ശുദ്ധജലത്തിലും പൊയ്കയിലും മാത്രം വളരുന്ന ഒരു ഏകവാർഷിക സസ്യമാണ് ആമ്പൽ .ഇതിന്റെ ശാസ്ത്രീയനാമം Nymphaea nouchali എന്നാണ് ഇംഗ്ലീഷിൽ Water lily എന്ന് അറിയപ്പെടുന്നു .
ആമ്പൽ വിവിധ ഭാഷകളിലുള്ള പേരുകൾ .
Common name-Blue water lily, Blue lotus of India,Candock , Common water lilly. Malayalam-Aambal . Tamil-Alli, Karu-Neytal, Neytal Malar, Nilampal . Hindi-Neelkamal, Neelotpal .Telugu-Alli Kada, Alli Tamara, Indeevaramu . Kannada-Komale, Naidile , Neela Thaavare . Bengali-Kumuda, Sada Shapala . Marathi-Kumud, Upalya Kamal . Gujarati-Neel Kamal . Sanskrit-Indivara . Botanical name- Nymphaea nouchali . Synonyms-Nymphaea stellata, Nymphaea cyanea, Nymphaea hookeriana . Family-Nymphaeaceae (Waterlily family) .
ആമ്പൽ എവിടെ വളരുന്നു .
ശുദ്ധജലത്തിലും പൊയ്കയിലും വളരുന്ന മനോഹരമായ പൂക്കളുണ്ടാകുന്ന ചെടിയാണ് ആമ്പൽ .ബംഗ്ലാദേശിന്റേയും ശ്രീലങ്കയുടേയും ദേശീയപുഷ്പമാണ് ആമ്പൽ . ഇപ്പോൾ വീടുകളിലും ടാങ്കുകളിലും ആമ്പൽ വളർത്താറുണ്ട് .
ആമ്പൽ ചെടിയുടെ പ്രത്യേകതകൾ .
ജലാശയത്തിൽ മാത്രം വളരുന്ന ഒരു ഏകവാർഷിക സസ്യമാണ് ആമ്പൽ .ജലത്തിനടിയിലെ ചെളിയിൽ വേരുറപ്പിച്ചാണ് ഈ സസ്യം വളരുന്നത് . ആമ്പലിന്റെ കിഴങ്ങിൽ നിന്നും തണ്ട് വളർന്ന് ഇലയോടൊപ്പം ജലോപരിതലത്തിൽ പൊങ്ങിക്കിടക്കുന്നു .താമര പോലെയാണ് ആമ്പലും .പക്ഷെ ഇലകൾക്കും പൂവിനും വലിപ്പം കുറവായിരിക്കും .ആമ്പൽ ചെടിയുടെ തണ്ടുകൾക്ക് പച്ചയും ,വയലറ്റും കലർന്ന നിറമാണ് . ആമ്പൽ ചെടിയുടെ ഇലയുടെ തണ്ടുകൾ വഴുവഴുപ്പ് ഉള്ളതായിരിക്കും .
ആമ്പൽ എത്ര തരമുണ്ട് .
ആമ്പൽ വിവിധ തരത്തിലും നിറത്തിലും കാണപ്പെടുന്നു .നാടൻ ഇനങ്ങൾ സാധാരണ ചുവപ്പും ,ഇളം നീലയും ,വെള്ളയുമാണ് കാണപ്പെടുന്നത് . എന്നാൽ ഇപ്പോൾ ഏതാണ്ട് 50 ഓളം വ്യത്യസ്ത ഇനങ്ങൾ ലഭ്യമാണ് . സങ്കരയിനങ്ങൾ ചുവപ്പ്, മെറൂൺ, കടുംനീല, ഇളം നീല, മഞ്ഞ, വയലറ്റ് തുടങ്ങിയ പല നിറങ്ങളിൽ കാണപ്പെടുന്നു.
ഏത് മാസങ്ങളിലാണ് ആമ്പൽ പൂക്കുന്നത് .
ആഗസ്റ്റ് മുതൽ നവംബർ വരെയുള്ള മാസങ്ങളിലാണ് ആമ്പൽ പൂക്കുന്നത് .എന്നാൽ ചില സംസ്ഥാനങ്ങളിൽ എല്ലാ മാസവും പൂക്കാറുണ്ട്. നാടൻ ഇനങ്ങൾ രാത്രിയിൽ വിരിയുകയും രാവിലെ കൂമ്പുകയും ചെയ്യും. സങ്കരയിനങ്ങൾ പകലാണ് വിരിയുന്നത് .
ആമ്പൽച്ചെടിയിൽ അടങ്ങിയിട്ടുള്ള രാസഘടകങ്ങൾ ഏതൊക്കെയാണ് .
ആമ്പൽച്ചെടിയുടെ എല്ലാ ഭാഗത്തും നുഫാറിൻ എന്ന ആൽക്കലോയിഡ് അടങ്ങിയിരിക്കുന്നു . ആമ്പൽച്ചെടിയുടെ ഉണങ്ങിയ വേരിലും ,കിഴങ്ങിലും നിംഫീൻ എന്ന ആൽക്കലോയിഡ് അടങ്ങിയിരിക്കുന്നു. ആമ്പൽപ്പൂവിൽ നിംഫാലിൻ എന്ന ഗ്ലൈക്കോസൈഡ് അടങ്ങിയിരിക്കുന്നു .
ആമ്പൽ ഏതൊക്കെ രോഗങ്ങൾക്ക് ഔഷധമായി ഉപയോഗിക്കുന്നു .
അതിസാരം ,ദഹനക്കേട് ,ഛർദ്ദി , അർശസ്സ് ,വാതരോഗങ്ങൾ , രക്തദോഷം ,രക്തസ്രാവം ,ശരീരം ചുട്ടുനീട്ടൽ ,ജ്വരം ,പിത്തം ,നേത്രരോഗങ്ങൾ ,കൃമി,വിഷാദരോഗം, ഓർമ്മശക്തി , തുടങ്ങിയവയ്ക്ക് ഔഷധമായി ഉപയോഗിക്കുന്നു .
ആമ്പലിന്റെ ഏതൊക്കെ ഭാഗങ്ങളാണ് ഔഷധങ്ങൾക്ക് ഉപയോഗിക്കുന്നത് .
ആമ്പലിന്റെ കിഴങ്ങ് ,തണ്ട് ,പൂവ് എന്നിവയാണ് പ്രധാനമായും ഔഷധങ്ങൾക്ക് ഉപയോഗിക്കുന്നത് .എങ്കിലും ചിലപ്പോൾ സമൂലമായും ഉപയോഗിക്കാറുണ്ട് .
ആമ്പലിന്റെ ഔഷധപ്രയോഗങ്ങൾ എങ്ങനെയാണ് .
അസ്ഥിസ്രാവം.
ആമ്പൽ തണ്ട് ചതച്ചു കിട്ടുന്ന നീര് പാലിൽ ചേർത്ത് കുറച്ചു ദിവസം പതിവായി കഴിച്ചാൽ സ്ത്രീകളിൽ കാണുന്ന അസ്ഥിസ്രാവം എന്ന രോഗം മാറും.
രക്തസ്രാവം .
ആമ്പൽകിഴങ്ങ് ഇടിച്ചുപിഴിഞ്ഞ നീരിൽ ചന്ദനവും അരച്ചു കലക്കി നെയ്യും ചേർത്ത് ഇതിന്റെ നാലിരട്ടി പാലും ചേർത്ത് കാച്ചിയെടുക്കുന്ന നെയ്യ് കഴിച്ചാൽ ആന്തരാവയങ്ങളിൽ നിന്നുള്ള എല്ലാവിധ രക്തസ്രാവവും ശമിക്കും.
ശിരോരോഗങ്ങൾക്ക് .
ആമ്പലിന്റെ തണ്ടിന്റെ നീര് കൽക്കണ്ടവും ചേർത്ത് പതിവായി കഴിച്ചാൽ തലച്ചോറിൽ പഴുപ്പുപോലുള്ള ശിരോരോഗങ്ങൾ ശമിക്കും .
അർശസ്സിന് .
ആമ്പലിന്റെ കിഴങ്ങ് ഉണക്കി പൊടിച്ച് 10 ഗ്രാം വീതം ആട്ടിൻപാലിൽ ചേർത്ത് പതിവായി കഴിച്ചാൽ അർശ്ശസ് പൂർണ്ണമായും മാറും.
അതിസാരത്തിന് .
ആമ്പലിന്റെ കിഴങ്ങ് ഉണക്കി പൊടിച്ച് കഴിച്ചാൽ അതിസാരം മാറും .
വാതരോഗങ്ങൾ .
ആമ്പലിന്റെ കിഴങ്ങ് ഉണക്കി പൊടിച്ച് കുറച്ചുനാൾ പതിവായി കഴിച്ചാൽ വാതരോഗങ്ങൾ ശമിക്കും .
മൂത്രാശയരോഗങ്ങൾക്ക് .
ആമ്പൽക്കിഴങ്ങ്, ചിറ്റേലം ,വരട്ടു മഞ്ഞൾ, നെല്ലിക്കത്തോട് എന്നിവ തുല്ല്യ അളവിൽ പൊടിച്ച് വെള്ളത്തിൽ തിളപ്പിച്ച് ദിവസം പലപ്രാവശ്യമായി കുടിക്കുന്നത് പ്രമേഹരോഗശാന്തിക്കും മൂത്രാശയ രോഗശമനത്തിനും വളരെ നല്ലതാണ് .
സ്ത്രീരോഗങ്ങൾക്ക് .
ആമ്പൽ തണ്ടിന്റെ നീര് മുപ്പത് മില്ലി വീതം അര ഗ്ലാസ്സ് പാലിൽ ചേർത്ത് കാച്ചി രാവിലെയും രാത്രിയും കഴിക്കുന്നത് സ്ത്രീകൾക്കുണ്ടാകുന്ന മൂത്രാശയ രോഗങ്ങൾക്കും, ആർത്തവകാല പ്രശ്നങ്ങൾക്കും , യോനീ രോഗങ്ങൾക്കും ശമനമുണ്ടാക്കും.