അഗത്തിച്ചീര ഔഷധഗുണങ്ങൾ

അഗത്തിച്ചീര ഔഷധഗുണങ്ങൾ - മെഡിക്കൽ യൂസെസ് ഉപയോഗങ്ങൾ, പ്രയോജനങ്ങൾ, അളവ്, പാർശ്വഫലങ്ങൾ (AGASTYA SESBANIA GRANDIFLORA)

 ഇന്ത്യയിലുടനീളം കാണപ്പെടുന്ന ഒരു സസ്യമാണ് അകത്തി. അഗത്തി ചീര, അഗത്തി മുരിങ്ങ,അഗസ്ത്യാർ മുരിങ്ങ തുടങ്ങിയ പേരിലും ഈ സസ്യം അറിയപ്പെടുന്നു . തമിഴ്‌നാട്ടിൽ അകത്തിക്കീര എന്ന പേരിൽ അറിയപ്പെടുന്നു . 

എവിടെ വളരുന്നു .

അകത്തിയുടെ ജന്മദേശം ഇൻഡോനേഷ്യ ആണെന്ന് കരുതപ്പെടുന്നു .ഇന്ത്യയിൽ മിക്കവാറും എല്ലാ പ്രദേശങ്ങളിലും അഗത്തി കാണപ്പെടുന്നു .ഗുജറാത്ത്  പോലെയുള്ള വരണ്ട സംസ്ഥാനങ്ങളിൽ അകത്തി കൃഷി ചെയ്യപ്പെടുന്നു . കേരളത്തിലെ കാലാവസ്ഥയിലും അകത്തി നന്നായി വളരും . 

സസ്യവിവരണം .

പേരിൽ ചീരയുണ്ടങ്കിലും പയറുവർഗ്ഗത്തിൽപ്പെടുന്ന ഒരു കുറ്റിമരമാണ് അഗത്തി ചീര.ശരാശരി 6 -8 മീറ്റർ ഉയരത്തിൽ വരെ ഇവ വളരാറുണ്ട് .പയറുവർഗ്ഗസസ്യങ്ങളിൽ വച്ച് ഏറ്റവും വലിയ പൂവുണ്ടാകുന്ന വൃക്ഷം എന്നൊരു സവിശേഷത ഈ സസ്യത്തിനുണ്ട് .

പൂവിന്റെ നിറത്തെ അടിസ്ഥാനപ്പെടുത്തി അഗത്തി നാല് തരത്തിൽ കാണപ്പെടുന്നു .വെള്ള അകത്തി ,ചുവന്ന അകത്തി  എന്നിങ്ങനെ രണ്ടിനങ്ങളാണ് നമ്മുടെ നാടുകളിൽ പ്രധാനമായും കാണപ്പെടുന്നത് .

പൂവിന്റെ നിറത്തെ അടിസ്ഥാനമാക്കി അഗത്തി 4 തരം .

1. ശ്വേത -വെളുത്ത പൂക്കളുണ്ടാകുന്നത് 
2. പിത - മഞ്ഞ പൂക്കളുണ്ടാകുന്നത് 
3. നിള - നീല പൂക്കളുണ്ടാകുന്നത് 
4. രക്ത - ചുവന്ന പൂക്കളുണ്ടാകുന്നത് 

മരത്തിന്റെ തൊലി പച്ചയായിരിക്കുമ്പോൾ നല്ല മിനുസമുണ്ടാകും .ഉണങ്ങുമ്പോൾ വീണ്ടുകീറുന്നു .ഇതിന്റെ പച്ചത്തടി തീയിൽ കത്തും . ഇവയുടെ ഇലകൾ സമപിച്ഛക സംയുക്തമാണ് . അനുപർണങ്ങളുള്ള പത്രകങ്ങളുടെ വിന്യാസം സമ്മുഖം .20 -30 ജോഡി പത്രക്കങ്ങൾ ഓരോ പിച്ഛകത്തിലും വിന്യസിച്ചിരിക്കുന്നു .പത്രക്കങ്ങൾ ആയതാകൃതി .പത്രസീമാന്തം അഖണ്ഡം .ശരാശരി 2 .5 സെ.മി നീളവും 1 .5 സെ.മി വീതിയുമുണ്ടാകും .

അഗത്തിയുടെ പൂക്കൾ പത്രകക്ഷങ്ങളിൽ കുലകളായി ഉണ്ടാകുന്നു .പൂമൊട്ടുകൾക്ക് അരിവാളിന്റെ ആക്രിതിയാണ് .ഇവ വലുതും കാണാൻ നല്ല ഭംഗിയുള്ളതുമാണ് .പൂക്കൾക്ക് 7 -10 സെ.മി നീളമുണ്ടാകും .നവംബർ -ഡിസംബർ  മാസങ്ങളിലാണ് ഇവയുടെ പൂക്കാലം .ഇവയുടെ കായകൾക്ക് മുരിങ്ങക്കായോളം വലിപ്പമുണ്ടാകും .ഒരു കായിൽ 17 -20 വിത്തുകൾ വരെ കാണും .ഇവയുടെ പൂവും കായുമെല്ലാം ഭക്ഷ്യയോഗ്യമാണ് .

അഗത്തിയുടെ വേരിൽ അധിവസിക്കുന്ന റൈസോബിയും എന്ന ബാക്ടീരിയയുടെ സഹായത്തോടെ അന്തരീക്ഷ നൈട്രജനെ വലിച്ചെടുത്ത് സസ്യപോഷണത്തിന് അനുയോജ്യമായ നൈട്രജൻ യൗഗികങ്ങൾ ഉൽപാദിപ്പിക്കുന്നതിനാൽ മണ്ണിന്റെ ഫലപുഷ്ടി വർധിപ്പിക്കാൻ അകത്തി ചീരയ്ക്ക് കഴിയും .

ആയുർവേദത്തിലെ ആദരണീയനായ ആചാര്യനാണ് അഗസ്ത്യൻ .അഗസ്ത്യമുനിയുടെ ഇഷ്ട്ട വൃക്ഷമായതിനാലാണ് ഈ സസ്യത്തിന് അഗസ്തി എന്ന് പേര് ലഭിച്ചത് .മുനിയുടെ പേരിൽ അറിയപ്പെടുന്നതുകൊണ്ട് മുനിദ്രുമം എന്ന പേരും ഈ സസ്യത്തിന് ലഭിച്ചു . എന്നാൽ സൂര്യനുദിക്കുമ്പോഴാണ്  (അഗസ്ത്യൻ) ഈ സസ്യത്തിന്റെ പൂവ് വിരിയുന്നത് .അതിനാലാണ് അഗസ്തി എന്ന് പേര് ലഭിച്ചതെന്നും ചിലർ അഭിപ്രായപ്പെടുന്നു .

രാസഘടകങ്ങൾ .

അഗത്തിയുടെ ഇലയിൽ ധാരാളം പ്രോട്ടീൻ ,കാൽസ്യം ,ഫോസ്ഫറസ് ,വിറ്റാമിൻ A ,B ,C തുടങ്ങിയവ അടങ്ങിയിരിക്കുന്നു .അഗത്തിയുടെ തൊലിയിൽ രക്തവർണ്ണമുള്ള ഒരിനം പശയും ടാനിൻ എന്നിവ അടങ്ങിയിരിക്കുന്നു .അഗത്തിയുടെ മുളപ്പിച്ച വിത്തിൽ പ്രോട്ടീൻ ,കൊഴുപ്പ് ,കാർബോഹൈട്രേറ്റ് ,ഒലിയാനോലിക്‌ അമ്ലം എന്നിവയും ധാരാളം വിറ്റാമിൻ Cയും അടങ്ങിയിരിക്കുന്നു ,അഗത്തിയുടെ പൂവിൽ വിറ്റാമിൻ B ,C എന്നിവയും പ്രോട്ടീനും അടങ്ങിയിരിക്കുന്നു .

ഔഷധഗുണങ്ങൾ .

അഗത്തിയില ആഹാരവും ഔഷധവുമാണ് .ആയുർവേദത്തിൽ അഗത്തിയില നിരവധി രോഗങ്ങൾക്ക് ഔഷധമായി ഉപയോഗിക്കുന്നു .വളരെ അധികം ഔഷധഗുണമുള്ള ഈ സസ്യം പനി, തലവേദന ,ചുമ ,പീനസം ,രക്തദോഷം ,കഫം ,വാതം ,പിത്തം ,ക്ഷയം ,പാണ്ഡുരോഗം ,തണ്ണീർദാഹം ,വിഷം ,ബുദ്ധിശക്തി ,ഗർഭാശയ നീര് ,വിളർച്ച ,അപസ്മാരം ,വസൂരി ,കാഴ്‌ച്ചക്കുറവ്, ചർമ്മരോഗങ്ങൾ എന്നിവയ്ക്ക് ഒരു ഉത്തമ പ്രതിവിധിയാണ് .

അഗത്തി ചേരുവയുള്ള ഔഷധങ്ങൾ .

RATNAGIRI RAS - എല്ലാത്തരം പനികളുടെ ചികിൽത്സയിൽ ഉപയോഗിക്കുന്ന ഒരു ആയുർവേദ ഔഷധമാണ് Ratnagiri ras.പൊടി രൂപത്തിലും ഗുളിക രൂപത്തിലും ഈ ഔഷധം ലഭ്യമാണ് .125 മില്ലി ഗ്രാം വരെ ദിവസത്തിൽ ഒന്നോ ,രണ്ടോ നേരം പാലിനൊപ്പമോ ചൂടുവെള്ളത്തിനൊപ്പമോ വൈദ്യ നിർദ്ദേശപ്രകാരം കഴിക്കാവുന്നതാണ് .

• Botanical name : Sesbania grandiflora
• Synonyms : Sesban coccinea , Agati grandiflora ,Coronilla grandiflora
• Family : Fabaceae (Pea family)
• Common name : Agati, Vegetable hummingbird , Katurai , West Indian pea , Scarlet wisteria tree,Petai belalang , Sesban , Daun turi
• Hindi : Gaach-munga Hathya, Bakpushpa , Vakrapushpa ,Chogachi
• Tamil : Agathi 
• Telugu : Avisha
• Kannada : Agasi , Agase ,Chinnadaare ,Arisina jeenangi
• Sanskrit : Varnari , Munipriya , Agasti , Drigapalaka
• Gujarati : Shevari , Hatga , Agasti , Gaach-munga
• Bengali : Bakful , Buko , Bak
• Malayalam : Agathi , Akaththi, Agasthi
• Marathi : Shevari , Hatga

രസാദിഗുണങ്ങൾ:

• രസം : തിക്തം
• ഗുണം : രൂക്ഷം, ലഘു
• വീര്യം : ശീതം
• വിപാകം : മധുരം, തിക്തം

ചില ഔഷധപ്രയോഗങ്ങൾ .

തലവേദന ,മൈഗ്രേന്‍,പീനസം ,ചുമ, അപസ്മാരം ,വിട്ടുമാറാത്ത പനി.

അഗത്തിച്ചീരയുടെ ഇല ചതച്ച് പിഴിഞ്ഞെടുത്ത നീര് നല്ലതുപോലെ അരിച്ച് നസ്യം ചെയ്താൽ തലയിൽ കെട്ടികിടക്കുന്ന ദുഷിച്ച് കഫം ഇളകിപ്പോകും മാത്രമല്ല  ഇങ്ങനെ നസ്യം ചെയ്താൽ തലവേദന ,മൈഗ്രേന്‍,പീനസം ,ചുമ ,അപസ്മാരം ,വിട്ടുമാറാത്ത പനി എന്നീ രോഗങ്ങൾക്കും ശമനമുണ്ടാകും   .

ചൊറി ,ചിരങ്ങ്.

അഗസ്തിയുടെ ഇല നന്നായി അരച്ച് വെളിച്ചെണ്ണയിൽ ചാലിച്ച് പുറമെ പുരട്ടിയാൽ ചൊറി ,ചിരങ്ങ് മുതലായ ചർമ്മരോഗങ്ങൾ  മാറും .

അസ്ഥിസ്രാവം .

അഗത്തിച്ചീരയുടെ ഇലയുടെ നീരോ പൂവിന്റെ നീരോ  പാലിൽ കലക്കി കുറച്ചുനാൾ പതിവായി കഴിച്ചാൽ സ്ത്രീകളിലെ അസ്ഥിസ്രാവം മാറിക്കിട്ടും .

പരു മാറാൻ .

അഗസ്തിയുടെ കുരു പാലിൽ  അരച്ച് പരുവിന്റെ മുകളിൽ പുരട്ടിയാൽ നീരും വേദനയുമുള്ള പരു പെട്ടന്ന് പഴുത്ത് പൊട്ടിപ്പോകും .വീണ്ടും പുരട്ടിയാൽ വ്രണം പെട്ടന്ന് കരിയും .

വിളർച്ച മാറുന്നതിന് .

അഗത്തിച്ചീരയുടെ ഇലയോ ,പൂവോ കറിവെച്ചോ ,തോരൻ വച്ചോ പതിവായി  കഴിച്ചാൽ വിളർച്ച മാറിക്കിട്ടും .കൂടാതെ മുലപ്പാൽ വർധിപ്പിക്കുന്നതിനും വളരെ ഫലപ്രദമാണ് .അഗത്തിയിൽ  അയൺ ധാരാളമായി അടങ്ങിയിരിക്കുന്നു അതുകൊണ്ടുതന്നെ അഗത്തിച്ചീരയുടെ  ഇലയും പൂവും, ഇളം കായ്കളും തോരൻ വച്ചു കഴിക്കുന്നത് രക്തകുറവ് പരിഹരിക്കാൻ വളരെ നല്ല ഒരു ഔഷധമാണ്.

നേത്രരോഗങ്ങൾ .

അകത്തിയുടെ ഇല നെയ്യിൽ വറുത്ത് കഴിക്കുന്നത് വിറ്റാമിൻ A യുടെ കുറവുമൂലമുണ്ടാകുന്ന എല്ലാത്തരം നേത്രരോഗങ്ങളും ശമിക്കും .

വസൂരി .

അഗത്തിയുടെ തൊലി ഇട്ട് തിളപ്പിച്ച വെള്ളത്തിൽ കുളിച്ചാൽ വസൂരി ശമിക്കും  .

കാൽ വീണ്ടുകീറുന്നത് മാറാൻ.

അഗത്തിച്ചീരയുടെ ഇലയും, മഞ്ഞളും ,മൈലാഞ്ചിയും ചേർത്ത് 

അരച്ചുപുരട്ടിയാൽ കാൽ വീണ്ടുകീറുന്നത് മാറിക്കിട്ടും .

അപസ്‌മാരം .

അഗത്തിയുടെ ഇലയും ,കുരുമുളകും ചേർത്ത് അരച്ച് ഗോമൂത്രത്തിൽ 

ചാലിച്ച് മണപ്പിച്ചാൽ അപസ്മാരം ശമിക്കും .

നിശാന്ധത.

അഗത്തിയുടെ ഇല നെയ്യിൽ വറത്തു കഴിച്ചാൽ നിശാന്ധത 

മാറുന്നതാണ് .(മങ്ങിയ വെളിച്ചത്തിലും ഇരുട്ടിലും അനുഭവപ്പെടുന്ന 

കാഴ്ചക്കുറവിനെയാണ് നിശാന്ധത എന്ന് പറയുന്നത് .)

മൂത്രത്തിൽ കല്ല് മാറാൻ .

അഗത്തിയുടെ ഇല കറി വെച്ച് പതിവായി കഴിച്ചാൽ മൂത്രത്തിൽ കല്ല് മാറിക്കിട്ടും .

എല്ലുകളുടെ വളർച്ചയ്ക്കും പുഷ്ടിക്കും .

അഗത്തിയുടെ ഇല കറി വെച്ച് പതിവായി കഴിച്ചാൽ എല്ലുകളുടെ വളർച്ചയ്ക്കും പുഷ്ടിക്കും നല്ലതാണ് .ഇത് കുട്ടികൾക്ക് പതിവായി കൊടുക്കുന്നത് വളരെ നല്ലതാണ് .അഗത്തിയിൽ ധാരാളം കാൽസ്യം അടങ്ങിയിരിക്കുന്നതിനാൽ പല്ലുകൾക്കും എല്ലുകൾക്കും ബലം കിട്ടാൻ വളരെ ഉത്തമമാണ്.

ഓർമ്മ ശക്തി വർദ്ധിപ്പിക്കാൻ.

 അഗത്തിച്ചീരയുടെ  ഇലയും പൂവും ഭക്ഷണത്തിൽ പതിവായി ഉൾപ്പെടുത്തിയാൽ കുട്ടികളിലെയും മുതിർന്നവരിലെയും ഓർമ്മ ശക്തി വർധിക്കും .

ശരീര വിളർച്ചയ്ക്ക് .

 

 അഗത്തിച്ചീരയിൽ  ധാരാളം  ആന്റിഓക്സിഡൻറ്കൾ   അടങ്ങിയിരിക്കുന്നു. അതുകൊണ്ടുതന്നെ പല രോഗങ്ങളെയും നിയന്ത്രിക്കാനും അസുഖങ്ങൾ മൂലം ഉണ്ടാകുന്ന വിളർച്ച മാറ്റാനും ശരീരത്തിൽ അടങ്ങിയിരിക്കുന്ന വിഷാംശം പുറംതള്ളാനും സഹായിക്കുന്നു. മാത്രമല്ല ശരീരത്തിലുണ്ടാകുന്ന ചതവുകൾക്കും  ഞരമ്പുകൾക്ക് ബലം കിട്ടാനും അഗത്തിച്ചീര വളരെ ഗുണം ചെയ്യും.

ചർമ്മകാന്തി വർദ്ധിപ്പിക്കാൻ .

അഗത്തിചീരയുടെ ഇലയും കുറച്ച് ഉലുവയും നല്ലതുപോലെ അരച്ച് എള്ളെണ്ണയിൽ കാച്ചി അരിച്ചെടുത്ത് ശരീരത്തിൽ പുരട്ടി നല്ലപോലെ മസാജ് ചെയ്‌ത്‌  അരമണിക്കൂറിനുശേഷം കുളിക്കുക. ഇങ്ങനെ പതിവായി ചെയ്താൽ ചർമ്മത്തിന് നല്ല തിളക്കവും കാന്തിയും വർദ്ധിക്കുന്നതാണ്.

ശരീരത്തിലെ തടിപ്പിനും ചൊറിച്ചിലും.

അഗത്തിചീരയുടെ ഇലയും തേങ്ങാപ്പീരയും സമമെടുത്ത് അരച്ച് പുരട്ടുന്നത് ശരീരത്തിലുണ്ടാകുന്ന ചൊറിച്ചിലിനും തടിപ്പിനും വളരെ ഫലപ്രദമാണ്.

തൈറോയ്ഡ് മാറാൻ.

 അഗത്തി ചീരയുടെ രണ്ടു തണ്ട് ഇല അരച്ച് കരിക്കിൻ വെള്ളത്തിൽ കലക്കി ഒരു മാസം തുടർച്ചയായി കഴിച്ചാൽ തൈറോയ്ഡ് ശമിക്കും .

സന്ധിവാതം .

അഗത്തിയുടെ പുറംതൊലി അരച്ച് പുറമെ പുരട്ടിയാൽ സന്ധിവാതം മൂലമുണ്ടാകുന്ന നീരും വേദനയും മാറിക്കിട്ടും .