കറുകപ്പുല്ല്: ഒരു പിടി നീര് മതി! പൊള്ളൽ, ചർമ്മ രോഗങ്ങൾ. എങ്ങനെ ഉപയോഗിക്കണം?

നേത്രരോഗങ്ങൾ ,ചർമ്മരോഗങ്ങൾ ,ഹൃദ്രോഗം ,ഗർഭാശയത്തകരാറുകൾ മുതലായവയുടെ ചികിൽത്സയിൽ ആയുർവേദത്തിൽ ഉപയോഗിക്കുന്ന ഒരു ഔഷധസസ്യമാണ് കറുക അഥവാ കറുകപ്പുല്ല് .ബലികർമ്മങ്ങൾക്ക് ഉപയോഗിക്കുന്ന ഒരു പ്രധാനപ്പെട്ട സസ്യമാണ് കറുക .അതിനാൽ ഇതിനെ ബലിക്കറുക എന്ന പേരിലും അറിയപ്പെടുന്നു .സംസ്‌കൃതത്തിൽ ദുർവ്വ ,നീലദുർവ്വ എന്നീ പേരുകളിൽ അറിയപ്പെടുന്നു .കൂടാതെ നമസ്കാര്യ ,ശതപർവ്വ ,ശതവല്ലി ,ഹരിത ,അമൃത ,വിജയ ,മഹൗഷധി,ശീത ,അനന്ത ,ശിവേഷ്ട തുടങ്ങിയ നിരവധി സംസ്‌കൃത നാമങ്ങളും ഈ സസ്യത്തിനുണ്ട് .

ഗണപതി ഭഗവാൻ്റെ ഇഷ്ട ഔഷധമായതിനാൽ വന്ദിക്കാൻ യോഗ്യമായത് അല്ലങ്കിൽ ശുഭകരമായത് എന്ന അർത്ഥത്തിൽ നമസ്കാര്യ എന്ന സംസ്‌കൃത നാമത്തിലും .ഇതിന് അനേകം വേരുകളുള്ളത് എന്ന അർത്ഥത്തിൽ ശതപർവ്വ എന്ന പേരിലും .അനേകം ശാഖകളുള്ളത് എന്ന അർത്ഥത്തിൽ ശതവല്ലി എന്ന പേരിലും .ചെടിക്ക് നല്ല പച്ച നിറമായതിനാൽ ഹരിത എന്ന പേരിലും .മരണമുണ്ടാക്കാത്തത് എന്ന അർത്ഥത്തിൽ അമൃത എന്ന പേരിലും .രോഗങ്ങളെ കീഴടക്കുന്നത് എന്ന അർത്ഥത്തിൽ വിജയ എന്ന പേരിലും .വളരെ ഉപയോഗപ്രദമായ സസ്യം എന്ന അർത്ഥത്തിൽ മഹൗഷധി എന്ന പേരിലും .ശിവ ഭഗവാന് ഇഷ്ടപ്പെട്ട ഔഷധം എന്ന അർത്ഥത്തിൽ ശിവേഷ്ട എന്ന പേരിലും .തണുപ്പ് ഗുണമുള്ളത് എന്ന അർത്ഥത്തിൽ ശീത എന്ന പേരിലും .ചെടി വേഗത്തിൽ പടർന്നു വ്യാപിക്കുകയും നശിക്കാതെ നിലനിൽക്കുന്നതും എന്ന അർത്ഥത്തിൽ അനന്ത എന്ന സംസ്‌കൃതനാമത്തിലും കറുക അറിയപ്പെടുന്നു .(ഈ പറഞ്ഞിരിക്കുന്ന കാര്യത്തിൽ ചെറിയ വിത്യാസമുണ്ടാകാം .കാരണം ലേഖകൻ സംസ്‌കൃത പണ്ഡിതനല്ല ) .

Botanical Name : Cynodon Dactylon .

Family : Poaceae (Grass Family) .

കറുകപ്പുല്ല് നീര് - ഔഷധ ആവശ്യങ്ങൾക്കായി കറുകപ്പുല്ല് അരച്ചെടുക്കുന്ന ദൃശ്യം.

വിതരണം .

ഇന്ത്യയിലുടനീളം പറമ്പുകളിലും പുറമ്പോക്കുകളിലും വീട്ടുമുറ്റത്തും കറുക കാണപ്പെടുന്നു .ഇത് പുൽത്തകിടിയായും ഉപയോഗിക്കുന്നു .

സസ്യവിവരണം .

തറയിലൂടെ പടർന്നു വളരുന്ന ഈ സസ്യത്തിന്റെ തണ്ടുകൾ വളരെ നേർത്തതാണ് .തണ്ടിലെ ഇടവിട്ടുള്ള പർവസന്ധികളിൽ നിന്നും കീഴോട്ട് വേരുകളും മുകളിലോട്ട് ഇലകളും ഉണ്ടാകുന്നു .ഒരു പർവസന്ധിയിൽ ആറ് മുതൽ പത്ത് ഇലകൾ വരെ കാണും .ഇലകൾക്ക് 2 മുതൽ 5 സെ.മീ വരെ നീളം കാണും .

ആയുർവേദ ഗ്രന്ഥങ്ങളിൽ തണ്ടിന്റെയും പൂക്കളുടെയും നിറത്തെ അടിസ്ഥാനപ്പെടുത്തി (നീലാ ദൂർവ്വ -നീല) , (ശ്വേത ദൂർവ്വ -വെള്ള ) ,(മാലാ ദൂർവ്വ- മാലപോലെ അനേകം ശാഖകളോടെ നീളത്തിൽ വളരുന്നത് ). (ഗന്ധാളി ദൂർവ്വ -തണ്ടിനും ഇലകൾക്കും സുഗന്ധമുള്ളത് ) എന്നിങ്ങനെ നാലിനങ്ങളെ കുറിച്ച് പറയുന്നുണ്ട് .ഇതിൽ നീലയും വെള്ളയുമാണ് സാധാരണ കാണപ്പെടുന്നത് .

കറുകയുടെ ഉപയോഗങ്ങൾ .

ആയുർവ്വേദത്തിൽ ഔഷധമായും ഹൈന്ദവാചാരങ്ങളിൽ പൂജകൾക്കായും കറുക ഉപയോഗിക്കുന്നു .ഒട്ടുമിക്ക ഹോമങ്ങളിലും കറുക ഉപയോഗിക്കുന്നു .കറുകയുടെ പുക അന്തരീക്ഷം ശുദ്ധീകരിക്കും .ഗണപതി ഹോമങ്ങളിലും ഒഴിച്ചു കൂടാനാകാത്ത ഒന്നാണ് കറുക .മരണാന്തര കർമ്മങ്ങൾക്കും ബലികർമ്മങ്ങൾക്കും ഒഴിച്ചു കൂടാനാകാത്ത ഒന്നാണ് കറുക .ദശപുഷ്പങ്ങളിൽ ഉൾപ്പെടുന്ന ഒന്നാണ് കറുക .കർക്കിടക മാസത്തിൽ സ്ത്രീകൾ തലയിൽ കറുക .ചൂടാറുണ്ട് .പുണ്യമാസമായ കർക്കിടകത്തിൽ കറുക തലയിൽ ചൂടിയാൽ എല്ലാവിധ ആധിവ്യാധികളും മാറുമെന്നാണ് വിശ്വാസം.

രാസഘടകങ്ങൾ .

കറുകപ്പുല്ലിൽ Ferulic acid , Syringic acid , p-Coumaric acid , Vanillic acid , p-Hydroxybenzoic acid , O-hydroxyphenyl acetic acids എന്നീ ആൻ്റിഓക്‌സിഡൻ്റുകളും .Tricin , Flavone C-glycosides ,Flavonoid Sulphate എന്നീ ഫ്ലേവനോയിഡുകളും അടങ്ങിയിരിക്കുന്നു .കൂടാതെ കാർബോഹൈഡ്രേറ്റുകൾ , പ്രോട്ടീനുകൾ , ആൽക്കലോയിഡുകൾ, ഗ്ലൈക്കോസൈഡുകൾ, സ്റ്റീറോയിഡുകൾ, ടാനിൻസ്, സാപ്പോണിൻസ് എന്നിവയും കറുകപ്പുല്ലിൽ അടങ്ങിയിട്ടുണ്ട് .

പ്രാദേശിക നാമങ്ങൾ .

English Name-bermuda Grass, Indian Doab,conch Grass .

Malayalam Name - Karuka, Balikaruka .

Tamil Name - Arugam Pullu .

Telugu Name - Goriya Gaddi .

Kannada Name- Garike .

Hindi Name - Doobh .

Marathi Name - Harali .

Bengali Name - Durva .

Punjabi Name - Dubda .

Gujarati Name - Drow .

ഔഷധയോഗ്യഭാഗം .

സമൂലം .

രസാദിഗുണങ്ങൾ .

രസം -മധുരം ,കഷായം ,തിക്തം .

ഗുണം - ലഘു ,സ്‌നിഗ്ധം .

വീര്യം - ശീതം .

വിപാകം - മധുരം .

Cynodon Dactylon (കറുകപ്പുല്ല്) - നിലത്ത് പടർന്നു വളരുന്ന പച്ച കറുക സസ്യം.

കറുകയുടെ ഔഷധഗുണങ്ങൾ .

രക്തം ശുദ്ധീകരിക്കും .രക്തസ്രാവം തടയും .എല്ലാവിധ വിഷങ്ങളെയും ശമിപ്പിക്കും .ഉദരരോഗങ്ങൾ ശമിപ്പിക്കും .ഓർമ്മശക്തിയും ബുദ്ധിശക്തിയും വർധിപ്പിക്കും .തലച്ചോറിനും ഞരമ്പുകൾക്കും നട്ടെല്ലിലുമുണ്ടാകുന്ന എല്ലാവിധ രോഗങ്ങളെയും ശമിപ്പിക്കും .കൂടാതെ ഉറക്കക്കുറവ് ,കരപ്പൻ ,മറ്റു ത്വക്ക് രോഗങ്ങൾ ,ചെങ്കണ്ണ് ,ശരീരത്തിലും മുഖത്തിലുമുണ്ടാകുന്ന ചുവന്ന തടിപ്പുകൾ ,വയറിളക്കം ,മലബന്ധം ,മുറിവുകൾ ,ക്ഷതം ,രക്തം ചുമച്ചുതുപ്പൽ ,മൂത്രത്തിലൂടെ രക്തം പോകുക ,ഗർഭാശയത്തകരാറുകൾ ,യോനി രോഗങ്ങൾ ,ജലദോഷം ,ഛർദ്ദിൽ ,മുറിവുകൾ ,ഹൃദ്രോഗങ്ങൾ ,കരൾരോഗങ്ങൾ എന്നിവയ്‌ക്കെല്ലാം കറുക ഔഷധമാണ് .ഇലയുടെ നീര് പതിവായി കഴിച്ചാൽ രോഗപ്രതിരോധശേഷി വർധിക്കുമെന്ന് പഠനങ്ങൾ പറയുന്നു .

മനുഷ്യർ മാത്രമല്ല കറുക ഔഷധമായി ഉപയോഗിക്കുന്നത് .മാംസഭോജികളായ മൃഗങ്ങളും ,പട്ടി ,പൂച്ച മുതലായ മൃഗങ്ങൾ എല്ലാം തന്നെ അവയ്ക്ക് വയറിന് അസ്വസ്ഥത ഉണ്ടാകുമ്പോൾ കറുകപ്പുല്ലിനെ ഔഷധമായി ഭക്ഷിക്കുന്നു .ബ്രഹ്മി ,കരിമ്പ് ,ഈറ്റ ,തേൻ ഇവയുടെ എല്ലാം ഗുണങ്ങൾ കറുകയെന്ന ഒരു സസ്യത്തിൽ അടങ്ങിയിരിക്കുന്നു എന്നാണ് പറയപ്പെടുന്നത് .

ഔഷധസസ്യങ്ങളും അവയുടെ ഗുണങ്ങളും അവ ഏതെല്ലാം മരുന്നുകളിൽ ചേരുവയുണ്ടന്നും അവ ഏതെല്ലാം രോഗങ്ങൾക്ക് ഉപയോഗിക്കുന്നു എന്നും ഒരു ഏകദേശ വിവരണം മാത്രമാണ് ഇവിടെ നൽകിയിരിക്കുന്നത് .ഇത് അറിവിലേക്ക് മാത്രമുള്ളതാണ് .രോഗനിര്‍ണയം,ചികിത്സ എന്നിവ ഉദ്ദേശിച്ചുള്ളതല്ല .അതിനാൽ ഒരു ആയൂർവ്വേദ ഡോക്ടറുടെ നിർദേശമില്ലാതെ ഇവിടെ പറഞ്ഞിരിക്കുന്ന കാര്യങ്ങൾ നോക്കി സ്വയം ചികിൽത്സിക്കരുത് . കറുക ഔഷധമായി ഉപയോഗിക്കുമ്പോഴും വൈദ്യോപദേശം തേടേണ്ടതാണ്.

കറുകപ്പുല്ല് ചേരുവയുള്ള ചില ആയുർവേദ ഔഷധങ്ങൾ .

ദുർവാദി തൈലം - Durvadi Kera Tailam .

ചർമ്മരോഗങ്ങൾ : സോറിയാസിസ് ,ചൊറിച്ചിൽ ,തലയിലെ താരൻ ,തലയിലെ ചൊറി ,ഉണങ്ങാത്ത മുറിവുകൾ മുതലായവയ്ക്ക് പുറമെ പുരട്ടുവാൻ ദുർവാദി തൈലം ഉപയോഗിക്കുന്നു .ചർമ്മത്തിൽ ഉണ്ടാകുന്ന വീക്കം, ചുവപ്പ് എന്നിവ കുറയ്ക്കാൻ സഹായിക്കുന്നു .സ്കാബീസ് , ചൊറി, ചിരങ്ങ് എന്നിവ സുഖപ്പെടാൻ സഹായിക്കുന്നു .എള്ളെണ്ണയിൽ തയാറാക്കുന്നതിനെ ദുർവാദി തൈലം എന്നും വെളിച്ചെണ്ണയിൽ തയാറാക്കുന്നതിനെ ദുർവാദി കേരതൈലം എന്നും അറിയപ്പെടുന്നു .

മാനസമിത്ര വടകം - Manasamitra Vatakam .

വിഷാദരോഗം , ടെൻഷൻ, ഉന്മാദം,ഉറക്കക്കുറവ് ,അപസ്‌മാരം തുടങ്ങിയ അവസ്ഥകളുടെ ചികിൽത്സയിൽ ഉപയോഗിക്കുന്ന ഒരു ഔഷധമാണ് മാനസമിത്ര വടകം.

ധുർധൂരപത്രാദി കേരതൈലം - Dhurdhurapatradi Kera Tailam .

താരൻ ,മുടികൊഴിച്ചിൽ ,തലയിലെ ചൊറിച്ചിൽ ,കുട്ടികളിലെ കരപ്പൻ ,സോറിയാസിസ് മുതലായവയുടെ ചികിൽത്സയിൽ ഈ ഔഷധം ഉപയോഗിക്കുന്നു .

ഗന്ധ തൈലം - Gandha Tailam .

അസ്ഥികളുടെ ഒടിവുകൾ ,ബലക്കുറവ് ,സന്ധിവാതം മുതലായവയുടെ ചികിൽത്സയിൽ ഈ ഔഷധം ഉപയോഗിക്കുന്നു .ഇത് പുറമെ പുരട്ടുവാനും ഉള്ളിലേക്കു കഴിക്കാനും ഉപയോഗിക്കുന്നു .കാപ്സ്യൂൾ രൂപത്തിലും ഈ ഔഷധം ലഭ്യമാണ് .

വ്രണരോപണ തൈലം - Vranaropana Tailam .

മുറിവുകൾ ,ഉണങ്ങാത്ത വ്രണങ്ങൾ ,ദീര്‍ഘകാലം രോഗബാധിതരായി കിടക്കുന്നവര്‍ക്ക് ദേഹത്തുണ്ടാകുന്ന വ്രണങ്ങള്‍ തുടങ്ങിയവയുടെ ചികിൽത്സയിൽ ഈ തൈലം ഉപയോഗിക്കുന്നു .

ഗോപാത്മജാദി കേരതൈലം - Gopadmajadi Kera Thailam .

ചൊറി, സോറിയാസിസ്, ചൊറിച്ചിൽ , പൊള്ളൽ മുതലായവയുടെ ചികിൽത്സയിൽ ഗോപാത്മജാദി കേരതൈലം ഉപയോഗിക്കുന്നു .

കരപ്പൻ തൈലം - Karappan Thailam .

ത്വക്ക് രോഗങ്ങളുടെ ചികിൽത്സയിൽ ഉപയോഗിക്കുന്ന ഒരു തൈലമാണ് കരപ്പൻ തൈലം .എക്സിമ, ചൊറി, ചൊറിച്ചിൽ,സ്കിൻ അലർജി തുടങ്ങിയ രോഗങ്ങളുടെ ചികിൽത്സയിൽ ഉപയോഗിക്കുന്നു .

ബലാശ്വഗന്ധാദി തൈലം - Balaswagandhadi thailam .

പേശികളുടെയും ,സന്ധികളുടെയും ,അസ്ഥികളുടെയും ബലക്കുറവ് പരിഹരിക്കാൻ ബലാശ്വഗന്ധാദി തൈലം ഉപയോഗിക്കുന്നു .എല്ലാത്തരം വാത രോഗങ്ങൾക്കും, സന്ധി വേദന, സന്ധികളുടെ കാഠിന്യം എന്നിവയുടെ ചികിത്സയിലും ഈ തൈലം ഉപയോഗിക്കുന്നു.

രക്തസ്തംഭക ടാബ്ലെറ്റ് (Raktasthambaka Tablet).

മോണയിൽ നിന്നുള്ള രക്തസ്രാവം ,അമിത ആർത്തവ രക്തസ്രാവം ,പൈൽസ് മൂലമുള്ള രക്തസ്രാവം ,മൂക്കിൽ നിന്നുള്ള രക്തസ്രാവം ,ആന്തരിക രക്തസ്രാവം തുടങ്ങിയ വിവിധ കാരണങ്ങളാൽ ഉണ്ടാകുന്ന രക്തസ്രാവം നിയന്ത്രിക്കുന്നതിനായി രക്തസ്തംഭക ടാബ്ലെറ്റ് ഉപയോഗിക്കുന്നു .

ഫെമികെയർ സിറപ്പ് (Femicare Syrup).

ആർത്തവ പ്രശ്നങ്ങൾ ,അമിത ആർത്തവ രക്തസ്രാവം ,ആർത്തവ വേദന ,ആർത്തവവിരാമവുമായി ബന്ധപ്പെട്ട ഹോർമോൺ അസന്തുലിതാവസ്ഥ ,വെള്ളപോക്ക് ,ആവർത്തിച്ചുള്ള ഗർഭം അലസൽ ,ഗര്‍ഭാശയ വീക്കം തുടങ്ങിയവയുടെ ചികിത്സയ്ക്ക് ഫെമികെയർ സിറപ്പ് ഉപയോഗിക്കുന്നു .

പടോലാദി ചൂർണം ( Patoladi Choornam ) .

ചർമ്മ രോഗങ്ങൾ. ചൊറിച്ചിൽ, തടിപ്പ്, സോറിയാസിസ് എക്സിമ തുടങ്ങിയ എല്ലാ ചർമ്മരോഗങ്ങൾക്കും പടോലാദി ചൂർണം ഉപയോഗിക്കുന്നു .രക്തത്തിലെ മാലിന്യങ്ങൾ നീക്കം ചെയ്യാനും രക്തത്തെ ശുദ്ധീകരിക്കാനും സഹായിക്കുന്നു.കൂടാതെ ഹൃദയ സംബന്ധമായ രോഗങ്ങൾ ,കരൾ രോഗങ്ങൾ ,പനി ,ദഹന പ്രശ്നങ്ങൾ തുടങ്ങിയവയുടെ ചികിത്സയിലും ഈ ഔഷധപ്പൊടി ഉപയോഗിക്കുന്നു .പടോല എന്നാൽ പടവലം എന്നാണ് അർത്ഥമാക്കുന്നത് .പടവലം ഈ ഔഷധത്തിലെ പ്രധാന ചേരുവയാണ് .

കറുകപ്പുല്ലിന്റെ ചില ഔഷധപ്രയോഗങ്ങൾ .

ചർമ്മരോഗങ്ങൾക്ക് കറുകപ്പുല്ല് : 25 ഗ്രാം കറുകപ്പുല്ല് അരച്ച് ഇതിലേക്ക് 100 മില്ലി എള്ളെണ്ണയും 100 മില്ലി വെള്ളവും ചേർത്ത് ചെറിയ തീയിൽ തിളപ്പിച്ച് വെള്ളം പൂർണ്ണമായും വറ്റിച്ച് അരിച്ച് കുപ്പിയിലാക്കി സൂക്ഷിക്കാം .ഈ എണ്ണ പുരട്ടുന്നത് ചൊറി ,ചിരങ്ങ് ,ചൊറിച്ചിൽ ,എക്സിമ തുടങ്ങിയ എല്ലാ ചർമ്മരോഗങ്ങൾക്കും നല്ലതാണ് .ഈ എണ്ണ തലയിൽ പുരട്ടിയാൽ തലയിലെ താരൻ മാറിക്കിട്ടും .

ശരീരക്ഷീണം ,തളർച്ച എന്നിവ മാറാൻ കറുകപ്പുല്ല് : കറുകപ്പുല്ല് സമൂലം കഴുകി ഉണക്കിപ്പൊടിച്ച് സൂക്ഷിക്കാം .ഇതിൽ നിന്നും ഒരു സ്പൂൺ പൊടി 2 ഗ്ലാസ് വെള്ളത്തിൽ തിളപ്പിച്ച് ഒരു ഗ്ലാസാക്കി വറ്റിച്ച് അരിച്ചെടുത്ത ശേഷം ഇതിലേക്ക് അര ടീസ്പൂൺ പഞ്ചസാരയോ ശർക്കരയോ ചേർത്ത് കഴിക്കുന്നത് ശരീരക്ഷീണം ,തളർച്ച ,തലവേദന എന്നിവ മാറാൻ സഹായിക്കുന്നു .

മൂക്കിലൂടെയുള്ള രക്തസ്രാവത്തിന് കറുക : കറുകപ്പുല്ല് ഇടിച്ചു പിഴിഞ്ഞ രണ്ടോ മൂന്നോ തുള്ളി വീതം മൂക്കിലൊഴിച്ചാൽ മൂക്കിൽ കൂടിയുള്ള രക്തസ്രാവം മാറും .ഇത് ജലദോഷം മാറാനും നല്ലതാണ് .

ചർമ്മത്തിലെ അലർജി ,തിണർപ്പ് എന്നിവയ്ക്ക് കറുക : ഒരു പിടി കറുകപ്പുല്ല് കഴുകി വൃത്തിയാക്കി ചതച്ച് ശുദ്ധമായ വെള്ളത്തിൽ രണ്ടോ മൂന്നോ മണിക്കൂർ ഇട്ടു വച്ചിരുന്ന ശേഷം അരിച്ചെടുത്ത് 10 മില്ലി വീതം ദിവസത്തിൽ ഒന്നോ രണ്ടോ തവണ കഴിക്കുന്നത് ചർമ്മത്തിലെ ചൊറിച്ചിൽ ,അലർജി ,തിണർപ്പ് മുതലായ ചർമ്മവൈകല്യങ്ങൾ മാറാൻ നല്ലതാണ് .ഇത് കുട്ടികളിലെ കൃമിശല്യം മാറാനും നല്ലതാണ് .

മൂത്രം ഒഴിക്കുമ്പോഴുള്ള വേദന ,പുകച്ചിൽ എന്നിവയ്ക്ക് കറുക : ഒരു പിടി കറുക കഴുകി വൃത്തിയാക്കി ഇടിച്ചു പിഴിഞ്ഞ നീര് 10 മില്ലി വീതം ദിവസത്തിൽ രണ്ടോ മൂന്നോ നേരം വീതം കഴിക്കുന്നത് മൂത്രം ഒഴിക്കുമ്പോഴുള്ള വേദന ,പുകച്ചിൽ ,മൂത്രത്തിൽ രക്തത്തിന്റെ അംശം കാണപ്പെടുക എന്നിവയ്‌ക്കെല്ലാം നല്ലതാണ് .

അസിഡിറ്റി ,അൾസർ എന്നിവയ്ക്ക് കറുക : ഒരു പിടി കറുക കഴുകി വൃത്തിയാക്കി ഇടിച്ചു പിഴിഞ്ഞ നീര് 10 മില്ലി വീതം പശുവിൻ പാലിൽ ചേർത്ത് രാവിലെ വെറും വയറ്റിൽ കഴിക്കുന്നത് അസിഡിറ്റി ,നെഞ്ചെരിച്ചിൽ, പുളിച്ചുതികട്ടൽ ,വയറുവേദന ,എരിച്ചിൽ,ദഹനക്കേട് ,ഗ്യാസ്ട്രിക് അൾസർ എന്നിവയ്‌ക്കെല്ലാം നല്ലതാണ് .

ALSO READ : അടുക്കളയിലെ ഡോക്ടർ: നമ്മുടെ കടുക് എത്ര വലിയ ഔഷധമാണെന്ന് അറിയാമോ?.

രക്തശുദ്ധിക്കും ,രക്തവർദ്ധനവിനും കറുക നീര് : കറുകപ്പുല്ല് ഇടിച്ചു പിഴിഞ്ഞ നീര് 10 മില്ലി വീതം ദിവസവും കഴിക്കുന്നത് രക്തശുദ്ധിക്കും രക്തവർദ്ധനവിനും നല്ലതാണ് .ഇത് പ്രധിരോധശേഷി വർധിപ്പിക്കുന്നതിനും നല്ലതാണ് .കറുക രസായന ഗുണമുള്ള ഔഷധമാണ് .ഇത് ശരീരത്തിന് പോഷണവും ബലവും നൽകി ആരോഗ്യം മെച്ചപ്പെടുത്തുന്നു.കറുകപ്പുല്ലിൽ ഇരുമ്പ് ധാരാളമായി അടങ്ങിയിരിക്കുന്നു .ഇത് വിളർച്ച പരിഹരിക്കുന്നതിന് ഉത്തമമാണ് .

പൊള്ളലിന് കറുക : പൊള്ളലുണ്ടായാൽ കറുക അരച്ചു പുരട്ടുന്നത് നല്ലതാണ് .കറുകയുടെ ഏറ്റവും പ്രധാന ഗുണം അതിൻ്റെ തണുപ്പാണ്. അതിനാലാണ് കറുകയ്ക്ക് സംസ്‌കൃതത്തിൽ ശീത എന്ന പേര് വരാൻ കാരണം. ഇത് പൊള്ളലേറ്റ ഭാഗത്തെ ചൂടും എരിച്ചിലും പെട്ടെന്ന് കുറയ്ക്കാൻ സഹായിക്കുകയും പൊള്ളൽ മൂലം ഉണ്ടാകുന്ന ചുവപ്പ്, നീർക്കെട്ട്, വീക്കം എന്നിവ കുറയ്ക്കാൻ സഹായിക്കുകയും ചെയ്യുന്നു .കറുകയുടെ പേസ്റ്റിനൊപ്പം അൽപം ചന്ദനം കൂടി അരച്ച് ചേർത്ത് പുരട്ടന്നത്‌ പൊള്ളലിന് നല്ലതാണ് .ഇത് കൂടുതൽ തണുപ്പ് നൽകുകയും പൊള്ളലിന് ആശ്വാസം നൽകുകയും ചെയ്യും. ഗുരുതരമായ പൊള്ളലുണ്ടായാൽ വീട്ടുവൈദ്യങ്ങൾ പരീക്ഷിക്കാതെ എത്രയും പെട്ടെന്ന് ഡോക്ടറുടെ സഹായം തേടണം.

മുറിവുണക്കാൻ കറുക : കറുക കഴുകി വൃത്തിയാക്കി അരച്ച് മുറിവിൽ പുരട്ടുന്നത് രക്തസ്രാവം തടയുകയും മുറിവുകൾ പെട്ടന്ന് ഉണങ്ങാൻ സഹായിക്കുകയും ചെയ്യുന്നു .