന്നോ രണ്ടോ പിടി മുരിങ്ങ പൂക്കൾ എടുത്ത് ആവിശ്യത്തിന് ഉപ്പ് ,വെളുത്തുള്ളി ,കുരുമുളക് ,ഇഞ്ചി എന്നിവ ചേർത്ത് പാകം ചെയ്ത് ചോറിനൊപ്പം കഴിക്കുന്നത് രുചിയില്ലായ്മ ,വയറുവേദന ,വയറു വീർപ്പ് എന്നിവ മാറാൻ സഹായിക്കുന്നു .വയറു വീർപ്പും ഗ്യാസും ഉണ്ടാകുന്നത് വാത ദോഷം കാരണമാണ്. മുരിങ്ങപ്പൂവ് പോലുള്ളവ വാതത്തെ താഴേക്ക് സഞ്ചരിക്കാൻ സഹായിക്കുകയും അതുവഴി ഗ്യാസ് പുറന്തള്ളപ്പെടുകയും വയറു വീർപ്പ് കുറയുകയും ചെയ്യുന്നു.മുരിങ്ങപ്പൂവിനും ഇലയ്ക്കും പൊതുവെ ദഹനത്തെ ത്വരിതപ്പെടുത്താനുള്ള (Deepana, Pachana Guna) ശേഷിയുണ്ട്. ദഹനം മെച്ചപ്പെടുമ്പോൾ സ്വാഭാവികമായും വിശപ്പും രുചിയും വർദ്ധിക്കുന്നു.
മുരിങ്ങപ്പൂവ് തോരൻ : മുരിങ്ങപ്പൂവ് ചെറുതായി അരിഞ്ഞ്, അൽപം ഇഞ്ചി, വെളുത്തുള്ളി, ജീരകം ,ഉപ്പ് എന്നിവ ചേർത്ത് തോരൻ ഉണ്ടാക്കി കഴിക്കുന്നത് ദഹനത്തിനും ഗ്യാസിനും വളരെ നല്ലതാണ്.
മുരിങ്ങപ്പൂവ് കഷായം: പൂക്കൾ വെള്ളത്തിലിട്ട് തിളപ്പിച്ച്, ആ വെള്ളം ഊറ്റിയെടുത്ത് ചെറുചൂടോടെ കുടിക്കുന്നത് രുചിയില്ലായ്മയ്ക്കും വയറുവേദനയ്ക്കും ആശ്വാസം നൽകും.
കരൾ, പ്ലീഹ രോഗങ്ങൾക്ക് മുരിങ്ങക്കായ സൂപ്പ് : ആധുനിക പഠനങ്ങൾ സൂചിപ്പിക്കുന്നത് മുരിങ്ങയിലയിലെ ശക്തമായ ആന്റിഓക്സിഡന്റുകൾ കരളിന് കേടുപാടുകൾ സംഭവിക്കുന്നത് (Liver Damage) കുറയ്ക്കാൻ സഹായിക്കുമെന്നാണ്.വിഷവസ്തുക്കളെയും മദ്യത്തെയും ശരീരത്തിൽ നിന്ന് നീക്കം ചെയ്യാനുള്ള കരളിന്റെ കഴിവിനെ മുരിങ്ങ പിന്തുണയ്ക്കുന്നു.പ്ലീഹ നമ്മുടെ രോഗപ്രതിരോധ സംവിധാനത്തിലെ (Immune System) ഒരു പ്രധാന അവയവമാണ്. മുരിങ്ങയില/കായ എന്നിവയിൽ അടങ്ങിയിട്ടുള്ള ധാരാളം പോഷകങ്ങളും (പ്രത്യേകിച്ച് ഇരുമ്പ്, വിറ്റാമിൻ സി) രോഗപ്രതിരോധ ശേഷി വർദ്ധിപ്പിക്കുന്നതിലൂടെ പ്ലീഹയുടെ പ്രവർത്തനത്തെ പരോക്ഷമായി സഹായിക്കുന്നു. പല പരമ്പരാഗത ചികിത്സാരീതികളിലും, മുരിങ്ങയുടെ ഭാഗങ്ങൾ പ്ലീഹ വീക്കം (Splenomegaly) പോലുള്ള അവസ്ഥകളിൽ ഉപയോഗിക്കുന്നതിനെക്കുറിച്ച് സൂചനകളുണ്ട്.
മുരിങ്ങക്കായ സൂപ്പ് തയാറാക്കുന്നതിനുള്ള ഒരു രീതി .
ചേരുവകൾ.
മുരിങ്ങക്കായ: 2 എണ്ണം (വൃത്തിയാക്കി ചെറുതായി മുറിച്ചത്).
വെള്ളം: 4 കപ്പ് .
മഞ്ഞൾപ്പൊടി: 1/4 ടീസ്പൂൺ (കരളിന്റെ ആരോഗ്യത്തിന് നല്ലതാണ്).
ഇഞ്ചി: ഒരു ചെറിയ കഷ്ണം (ചതച്ചത്).
കുരുമുളക് പൊടി: ആവശ്യത്തിന്.
ഉപ്പ്: ആവശ്യത്തിന് .
തയാറാക്കുന്ന വിധം.
1 .ഒരു പാത്രത്തിൽ മുരിങ്ങക്കായ, വെള്ളം, മഞ്ഞൾപ്പൊടി, ഇഞ്ചി, ഉപ്പ് എന്നിവ ചേർത്ത് നന്നായി വേവിക്കുക (20-25 മിനിറ്റ്).
2.വേവിച്ച ശേഷം, മുരിങ്ങക്കായയുടെ ഉള്ളിലെ കാമ്പും നീരും ഒരു സ്പൂൺ ഉപയോഗിച്ച് പുറത്തെടുക്കുക. കട്ടിയുള്ള പുറംതൊലി നീക്കം ചെയ്യുക.
3.കാമ്പ് കുറച്ച് വെള്ളം ചേർത്ത് മിക്സിയിൽ അരച്ച് അരിച്ചെടുക്കുക.
4 .ഈ മിശ്രിതം കുരുമുളകുപൊടിയും ചേർത്ത് തിളപ്പിച്ച് ചെറുചൂടോടെ കഴിക്കുക.
🍲 മുരിങ്ങക്കായ സൂപ്പിന്റെ പങ്ക് : മുരിങ്ങക്കായ സൂപ്പായി കഴിക്കുന്നത് ഗുണങ്ങൾ ശരീരത്തിന് എളുപ്പത്തിൽ ആഗിരണം ചെയ്യാൻ സഹായിക്കും. സൂപ്പ് ഒരു ലഘുവായതും ദഹിക്കാൻ എളുപ്പമുള്ളതുമായ രൂപമാണ്.കരൾ, പ്ലീഹ രോഗങ്ങൾ ഉള്ളപ്പോൾ ദഹനവ്യവസ്ഥ ദുർബലമായിരിക്കും. മുരിങ്ങക്കായ സൂപ്പ് ദഹനം എളുപ്പമാക്കുകയും പോഷകങ്ങൾ വേഗത്തിൽ ശരീരത്തിന് ലഭിക്കുകയും ചെയ്യുന്നു.മുരിങ്ങക്കായയിൽ നാരുകൾ, വിറ്റാമിൻ സി, പൊട്ടാസ്യം, മഗ്നീഷ്യം എന്നിവ ധാരാളമായി അടങ്ങിയിരിക്കുന്നു. ഇത് പൊതുവായ ആരോഗ്യം മെച്ചപ്പെടുത്താൻ സഹായിക്കും.
💖 മുരിങ്ങയുടെ വാജീകരണ ഗുണങ്ങൾ : മുരിങ്ങക്കായാ സൂപ്പ് ഒരു വാജീകരണ ഔഷധം കൂടിയാണ് .മുരിങ്ങക്കായ സൂപ്പ് ഉൾപ്പെടെ മുരിങ്ങയുടെ എല്ലാ ഭാഗങ്ങൾക്കും (ഇല, പൂവ്, കായ, വിത്ത്) വാജീകരണ ഗുണങ്ങൾ (Vajikarana Properties) ഉള്ളതായി ആയുർവേദത്തിൽ പറയുന്നുണ്ട്. വാജീകരണം എന്നതുകൊണ്ട് ആയുർവേദം പ്രധാനമായും ഉദ്ദേശിക്കുന്നത് ലൈംഗികാരോഗ്യവും പ്രത്യുത്പാദന ശേഷിയും മെച്ചപ്പെടുത്തുന്ന ചികിത്സാ രീതികളെയാണ്.
ശക്തിയും ഊർജ്ജവും: മുരിങ്ങ ഒരു ബല്യ (ശരീരത്തിന് ബലം നൽകുന്നത്) ഔഷധമാണ്. ഇതിൽ അടങ്ങിയിട്ടുള്ള ഉയർന്ന അളവിലുള്ള പോഷകങ്ങൾ (പ്രോട്ടീൻ, വിറ്റാമിനുകൾ, ധാതുക്കൾ) ലൈംഗിക പ്രവർത്തനങ്ങൾക്ക് ആവശ്യമായ മൊത്തത്തിലുള്ള ശാരീരിക ശക്തിയും ഊർജ്ജസ്വലതയും വർദ്ധിപ്പിക്കുന്നു.
രക്തചംക്രമണം മെച്ചപ്പെടുത്തുന്നു: മുരിങ്ങയുടെ ചില ഘടകങ്ങൾ ശരീരത്തിലെ രക്തചംക്രമണം (Blood Circulation) മെച്ചപ്പെടുത്താൻ സഹായിക്കും. മികച്ച രക്തയോട്ടം ലൈംഗികാവയവങ്ങളുടെ പ്രവർത്തനത്തിന് അത്യന്താപേക്ഷിതമാണ്.
നാഡീവ്യൂഹത്തെ പിന്തുണയ്ക്കുന്നു: ഇത് നാഡീവ്യൂഹത്തെ (Nervous System) ശക്തിപ്പെടുത്താനും മാനസിക സമ്മർദ്ദം കുറയ്ക്കാനും സഹായിക്കുന്നു. മികച്ച നാഡീവ്യൂഹ പ്രവർത്തനങ്ങൾ ലൈംഗികാരോഗ്യത്തിന് പ്രധാനമാണ്.
ശുക്ലവർദ്ധകം (Spermatogenic): മുരിങ്ങയുടെ വിത്തുകളും പൂക്കളും പരമ്പരാഗതമായി ശുക്ലത്തിന്റെ അളവും ഗുണവും വർദ്ധിപ്പിക്കുന്നതിന് ഉപയോഗിക്കാറുണ്ട്. മുരിങ്ങക്കായ സൂപ്പ് ഈ ഗുണങ്ങൾ ഉൾക്കൊള്ളുന്നു.
രക്തസമ്മർദ്ദം, കൊളസ്ട്രോൾ എന്നിവയ്ക്ക് മുരിങ്ങക്കായ കഷായം.
കഷായം തയാറാക്കുന്ന രീതി : ഒരു മുരിങ്ങക്കായ എടുത്ത് ചെറിയ കഷണങ്ങളാക്കി മുറിക്കുക. ഈ കഷണങ്ങൾ ഏകദേശം 2 കപ്പ് (400 മില്ലി ലിറ്റർ) വെള്ളത്തിൽ ചേർക്കുക.ഇത് നന്നായി തിളപ്പിച്ച്, വെള്ളം ഏകദേശം അര കപ്പ് (100 മില്ലി ) ആയി വറ്റിച്ചെടുക്കുക. ഇത് അരിച്ചെടുക്കുക. ഇതിനെയാണ് കഷായം (അല്ലെങ്കിൽ ഹെർബൽ ടീ) എന്ന് പറയുന്നത്.ആവശ്യമെങ്കിൽ അൽപം ഉപ്പ് ചേർക്കാവുന്നതാണ്.ഈ കഷായം ചെറുചൂടോടെ സേവിക്കുക .ദിവസത്തിൽ ഒരിക്കൽ മാത്രം കഴിക്കുക.
ഈ കഷായം ഉപയോഗിക്കുന്നത് രക്തസമ്മർദ്ദം നിയന്ത്രിക്കാൻ സഹായിക്കുന്നു. ശരീരത്തിലെ കൊളസ്ട്രോളിന്റെ അളവ് കുറയ്ക്കാനും, കൊഴുപ്പ് ശരിയായ രീതിയിൽ ദഹിപ്പിക്കാനും ഇത് സഹായിക്കുന്നു .ഇത് ശരീരത്തിലെ ഊർജ്ജക്കുറവും അലസതയും മാറ്റാൻ സഹായിക്കുന്നു. വാജീകരണ ഗുണങ്ങൾ ഉള്ളതിനാൽ ലൈംഗികപരമായ ബലഹീനതകൾക്കും ഇത് ഫലപ്രദമാണ്.
ALSO READ : ഉലുവ (Fenugreek): പ്രമേഹത്തെ തോൽപ്പിക്കും; ലൈംഗിക ശേഷി വർദ്ധിപ്പിക്കും!
മറ്റു ഉപയോഗങ്ങൾ :മുരിങ്ങയില ഉണക്കിപ്പൊടിച്ചത് 3 ടീസ്പൂൺ വീതം തേനിൽ കുഴച്ച് കഴിച്ചതിനു ശേഷം പുറമെ അരക്കപ്പ് വെള്ളം കുടിക്കുന്നത് പൊണ്ണത്തടി ഉയർന്ന കൊളസ്ട്രോൾ എന്നിവ കുറയ്ക്കാൻ നല്ലതാണ് .പൊടി എള്ളെണ്ണയിൽ കുഴച്ച് ചെറു ചൂടുവെള്ളത്തോടൊപ്പം കഴിക്കുന്നത് വാതത്തിന്റെ ആധിക്യം മൂലമുണ്ടാകുന്ന രോഗങ്ങൾക്ക് നല്ലതാണ് .പൊടി നെയ്യിൽ കുഴച്ച് ഇളം ചൂടുവെള്ളത്തോടൊപ്പം കഴിക്കുന്നത് രക്തസമ്മർദ്ദം കുറയ്ക്കാൻ നല്ലതാണ് .ഇത് അസിഡിറ്റിക്കും നല്ലതാണ്.മുരിങ്ങയിലപ്പൊടി കഷായം ഉണ്ടാക്കിയും ഉപയോഗിക്കാം .ഒരു സ്പൂൺ മുരിങ്ങപ്പൊടി ഒരു ഗ്ലാസ് വെള്ളത്തിൽ കുറച്ചു സമയം തിളപ്പിച്ചു അരിച്ചെടുത്ത് തേൻ ,എള്ളെണ്ണ ,നെയ്യ് ഇവയിൽ ഏതെങ്കിലും മേമ്പൊടി ചേർത്ത് കഴിക്കാം .
മുരിങ്ങയുടെ വേരിന്റെ നീര് പാലും ചേർത്ത് കഴിക്കുന്നത് ദഹനക്കേട് ,മൂത്രത്തിൽ കല്ല് ,വാതരോഗങ്ങൾ ,ചുമ ,ആസ്മ ,കരൾ പ്ലീഹ രോഗങ്ങൾ എന്നിവയ്ക്കെല്ലാം നല്ലതാണ് .രണ്ടോ മൂന്നോ സ്പൂൺ മുരിങ്ങയില നീരിൽ അത്രയും തന്നെ തേങ്ങാപ്പാൽ ചേർത്ത് രാവിലെ വെറുംവയറ്റിൽ കുറച്ചു ദിവസം പതിവായി കഴിച്ചാൽ മഞ്ഞപ്പിത്തം ശമിക്കും .
മുരിങ്ങയില അരച്ചു പുരട്ടിയാൽ മുറിവുകൾ പെട്ടന്ന് ഉണങ്ങും .മുരിങ്ങയിലയും ഉപ്പും കുരുമുളകും ചേർത്ത് അരച്ചു കഴിച്ചാൽ വിശപ്പില്ലായ്മ ,രുചിയില്ലായ്മ എന്നിവ മാറിക്കിട്ടും .മുരിങ്ങയില നീരും സമം ചെറുനാരങ്ങ നീരും ചേർത്ത് ദിവസവും കഴിക്കുന്നത് മൂലക്കുരുവിന് നല്ലതാണ് .
മുരിങ്ങ കുരുവിൽ നിന്നും എടുക്കുന്ന തൈലം വാതരോഗങ്ങൾ മൂലമുണ്ടാകുന്ന വേദനയ്ക്ക് പുറമെ പുരട്ടുവാൻ ഉപയോഗിക്കാം .മുരിങ്ങയിലയും ഉപ്പും ചേർത്ത് അരച്ചു പുരട്ടിയാൽ സന്ധികളിലെ നീരും വേദനയും മാറിക്കിട്ടും .
മുരിങ്ങയുടെ കുരു ,കടലാടി വിത്ത് എന്നിവ അരച്ച് അമരിയില ഇടിച്ചു പിഴിഞ്ഞ നീരും ചേർത്ത് കാച്ചിയ എണ്ണ മൂക്കിൽ നസ്യം ചെയ്താൽ എത്ര പഴകിയ തലവേദനയും മാറും .മുരിങ്ങക്കുരു വെള്ളത്തിൽ നന്നായി അരച്ച് മൂക്കിൽ നസ്യം ചെയ്താൽ കഫക്കെട്ട് മൂലമുണ്ടാകുന്ന തലവേദന മാറും .
മുരിങ്ങയുടെ വേര് അരച്ചു കഴിക്കുന്നത് അപസ്മാരത്തിനും ഇടവിട്ടുണ്ടാകുന്ന പനിക്കും നല്ലതാണ് .പ്രസവത്തിനു താമസം നേരിട്ടാൽ മുരിങ്ങയുടെ വേര് അരച്ച് യോനിയിൽ പുരട്ടിയാൽ ഉടനടി പ്രസവം നടക്കും എന്നു പറയപ്പെടുന്നു .മുരിങ്ങയുടെ വേര് അരച്ച് പുരട്ടിയാൽ മ്യഗങ്ങൾ കടിച്ചതു മൂലമുള്ള വിഷം ശമിക്കും .
മുരിങ്ങയുടെ തൊലിയുടെ നീര് ചെവിയിൽ ഒഴിച്ചാൽ ചെവിവേദനയ്ക്ക് ശമനമുണ്ടാകും .മോണയിൽ പുരട്ടിയാൽ പല്ലുവേദന മാറിക്കിട്ടും .മുരിങ്ങയുടെ തൊലിയും വെളുത്തുള്ളിയും ചേർത്ത് അരച്ച് വെള്ളത്തിൽ കലക്കി തളിച്ചാൽ പാമ്പുകളുടെ ശല്യം ഉണ്ടാകുകയില്ല .മുരിങ്ങയില കഷായമുണ്ടാക്കി ഇന്തുപ്പും കായവും ചേർത്ത് രാവിലെ കഴിക്കുന്നത് അപ്പന്റിസൈറ്റിസിനു നല്ലതാണ് .
മുരിങ്ങയില നീരിൽ തേൻ ചേർത്ത് കുറച്ചു ദിവസം പതിവായി കഴിച്ചാൽ കൊക്കോപ്പുഴു നശിക്കും .മുരിങ്ങ വേര് കഷായമുണ്ടാക്കി കഴിക്കുന്നത് മൂത്രത്തിൽ കല്ല് ,മൂത്ര തടസം ,കൃമിശല്യം ,ആർത്തവ വേദന എന്നിവയ്ക്ക് നല്ലതാണ് .