ആയുർവേദ സ്നാന ചൂർണ്ണം വീട്ടിലുണ്ടാക്കാം തിളങ്ങുന്ന ചർമ്മത്തിന്

 കെമിക്കലുകൾ നിറഞ്ഞ സോപ്പുകളും ബോഡി വാഷുകളും ഉപയോഗിച്ച് മടുത്തോ? എങ്കിൽ ഇനി പണ്ടത്തെപ്പോലെ കുറച്ചുകൂടി സ്വാഭാവികമായ വഴികളിലേക്ക് തിരിച്ചുപോയാലോ? നമ്മുടെ ചർമ്മത്തിന് ആരോഗ്യവും തിളക്കവും നൽകാൻ പണ്ടുള്ളവർ ഉപയോഗിച്ചിരുന്ന ഒന്നാണ് ആയുർവേദ സ്നാന ചൂർണ്ണങ്ങൾ (ഹെർബൽ ബാത്ത് പൗഡർ). വിപണിയിൽ കിട്ടുന്ന പല ഉൽപ്പന്നങ്ങളിലും എന്തൊക്കെയാണ് അടങ്ങിയിരിക്കുന്നതെന്ന് നമുക്ക് ഉറപ്പില്ല. എന്നാൽ ഒട്ടും പേടിക്കാതെ, പൂർണ്ണമായും പ്രകൃതിദത്തമായ ചേരുവകൾ വെച്ച് ഈ സ്നാന ചൂർണ്ണം നമുക്ക് വീട്ടിൽ തന്നെ വളരെ എളുപ്പത്തിൽ തയ്യാറാക്കാം.

കുട്ടികൾക്കും മുതിർന്നവർക്കും ഒരുപോലെ ഉപയോഗിക്കാൻ പറ്റുന്ന, ചർമ്മത്തിലെ കറുത്ത പാടുകളും അഴുക്കുകളും മാറ്റി സ്വാഭാവിക ഭംഗി നിലനിർത്താൻ സഹായിക്കുന്ന ഒരു മികച്ച ആയുർവേദ കൂട്ട് എങ്ങനെയാണ് വീട്ടിൽ ഉണ്ടാക്കുന്നതെന്ന് നമുക്ക് നോക്കാം.

ആയുർവേദ സ്നാന ചൂർണ്ണം ഉപയോഗിക്കുന്നത് കൊണ്ടുള്ള പ്രധാന ഗുണങ്ങൾ:

1. ചർമ്മത്തിന്റെ ആരോഗ്യവും സ്വാഭാവിക നിറവും മെച്ചപ്പെടുത്തുന്നു

രാസവസ്തുക്കൾ അടങ്ങിയ സോപ്പുകൾ സ്ഥിരമായി ഉപയോഗിക്കുമ്പോൾ ചർമ്മത്തിലെ സ്വാഭാവിക ഈർപ്പം നഷ്ടപ്പെടാറുണ്ട്. എന്നാൽ പ്രകൃതിദത്ത ചേരുവകൾ ചേർത്ത സ്നാന ചൂർണ്ണം ചർമ്മത്തെ ആഴത്തിൽ വൃത്തിയാക്കുകയും (Deep cleansing), ചത്ത കോശങ്ങളെ (Dead cells) നീക്കം ചെയ്യുകയും ചെയ്യുന്നു. ഇത് ചർമ്മത്തിന് നല്ല മൃദുത്വവും ആരോഗ്യവും നൽകുന്നതിനൊപ്പം, ചർമ്മത്തിന്റെ സ്വാഭാവിക നിറവും തിളക്കവും വർദ്ധിപ്പിക്കാൻ സഹായിക്കും.

2. മുഖക്കുരു, ചർമ്മത്തിലെ പാടുകൾ, ത്വക്കിലെ ചെറിയ പ്രശ്നങ്ങൾ എന്നിവ മാറ്റുന്നു

സ്നാന ചൂർണ്ണത്തിൽ അടങ്ങിയിരിക്കുന്ന ഔഷധക്കൂട്ടുകൾക്ക് ചർമ്മത്തിലെ അണുബാധകളെ തടയാനുള്ള കഴിവുണ്ട്. ഇത് പതിവായി ഉപയോഗിക്കുന്നത് വഴി മുഖത്തും ശരീരത്തിലുമുണ്ടാകുന്ന മുഖക്കുരു, അതുണ്ടാക്കുന്ന കറുത്ത പാടുകൾ, ത്വക്കിലെ ചെറിയ ചൊറിച്ചിലുകൾ അല്ലെങ്കിൽ ചെറിയ മുറിവുകൾ എന്നിവ വളരെ പെട്ടെന്ന് തന്നെ ഭേദമാക്കാൻ സഹായിക്കും. ചർമ്മത്തെ എപ്പോഴും അണുവിമുക്തമായി സൂക്ഷിക്കാൻ ഇത് മികച്ചൊരു വഴിയാണ്.

3. ശരീര വേദനയും വീക്കവും കുറയ്ക്കുന്നു

പലർക്കും അറിയാത്ത ഒരു കാര്യമാണിത്. ആയുർവേദ സ്നാന ചൂർണ്ണങ്ങൾ വെറുമൊരു ഫേസ് പാക്കോ ബോഡി സ്ക്രബോ മാത്രമല്ല. ഇതിലെ ഔഷധച്ചെടികളുടെ ഗുണങ്ങൾ ചർമ്മത്തിലൂടെ ശരീരത്തിലേക്ക് ഇറങ്ങിച്ചെല്ലുമ്പോൾ അത് പേശികൾക്ക് നല്ല ആശ്വാസം നൽകും. ദിവസം മുഴുവൻ ജോലി ചെയ്ത് കഴിഞ്ഞുവന്ന് ഈ ചൂർണ്ണം ഉപയോഗിച്ച് കുളിച്ചാൽ ശരീര വേദനയും ക്ഷീണവും മാറിക്കിട്ടും. കൂടാതെ ശരീരത്തിലുണ്ടാകുന്ന ചെറിയ വീക്കങ്ങളും പേശിവലിവും കുറയ്ക്കാനും ഇത് ഏറെ നല്ലതാണ്.

സ്നാന ചൂർണ്ണം തയ്യാറാക്കുമ്പോൾ അറിഞ്ഞിരിക്കേണ്ട അടിസ്ഥാന കാര്യങ്ങൾ

ഒരു മികച്ച സ്നാന ചൂർണ്ണം വീട്ടിൽ ഉണ്ടാക്കുമ്പോൾ നമ്മൾ പ്രധാനമായും അറിഞ്ഞിരിക്കേണ്ട ചില അടിസ്ഥാന കാര്യങ്ങളുണ്ട്. ഇത് മനസ്സിൽ വെച്ചാൽ നിങ്ങളുടെ ചർമ്മത്തിന് ഏറ്റവും അനുയോജ്യമായ കൂട്ട് നിങ്ങൾക്ക് തന്നെ തയ്യാറാക്കാം.

പ്രധാന ഘടകം (Base Ingredient): ഏതൊരു നാടൻ സ്നാന ചൂർണ്ണത്തിന്റെയും പ്രധാന അടിത്തറ എന്ന് പറയുന്നത് കടലമാവാണ്. ചർമ്മത്തെ വൃത്തിയാക്കാനും തിളക്കം നൽകാനും കടലമാവിനോളം മികച്ച മറ്റൊന്നില്ല. നമ്മൾ ഉണ്ടാക്കുന്ന ആകെ പൊടിയുടെ 50% കടലമാവായിരിക്കണം.

അലർജി ഉള്ളവർക്ക് പകരക്കാരൻ: ചില ആളുകളുടെ ചർമ്മത്തിന് കടലമാവ് അത്ര നല്ലതായിരിക്കില്ല, അല്ലെങ്കിൽ ചെറിയ അലർജി ഉണ്ടാക്കാം. അങ്ങനെയുള്ളവർ ഒട്ടും വിഷമിക്കേണ്ട; കടലമാവിന് പകരം തുല്യ അളവിൽ നല്ല നാടൻ ചെറുപയർ പൊടി ഉപയോഗിച്ചാൽ മതി. ചെറുപയർ പൊടിയും ചർമ്മത്തിന് അത്രമേൽ ഗുണം ചെയ്യുന്ന ഒന്നാണ്.

ബാക്കി 50% ചേരുവകൾ: ബാക്കിയുള്ള 50% ഭാഗം നമ്മുടെ ചർമ്മത്തിന്റെ ആവശ്യത്തിനനുസരിച്ചും, നമുക്ക് ലഭ്യമാകുന്ന ഔഷധസസ്യങ്ങളുടെ അളവനുസരിച്ചും ചേർക്കാവുന്നതാണ്. ഓരോരുത്തരുടെയും ശരീര പ്രകൃതിക്കും ചർമ്മത്തിന്റെ പ്രശ്നങ്ങൾക്കും അനുസരിച്ച് ഈ ഔഷധക്കൂട്ടുകളിൽ നമുക്ക് മാറ്റങ്ങൾ വരുത്താം.

സ്നാന ചൂർണ്ണത്തിൽ ചേർക്കേണ്ട പ്രധാന ഔഷധക്കൂട്ടുകൾ

നമ്മൾ നേരത്തെ പറഞ്ഞ 50% കടലമാവോ ചെറുപയർ പൊടിയോ എടുത്തതിനു ശേഷം, അതിലേക്ക് ചേർക്കേണ്ട ഔഷധച്ചേരുവകൾ എന്തൊക്കെയാണെന്ന് നോക്കാം. ഓരോന്നിനും അതിന്റേതായ മികച്ച ഗുണങ്ങളുണ്ട്:

നെല്ലിക്കാപ്പൊടി (1 ടീസ്പൂൺ): ചർമ്മത്തിന് ചെറുപ്പം നിലനിർത്താനും ഉന്മേഷം നൽകാനും നെല്ലിക്കയോളം മികച്ചതില്ല. ഇതിലെ വിറ്റാമിൻ സി ചർമ്മത്തിന് നല്ല തിളക്കം നൽകും.

ബദാം പരിപ്പ് പൊടിച്ചത് (1 ടീസ്പൂൺ): ചർമ്മത്തിന് ആവശ്യമായ ഈർപ്പവും പോഷണവും നൽകാൻ ബദാം സഹായിക്കും. ഇത് ചർമ്മം വരണ്ടുപോകുന്നത് തടയും.

കരിങ്ങാലിപ്പൊടി (1 ടീസ്പൂൺ): ചർമ്മത്തിലുണ്ടാകുന്ന പലവിധ പ്രശ്നങ്ങൾക്കും ചൊറിച്ചിലിനും ആയുർവേദത്തിൽ ഏറ്റവും കൂടുതൽ ഉപയോഗിക്കുന്ന ഒന്നാണ് കരിങ്ങാലി.

വയമ്പ് പൊടി (1 ടീസ്പൂൺ) & ചിറ്റരത്ത പൊടി (1 ടീസ്പൂൺ): ഇവ രണ്ടും ചർമ്മത്തിലെ അണുബാധകളെ തടയാനും നല്ല സുഗന്ധം നൽകാനും സഹായിക്കുന്നവയാണ്.

ഉണങ്ങിയ ഇഞ്ചിപ്പൊടി / ചുക്കുപൊടി (2 നുള്ള്): ഇത് ചർമ്മത്തിലെ രക്തയോട്ടം കൂട്ടാനും ശരീരവേദനയും ക്ഷീണവും കുറയ്ക്കാനും സഹായിക്കും. (വളരെ കുറഞ്ഞ അളവിൽ മാത്രം ചേർത്താൽ മതി).

സോപ്പ് നട്ട് പൊടി / പശക്കായ പൊടി (1 ടീസ്പൂൺ): നമ്മൾ കെമിക്കൽ സോപ്പുകൾ മാറ്റിവെക്കുമ്പോൾ പലർക്കും പത കിട്ടാത്ത ഒരു വിഷമം ഉണ്ടാകും. അതിനുള്ള പരിഹാരമാണിത്. ഇത് ചേർത്താൽ കുളിക്കുമ്പോൾ സ്വാഭാവികമായ നല്ല പത കിട്ടും.

റോസ് വാട്ടർ (1 ടീസ്പൂൺ):  ഇത് ചർമ്മത്തിന് നല്ല കുളിർമയും സുഗന്ധവും നൽകും.

സ്നാന ചൂർണ്ണത്തിന് നല്ല സുഗന്ധം നൽകാൻ എന്ത് ചെയ്യാം?

നമ്മൾ പൂർണ്ണമായും പ്രകൃതിദത്തമായ രീതിയിലാണ് ഇത് തയ്യാറാക്കുന്നത്. അതുകൊണ്ട് തന്നെ ഇതിന് നല്ലൊരു മണം കിട്ടാൻ കെമിക്കൽ പെർഫ്യൂമുകൾക്ക് പകരം നമുക്ക് ഇഷ്ടമുള്ള ചില നാടൻ വഴികൾ പരീക്ഷിക്കാം. താഴെ പറയുന്നവയിൽ നിങ്ങളുടെ താല്പര്യത്തിനനുസരിച്ച് ഏതെങ്കിലും ഒന്ന് ഉപയോഗിക്കാവുന്നതാണ്:

യൂക്കാലിപ്റ്റസ് ഓയിൽ (2 തുള്ളി): കുളിക്കുന്ന വെള്ളത്തിലോ ഈ കൂട്ടിലോ രണ്ട് തുള്ളി യൂക്കാലിപ്റ്റസ് ഓയിൽ ചേർത്താൽ നല്ലൊരു സുഗന്ധം കിട്ടുമെന്ന് മാത്രമല്ല, ഇത് നമ്മുടെ ശ്വസന ആരോഗ്യം മെച്ചപ്പെടുത്താനും ജലദോഷം പോലുള്ള ബുദ്ധിമുട്ടുകൾ വരാതിരിക്കാനും ഏറെ നല്ലതാണ്.

റോസ് വാട്ടർ (1-2 ടീസ്പൂൺ): നമ്മൾ നേരത്തെ പറഞ്ഞതുപോലെ, റോസ് വാട്ടർ ഉപയോഗിക്കുന്നത് ചർമ്മത്തിന് നല്ല കുളിർമയും അതോടൊപ്പം പ്രകൃതിദത്തമായ റോസാപ്പൂവിന്റെ മണവും നൽകും.

കുങ്കുമാദി തൈലം (1-2 തുള്ളി): ആയുർവേദത്തിൽ ചർമ്മസംരക്ഷണത്തിന് ഏറ്റവും മികച്ചതായി പറയുന്ന ഒന്നാണ് കുങ്കുമാദി തൈലം. ഇത് രണ്ട് തുള്ളി ചേർത്താൽ നല്ലൊരു സുഗന്ധം കിട്ടുന്നതിനൊപ്പം മുഖക്കുരു മാറാനും ചർമ്മത്തിന് പ്രത്യേക തിളക്കം നൽകാനും സഹായിക്കും.

ആയുർവേദ സ്നാന ചൂർണ്ണം തയ്യാറാക്കുന്ന വിധം

ഇത് ഉണ്ടാക്കാൻ വലിയ ബുദ്ധിമുട്ടൊന്നുമില്ല. വീട്ടിലുള്ള സാധനങ്ങളും അങ്ങാടിപ്പുറത്തുനിന്ന് (ആയുർവേദ കടകളിൽ) കിട്ടുന്ന പൊടികളും ഉണ്ടെങ്കിൽ മിനിറ്റുകൾക്കുള്ളിൽ നമുക്കിത് തയ്യാറാക്കാം.

സ്റ്റെപ്പ് 1: അടിസ്ഥാന കൂട്ട് എടുക്കുക

ആദ്യം നമ്മൾ എടുത്തു വെച്ചിരിക്കുന്ന കടലമാവ് (അല്ലെങ്കിൽ ചെറുപയർ പൊടി) അളന്നു തിട്ടപ്പെടുത്തുക. നമ്മൾ ഉണ്ടാക്കുന്ന ആകെ പൊടിയുടെ പകുതി ഭാഗം (50%) ഇതായിരിക്കണം.

സ്റ്റെപ്പ് 2: ഔഷധപ്പൊടികൾ ചേർക്കുക

ഇനി ഈ കടലമാവിലേക്ക് നമ്മൾ എടുത്തു വെച്ചിരിക്കുന്ന മറ്റ് ഔഷധപ്പൊടികൾ ഓരോന്നായി ചേർക്കാം:

സ്റ്റെപ്പ് 3: നന്നായി യോജിപ്പിക്കുക

ഈ പൊടികളെല്ലാം ഒരു വലിയ പാത്രത്തിലിട്ട് ഒരു സ്പൂൺ ഉപയോഗിച്ചോ കൈകൊണ്ടോ നന്നായി ഇളക്കി യോജിപ്പിക്കുക. എല്ലാ പൊടികളും ഒരുപോലെ കലർന്നു വരണം.വെയിൽത്ത് വെച്ച് നന്നായി ഉണക്കുക.

സ്റ്റെപ്പ് 4: കുപ്പിയിലാക്കി സൂക്ഷിക്കുക

നന്നായി മിക്സ് ചെയ്ത ഈ സ്നാന ചൂർണ്ണം ഒട്ടും നനവില്ലാത്ത, വായു കടക്കാത്ത ഒരു കുപ്പിയിലോ ജാറിലോ അടച്ചു സൂക്ഷിക്കുക. ഇത് ഒരുവർഷം വരെ കേടുകൂടാതെ സൂക്ഷിക്കാം .

ആയുർവേദ സ്നാന ചൂർണ്ണം ഉപയോഗിക്കേണ്ട ശരിയായ രീതി

ഈ നാടൻ കൂട്ട് നമുക്ക് രണ്ട് രീതിയിൽ ഉപയോഗിക്കാം. ദിവസവും കുളിക്കാൻ സോപ്പിന് പകരമായും, ആഴ്ചയിലൊരിക്കൽ ചർമ്മത്തിന് കൂടുതൽ തിളക്കം കിട്ടാനുള്ള പ്രത്യേക പാക്കായും ഇത് ഉപയോഗിക്കാവുന്നതാണ്.

1. ദിവസവും സോപ്പിന് പകരമായി ഉപയോഗിക്കാൻ (Daily Bath Powder)

ആദ്യം പേസ്റ്റ് രൂപത്തിലാക്കുക: കുളിക്കാൻ നേരത്ത് ആവശ്യത്തിന് പൊടി (ശരീരമാകെ തേക്കാൻ ഒരു 2-3 വലിയ സ്പൂൺ) ഒരു പാത്രത്തിലേക്ക് എടുക്കുക. ഇതിലേക്ക് കുറച്ച് സാധാരണ വെള്ളമോ റോസ് വാട്ടറോ ഒഴിച്ച് നന്നായി കുഴച്ച് പേസ്റ്റ് രൂപത്തിലാക്കുക.

ശരീരം നനയ്ക്കുക: സാധാരണ പോലെ ശരീരം വെള്ളമൊഴിച്ച് നന്നായി നനയ്ക്കുക.

തേച്ചുപിടിപ്പിക്കുക: തയ്യാറാക്കിവെച്ച പേസ്റ്റ് മുഖത്തും ശരീരത്തിലും നന്നായി തേച്ചുപിടിപ്പിക്കുക.

മൃദുവായി മസ്സാജ് ചെയ്യുക: കൈകൾ കൊണ്ട് വട്ടത്തിൽ (Circular motion) ചർമ്മത്തിൽ മൃദുവായി മസ്സാജ് ചെയ്യുക. ഇതിലെ സോപ്പ് നട്ട് പൊടി കാരണം ചെറിയ രീതിയിൽ പത വരുന്നത് കാണാം. ഇത് ചർമ്മത്തിലെ അഴുക്കുകളെല്ലാം കളയാൻ സഹായിക്കും.

കഴുകിക്കളയാം: ഒരു 1-2 മിനിറ്റ് മസ്സാജ് ചെയ്ത ശേഷം സാധാരണ വെള്ളത്തിൽ നന്നായി കഴുകിക്കളയാം. ഇത് ഉപയോഗിക്കുന്ന ദിവസം വേറെ സോപ്പോ ബോഡി വാഷോ ഉപയോഗിക്കേണ്ട ആവശ്യമില്ല.