കൂശ്മാണ്ഡ രസായനം: ശരീരപുഷ്ടിക്കും പ്രതിരോധശേഷിക്കും ഉത്തമം

ആരോഗ്യകരമായ ജീവിതശൈലി ആഗ്രഹിക്കുന്നവർക്ക് ഒഴിച്ചുകൂടാനാവാത്ത ഒന്നാണ് ആയുർവേദത്തിലെ കൂശ്മാണ്ഡ രസായനം (Kushmanda Rasayanam). കുമ്പളങ്ങ പ്രധാന ചേരുവയായി തയ്യാറാക്കുന്ന ഈ ഔഷധം വെറുമൊരു ലേഹ്യമല്ല, മറിച്ച് ശരീരത്തിന് ആവശ്യമായ ഊർജ്ജവും പ്രതിരോധശേഷിയും നൽകുന്ന ഒരു സമ്പൂർണ്ണ ടോണിക്കാണ്. ശ്വാസകോശ സംബന്ധമായ പ്രശ്നങ്ങൾ മുതൽ ദഹന വൈകല്യങ്ങൾ വരെ പരിഹരിക്കാൻ സഹായിക്കുന്ന കൂശ്മാണ്ഡ രസായനത്തിന്റെ അത്ഭുതകരമായ ഗുണങ്ങളെക്കുറിച്ചും ഇത് ഉപയോഗിക്കേണ്ട രീതിയെക്കുറിച്ചും നമുക്ക് ഈ ലേഖനത്തിലൂടെ വിശദമായി പരിശോധിക്കാം.

Kushmanda Rasayanam Ayurvedic medicine with winter melon, honey, and spices for respiratory health.

പാരമ്പര്യ ആയുർവേദ വിധിപ്രകാരം തയ്യാറാക്കിയ കൂശ്മാണ്ഡ രസായനം - ആരോഗ്യത്തിനും ദീർഘായുസ്സിനും

ച്യവനപ്രാശവും കൂശ്മാണ്ഡ രസായനവും: അശ്വിനീ ദേവന്മാരുടെ ദിവ്യസംഭാവന.

ആയുർവേദത്തിലെ ഏറ്റവും പ്രധാനപ്പെട്ട രണ്ട് രസായനങ്ങളാണ് ച്യവനപ്രാശവും കൂശ്മാണ്ഡ രസായനവും. ഇവ തമ്മിൽ ഗാഢമായ ഒരു ബന്ധമുണ്ട്. ഇതിന്റെ പിന്നിലെ ഐതിഹ്യം വളരെ ശ്രദ്ധേയമാണ്.

ഭൃഗുമഹർഷിയുടെ പുത്രനായ ച്യവനമഹർഷിക്ക് അകാലത്തിൽ വാർദ്ധക്യം ബാധിക്കുകയും ശരീരം തളരുകയും ചെയ്തു. നഷ്ടപ്പെട്ട യൗവനവും ആരോഗ്യവും വീണ്ടെടുക്കുന്നതിനായി ദേവവൈദ്യന്മാരായ അശ്വിനീ ദേവന്മാർ അദ്ദേഹത്തിന് നിർദ്ദേശിച്ചു നൽകിയ ഔഷധമാണ് പ്രസിദ്ധമായ ച്യവനപ്രാശം. ഈ അത്ഭുത മരുന്നിലൂടെ മഹർഷി തന്റെ ആരോഗ്യം തിരിച്ചുപിടിച്ചു.

ച്യവനപ്രാശം പോലെ തന്നെ, അശ്വിനീ ദേവന്മാർ മാനവരാശിയുടെ ആരോഗ്യത്തിനായി നൽകിയ മറ്റൊരു വിശിഷ്ട ഔഷധമാണ് കൂശ്മാണ്ഡ രസായനം. ച്യവനപ്രാശം പോലെ തന്നെ ശരീരത്തെ പുനരുജ്ജീവിപ്പിക്കാനും (Rejuvenation), കോശങ്ങളുടെ തേയ്മാനം തടയാനും ഈ കുമ്പളങ്ങ രസായനത്തിന് സവിശേഷമായ കഴിവുണ്ട്. അതുകൊണ്ട് തന്നെ ആയുർവേദത്തിൽ ഇതിനെ വെറുമൊരു മരുന്നായല്ല, മറിച്ച് ശരീരത്തിന് നിത്യയൗവനം നൽകുന്ന ഒരു 'രസായന'മായിട്ടാണ് കണക്കാക്കുന്നത്.

ആയുർവേദത്തിലെ ഔഷധക്കൂട്ടുകളിൽ ഏറ്റവും സ്വാദിഷ്ടവും എന്നാൽ അത്രതന്നെ ഗുണപ്രദവുമായ ഒന്നാണ് കൂശ്മാണ്ഡ രസായനം. 'കൂശ്മാണ്ഡ അവലേഹ' എന്നും അറിയപ്പെടുന്ന ഈ ഔഷധം മലയാളികൾക്ക് ഏറെ പ്രിയപ്പെട്ടതാണ്. ശ്വാസകോശ സംബന്ധമായ അസുഖങ്ങൾക്കും ശാരീരിക ബലഹീനതകൾക്കും പണ്ടുകാലം മുതലേ നമ്മുടെ വീടുകളിൽ ഉപയോഗിച്ചുവരുന്ന ഒരു ദിവ്യൗഷധമാണിത്.

എന്താണ് കൂശ്മാണ്ഡം?

സംസ്കൃതത്തിൽ കൂശ്മാണ്ഡം എന്നാൽ നമ്മൾ നിത്യവും ഉപയോഗിക്കുന്ന കുമ്പളങ്ങ എന്നാണ് അർത്ഥം. വള്ളിച്ചെടികളിൽ ഉണ്ടാകുന്ന ഫലങ്ങളിൽ വെച്ച് ഏറ്റവും പോഷകസമ്പുഷ്ടമായ ഒന്നാണ് കുമ്പളങ്ങ എന്ന് ആയുർവേദ ആചാര്യന്മാർ സാക്ഷ്യപ്പെടുത്തുന്നു. ഇതിൽ ധാരാളമായി ജലാംശം അടങ്ങിയിരിക്കുന്നു. കൂടാതെ:

പ്രോട്ടീൻ

കൊഴുപ്പ്

കാർബോഹൈഡ്രേറ്റ്

ധാതുലവണങ്ങൾ

വിറ്റാമിനുകൾ

തുടങ്ങിയവയും കുമ്പളങ്ങയിൽ സമൃദ്ധമായി അടങ്ങിയിട്ടുണ്ട്.

വീട്ടിൽ തയ്യാറാക്കാം ഈ 'സ്വാദിഷ്ട' ഔഷധം.

മറ്റു പല ആയുർവേദ മരുന്നുകളെയും പോലെ കയ്പ്പുള്ള ഒന്നല്ല കൂശ്മാണ്ഡ രസായനം. കുട്ടികൾ മുതൽ മുതിർന്നവർ വരെ ഒരുപോലെ ഇഷ്ടപ്പെടുന്ന രുചിയാണ് ഇതിനുള്ളത്. പണ്ടുകാലത്ത് ഒട്ടുമിക്ക കേരളീയ ഭവനങ്ങളിലും വീട്ടുമുറ്റത്തെ കുമ്പളങ്ങ പറിച്ചെടുത്ത് ഈ രസായനം തയ്യാറാക്കാറുണ്ടായിരുന്നു.

കൂശ്മാണ്ഡ രസായനത്തിൽ ചേരുവയുള്ള ഔഷധങ്ങൾ ( Ingredients) .

1. കുമ്പളങ്ങ : Benincasa hispida - 4.8 kg .

2. തിപ്പലി : Piper longum- 96 g .

3. ചുക്ക് : Zingiber officinale - 96 g .

4. ജീരകം : Cuminum cyminum . 96 g .

5.കറുകപ്പട്ട : Cinnamomum zeylanicum 24 g .

6. ഏലത്തരി : Elettaria cardamomum 24 g .

7.പച്ചില : Cinnamomum tamala 24 g.

8. കുരുമുളക് : Piper nigrum 24 g .

9. മല്ലി : Coriandrum sativum- 24 g .

10. തേൻ : Honey 384 g .

11. നെയ്യ് ::Ghee - 768 g.

12 .കൽക്കണ്ടം : Rock sugar -4.8 kg .

കൂശ്മാണ്ഡ രസായനം തയ്യാറാക്കുന്ന വിധം (Preparation Method).

ശുദ്ധമായ ചേരുവകൾ ഉപയോഗിച്ച് വീട്ടിൽ തന്നെ തയ്യാറാക്കുമ്പോഴാണ് ഈ ഔഷധത്തിന് പൂർണ്ണമായ ഗുണം ലഭിക്കുന്നത്. ആയുർവേദ വിധിപ്രകാരം ഇത് തയ്യാറാക്കുന്ന ഘട്ടങ്ങൾ താഴെ പറയുന്നവയാണ്:

തയ്യാറാക്കുന്ന ഘട്ടങ്ങൾ:

1. കുമ്പളങ്ങ ഒരുക്കൽ: നന്നായി മൂത്ത കുമ്പളങ്ങയുടെ തൊലിയും കുരുവും നീക്കം ചെയ്ത് ചെറിയ കഷണങ്ങളാക്കുക. ഇത് അല്പം വെള്ളത്തിൽ വാട്ടി എടുത്ത ശേഷം നന്നായി പിഴിഞ്ഞ് നീരും ചവറും (ഫലമജ്ജ) വേർതിരിക്കുക. കുമ്പളങ്ങാ നീര് മാറ്റിവെക്കുക.

2. വഴറ്റിയെടുക്കൽ: പിഴിഞ്ഞെടുത്ത കുമ്പളങ്ങ ചവർ ഒരു ചീനച്ചട്ടിയിൽ അല്പം നെയ്യൊഴിച്ച് നന്നായി വഴറ്റുക. ഇത് തേനിന്റെ നിറം (Golden Brown) ആകുന്നത് വരെ വഴറ്റണം. ശേഷം ഇത് നന്നായി അരച്ചെടുക്കുക.

3. പാവു കാച്ചുക: നേരത്തെ മാറ്റിവെച്ച കുമ്പളങ്ങാ നീരിൽ കൽക്കണ്ടം ചേർത്ത് അടുപ്പത്തുവെച്ച് ചൂടാക്കുക. ഇത് നൂൽ പരുവത്തിൽ (പാവുപാകം) ആകുന്നത് വരെ തിളപ്പിക്കുക.

4. കൂട്ടിക്കലർത്തൽ: പാവു പാകമാകുമ്പോൾ അരച്ചു വെച്ചിരിക്കുന്ന കുമ്പളങ്ങയും ബാക്കിയുള്ള നെയ്യും ഇതിലേക്ക് ചേർത്ത് നന്നായി ഇളക്കുക.

5. ഔഷധങ്ങൾ ചേർക്കാം: ലേഹ്യ പരുവത്തിലേക്ക് എത്തുമ്പോൾ പൊടിച്ചു വെച്ചിരിക്കുന്ന ചുക്ക്, തിപ്പലി, ജീരകം, ഏലക്ക, കറുകപ്പട്ട, പച്ചില, മല്ലി, കുരുമുളക് എന്നിവ ഇതിലേക്ക് ചേർത്ത് നന്നായി യോജിപ്പിക്കുക.

6. പൂർത്തിയാക്കൽ: പാകമായിക്കഴിഞ്ഞാൽ അടുപ്പിൽ നിന്നും ഇറക്കി വെക്കുക. ചൂട് നന്നായി ആറിയ ശേഷം മാത്രം തേൻ ചേർത്ത് ഇളക്കുക.

7. സൂക്ഷിക്കേണ്ട രീതി: ഈ രസായനം ഈർപ്പമില്ലാത്ത വായു കടക്കാത്ത ഒരു കുപ്പിയിലാക്കി സൂക്ഷിക്കുക. വൃത്തിയുള്ള ഉണങ്ങിയ സ്പൂൺ മാത്രം ഉപയോഗിക്കാൻ ശ്രദ്ധിക്കുക.

കൂശ്മാണ്ഡ രസായനത്തിന്റെ ഗുണങ്ങൾ.

ഈ ഔഷധത്തിന്റെ ഗുണങ്ങൾ നിരവധിയാണ്. ആചാര്യന്മാർ നിർദ്ദേശിച്ചിട്ടുള്ള പ്രധാന ഗുണങ്ങൾ താഴെ പറയുന്നവയാണ്:

1. ശ്വാസകോശ ആരോഗ്യത്തിന്.

ശ്വാസകോശ സംബന്ധമായ രോഗങ്ങളിലാണ് കൂശ്മാണ്ഡ രസായനം ഏറ്റവും ഫലപ്രദം.

ചുമ, ആസ്ത്മ, അലർജി, ശ്വാസംമുട്ടൽ (വലിവ്) എന്നിവ പരിഹരിക്കുന്നു.

ക്ഷയം (Tuberculosis), ഉരക്ഷതം (ശ്വാസകോശത്തിലെ മുറിവുകൾ) എന്നിവയ്ക്ക് ഉത്തമമാണ്.

രക്തം ചുമച്ചു തുപ്പുന്ന അവസ്ഥയിൽ ഇത് ആശ്വാസം നൽകുന്നു.

2. രക്തസ്രാവ വൈകല്യങ്ങൾ തടയുന്നു.

രക്തപിത്തം പോലുള്ള രോഗങ്ങളിൽ ഇത് മികച്ച ഫലം നൽകുന്നു.

മൂക്കിലൂടെയുള്ള രക്തസ്രാവം തടയുന്നു.

സ്ത്രീകളിൽ ആർത്തവകാലത്തുണ്ടാകുന്ന അമിത രക്തസ്രാവം നിയന്ത്രിക്കാൻ സഹായിക്കുന്നു.

3. രസായന ഗുണവും വാർദ്ധക്യ പ്രതിരോധവും.

ശരീരത്തിന്റെ ഓജസ്സും ബലവും വർദ്ധിപ്പിക്കാൻ ഇത് സഹായിക്കുന്നു.

അകാല വാർദ്ധക്യം തടയാനും കോശങ്ങളെ പുനരുജ്ജീവിപ്പിക്കാനും സഹായിക്കുന്നു.

രോഗപ്രതിരോധശേഷി (Immunity) ഗണ്യമായി വർദ്ധിപ്പിക്കുന്നു.

4. മാനസികാരോഗ്യം മെച്ചപ്പെടുത്തുന്നു.

ബുദ്ധിശക്തി, ഓർമ്മശക്തി, ധാരണാശക്തി എന്നിവ വർദ്ധിപ്പിക്കാൻ സഹായിക്കുന്നു.

മാനസിക പിരിമുറുക്കം (Stress), ഉറക്കക്കുറവ് എന്നിവ പരിഹരിച്ച് മനസ്സിന് ശാന്തത നൽകുന്നു.

5. ശാരീരിക പുഷ്ടിക്ക്.

ദഹനവും വിശപ്പും വർദ്ധിപ്പിക്കുന്നു.

വിട്ടുമാറാത്ത രോഗങ്ങൾ വന്നു പോയതിനു ശേഷമുള്ള ശാരീരിക തളർച്ച മാറ്റാൻ ഉത്തമമാണ്.

മെലിഞ്ഞവർക്കും ക്ഷീണിതർക്കും ശരീരം പുഷ്ടിപ്പെടുത്താനും ആരോഗ്യപ്രദമായ ഭാരം വർദ്ധിപ്പിക്കാനും ഇത് ഉപയോഗിക്കാം.

സ്വാദിഷ്ടവും ഗുണപ്രദവുമായ കൂശ്മാണ്ഡ രസായനം നമ്മുടെ ഭക്ഷണക്രമത്തിന്റെ ഭാഗമാക്കുന്നത് ശാരീരികവും മാനസികവുമായ ഉന്മേഷത്തിന് സഹായിക്കും. കൃത്യമായ പഥ്യത്തോടും വൈദ്യനിർദ്ദേശത്തോടും കൂടി ഉപയോഗിച്ചാൽ ഇതൊരു മികച്ച ആരോഗ്യ ടോണിക്കാണ്.

ഉപയോഗക്രമവും അളവും (Dosage & How to Use).

കൂശ്മാണ്ഡ രസായനം ശരിയായ അളവിൽ ശരിയായ രീതിയിൽ കഴിച്ചാൽ മാത്രമേ അതിന്റെ പൂർണ്ണഫലം ലഭിക്കുകയുള്ളൂ. പ്രായമനുസരിച്ച് കഴിക്കേണ്ട അളവ് താഴെ പറയുന്നവയാണ്.

മുതിർന്നവർക്ക്: 5 ഗ്രാം മുതൽ 10 ഗ്രാം വരെ (ഏകദേശം ഒരു ടേബിൾ സ്പൂൺ).

കുട്ടികൾക്ക് (5 - 12 വയസ്സ്): 5 ഗ്രാം വീതം (ഒരു ടീസ്പൂൺ).

ചെറിയ കുട്ടികൾക്ക് (5 വയസ്സിൽ താഴെ): 1 ഗ്രാം മുതൽ 2 ഗ്രാം വരെ (ഏകദേശം ഒരു കടലമണിയോളം).

ശ്രദ്ധിക്കേണ്ട കാര്യങ്ങൾ: ദിവസത്തിൽ ഒന്നോ രണ്ടോ തവണ ഭക്ഷണത്തിന് ശേഷം ഇത് കഴിക്കാവുന്നതാണ്. രസായനം കഴിച്ച ശേഷം അരക്കപ്പ് ചെറുചൂടുവെള്ളമോ അല്ലെങ്കിൽ പാലോ പുറമെ കുടിക്കുന്നത് ഔഷധത്തിന്റെ ഗുണം വർദ്ധിപ്പിക്കും.

ശരീരഭാരം വർദ്ധിപ്പിക്കാൻ (Weight Gain).

ശരീരപുഷ്ടിയും ഭാരവും വർദ്ധിപ്പിക്കാൻ ആഗ്രഹിക്കുന്നവർക്ക് ഈ രീതി പരീക്ഷിക്കാം:

ഒരു ടേബിൾ സ്പൂൺ കൂശ്മാണ്ഡ രസായനം ഒരു ടീസ്പൂൺ ശുദ്ധമായ നെയ്യിൽ നന്നായി കലർത്തി കഴിക്കുക. ഇതിനു പുറമെ അരക്കപ്പ് ചെറുചൂടുവെള്ളം കുടിക്കേണ്ടതാണ്..

കുറിപ്പ്: പ്രമേഹ രോഗികൾ (Diabetes) ഡോക്ടറുടെ നിർദ്ദേശപ്രകാരം മാത്രമേ ഇത് ഉപയോഗിക്കാൻ പാടുള്ളൂ. കാരണം ഇതിൽ കൽക്കണ്ടം, തേൻ എന്നിവ അടങ്ങിയിട്ടുണ്ട്. ഏതൊരു ആയുർവേദ ഔഷധവും ഉപയോഗിക്കുന്നതിന് മുമ്പ് ഒരു വിദഗ്ദ്ധ വൈദ്യന്റെ ഉപദേശം തേടുന്നത് ഉചിതമാണ്.