യശങ്ക് ഔഷധഗുണങ്ങൾ

കേരളത്തിലെയും ശ്രീലങ്കയിലെയും കടലോരപ്രദേശങ്ങളിൽ സാധാരണ കണ്ടുവരുന്ന ഒരു ഔഷധസസ്യമാണ് യശങ്ക് .ഇതിനെ മുള്ളൻ ഇശങ്ക് ,ചങ്കൻ ,എശങ്ക് തുടങ്ങിയ പേരുകളിലും അറിയപ്പെടും .

• Botanical name : Azima tetracantha
• Family : Salvadoraceae (Salvadora family)
• Synonyms : Azima spinosissima , Azima nova , Azima angustifolia

രൂപവിവരണം  .

2 മീറ്റർ ഉയരത്തിൽ ചുറ്റിപ്പടർന്ന് വളരുന്ന ഒരു കുറ്റിച്ചെടിയാണ് യശങ്ക്.ശാഖകൾ വളരെ നേർത്ത് പച്ചനിറത്തിൽ കാണപ്പെടുന്നു . ഇവയിൽ ഓരോ പർവസന്ധിയിൽ നിന്നും 4  വശത്തേയ്ക്കും കൂർത്തുനിൽക്കുന്ന മുള്ളുകളുണ്ട്‌ .ഈ മുള്ളുകൾക്ക് ഏകദേശം 5 സെ.മി നീളമുണ്ടാകും .മുള്ളുകളുള്ള പർവസന്ധിയിൽ നിന്നും ഇലകളും വിന്യസിച്ചിരിക്കുന്നു . ഇലകൾക്ക് 2 .5 -5 സെ.മി നീളവും 1 .25 -2 സെ,മി വീതിയും ഉണ്ടാകും . ഇതിന്റെ പൂക്കൾക്ക് പച്ചകലർന്ന വെള്ളനിറമാണ് .പൂക്കൾ ചെറുതാണ് . ചെറുചെമ്പൻ അറബി ശലഭത്തിന്റെ ലാർവകൾ യശങ്കിന്റെ ഇലകൾ മാത്രമേ കഴിക്കു .

യശങ്ക് വിവിധ ഭാഷകളിലെ പേരുകൾ .

Common name : Needle Bush , Mistletoe Berrythorn, Azima , Needle Bush , Bee-sting Bush - Malayalam :  Essanku, Yeshenku, Chankan - Tamil : Sugam Cheddi , Sangilai , Sung-elley , Changan-chedi - Kannada : Ganji Mullu, Bili Uppi Gida, Uppu Goje, Sakapat - Telugu : Mundla kampa , Puttu , Tella uppi - Hindi : Kanta-gur-kamai , Kantagur-kamai - Bengali :  Trikanta-jati - Marathi : Sukkaa paatha, Sukkapat - Sanskrit :  Kundali, Trikantajata

രാസഘടകങ്ങൾ .

യശങ്കിന്റെ ഇലയിൽ അസിമിൽ , അസ്കാർപിൻ ,കാർപൈൻ എന്നീ ആൽക്കലോയിഡുകളും ഫ്രീഡൽ ,ഗ്ളൂട്ടിനോൺ ,ലൂപിയോർയ ,സിറ്റൊസ്റ്റെറോൾ എന്നീ രാസഘടകങ്ങളും അടങ്ങിയിരിക്കുന്നു .

ഔഷധഗുണങ്ങൾ .

കേരളത്തിലെ മുത്തശ്ശിമാരുടെ ഗൃഹവൈദ്യ ചികിത്സയിൽ വളരെ പ്രസിദ്ധിയാർജിച്ച ഒരു ഔഷധമാണ് യശങ്ക്. പ്രസവ രക്ഷയ്ക്കാണ് യശങ്ക് പ്രധാനമായും ഉപയോഗിച്ചിരുന്നത് . കൂടാതെ വിട്ടുമാറാത്ത ചുമ ,കഫക്കെട്ട് ,ആസ്മ എന്നിവയ്ക്കും ഒരു ദിവ്യ ഔഷധമാണ് യശങ്ക്. ഇതിന്റ വേരിന് വാതരോഗങ്ങളെ ശമിപ്പിക്കാനുള്ള കഴിവുണ്ട് .

ഔഷധയോഗ്യ ഭാഗം - സമൂലം 

രസാദിഗുണങ്ങൾ .

രസം - തിക്തം ,മധുരം 

ഗുണം -രഘു 

വീര്യം -ഉഷ്‌ണം 

വിപാകം -മധുരം 

ചില ഔഷധപ്രയോഗങ്ങൾ .

വിട്ടുമാറാത്ത ചുമ മാറാൻ .

യശങ്കിന്റെ ഇല ഇടിച്ചു പിഴിഞ്ഞ നീര് , കരിപ്പട്ടി ,തേങ്ങാപ്പാൽ എന്നിവ പച്ചരിയും ചേർത്ത്  കുറുക്കുണ്ടാക്കി ഏലത്തരിയും ചേർത്ത് കുറച്ചുദിവസം പതിവായി കഴിച്ചാൽ വിട്ടുമാറാത്ത ചുമ ,ആസ്മഎന്നിവ  ശമിക്കും .കൂടാതെ അടി ,ഇടി ,വീഴ്ച്ച തുടങ്ങിയവ മൂലം ശരീരത്തിനുണ്ടായ ക്ഷതം ,ക്ഷയരോഗം ,തുടങ്ങിയവയും ശമിക്കും .

വാതരോഗങ്ങൾ .

യശങ്കിന്റെ വേരിന്മേൽ തൊലി കഷായം വച്ച് കുറച്ചുദിവസം പതിവായി കഴിച്ചാൽ വാതരോഗങ്ങൾ ശമിക്കും .

പ്രസവരക്ഷയ്ക്ക് .

യശങ്ക് സമൂലം പഴയ ചെന്നെല്ലരിയും ചേർത്ത് ഇടിച്ച് ശർക്കരയും ചേർത്ത് പലഹാരമുണ്ടാക്കി കഴിക്കുന്നത് പ്രസവരക്ഷയ്ക്ക് പറ്റിയ ഔഷധമാണ് .കൂടാതെ നെഞ്ചുവേദന ,നീർക്കെട്ട് ,ശ്വാസകോശത്തിൽ കെട്ടിക്കിടക്കുന്ന കഫം ,ചുമ എന്നിവയും മാറിക്കിട്ടും .

സർവാംഗരസായനം എന്ന ഔഷധം യശങ്കിന്റെ വേര് ചേർത്തുണ്ടാക്കുന്നതാണ് . ഈ ഔഷധം വാതം ,പിത്തം ,പ്രമേഹം എന്നിവ ശമിപ്പിക്കും .