പയറുവർഗ്ഗത്തിൽപ്പെട്ട ഒരു കുറ്റിച്ചെടിയാണ് നീലയമരി . കേശസംരക്ഷണത്തിനായി ഉപയോഗിക്കുന്ന നീലഭൃംഗാദി എണ്ണയിലെ പ്രധാനപ്പെട്ട ഘടകം നീലയമരിയാണ് . കൂടാതെ നീലം ഉൽപ്പാദിപ്പിക്കുന്നതിന് വേണ്ടി ഈ സസ്യം വ്യാപകമായി കൃഷി ചെയ്യുന്നു . രാസപദാർത്ഥങ്ങൾ ഒന്നും തന്നെയില്ലാതെ മുടി കറുപ്പിക്കാൻ ഉപയോഗിക്കുന്ന ഹെയർഡൈ ആണ് നീലയമരിപ്പൊടി . ഇതിന്റെ ഇല ഉണങ്ങിപ്പൊടിച്ചാണ് നീലയമരിപ്പൊടി തയാറാക്കുന്നത് . വെള്ള ,നീല എന്നിങ്ങനെ രണ്ടു തരത്തിൽ അമരി കാണപ്പെടുന്നു .ഇതിൽ നീലയ്ക്കാണ് കൂടുതൽ ഔഷധഗുണങ്ങൾ ഉള്ളത്.
ഒന്നര മീറ്ററർ ഉയരത്തിൽ വളരുന്ന ഔഷധച്ചെടിയാണ് നീലയമരി . ഇലകൾ ചെറുതും നീലകലർന്ന പച്ചനിറവുമാണ് . നീലയമരിയുടെ രൂപസാദൃശ്യമുള്ള വേറെ സസ്യങ്ങളുമുണ്ട് . നീലയമരിയുടെ ഒരു തണ്ടിൽ 9 ഇലകൾ കാണും. അടുത്ത തണ്ടിൽ 11 ഇലകൾ കാണും. ഇങ്ങനെ ഇടവിട്ട് ആണ് ഇതിന്റെ തണ്ടുകൾ . തിരിച്ചറിയാനുള്ള എളുപ്പ മാർഗ്ഗവും ഇതിന്റെ ഇലകൾ നോക്കുന്നതാണ് . പൂക്കൾ ചെറുതും ചുവപ്പോ മഞ്ഞ കലർന്ന തവിട്ടു നിറമോ ആയിരിക്കും .സമൂലം ഔഷധമായി ഉപയോഗിക്കുന്ന ഈ സസ്യം നീലിഭൃംഗാദി എണ്ണ,നീലിദളാദി ഘൃതം, നീലി തുളസ്യാദി തൈലം, ചെമ്പരുത്യാദികേര തൈലം, അസനേലാദി തൈലം എന്നിവയിലെ ഒരു ചേരുവയാണ്.
നീലയമരി | |
---|---|
Botanical name | Indigofera tinctoria |
Synonyms | Indigofera indica Lam., Indigofera sumatrana |
Family | Fabaceae (Pea family) |
Common name | True Indigo ,Diard Indgo , Indigo Plant |
Malayalam | Amari ,Avari , Neelayamari |
Hindi | Neel , Neelkaper , Neelika |
Tamil | Avari , Neelamavari , Amuri |
Telugu | Aviri, Neelichettu |
Kannada | Anjoora, Neeli |
Bengali | Neel , Neelagachi |
Gujarati | Gali ,Neel |
Marathi | Neeli , Guli |
Sanskrit | Gandhapushpa, Maharasa, Nilaka, Nilini, Rangapushpi |
രസാദിഗുണങ്ങൾ | |
രസം | തിക്തം |
ഗുണം | രൂക്ഷം, ലഘു |
വീര്യം | ഉഷ്ണം |
വിപാകം | കടു |
രാസഘടകങ്ങൾ
നീലയമരിയിൽ ഇൻഡിഗോട്ടിൻ എന്ന വസ്തു 50 ശതമാനത്തോളം അടങ്ങിയിട്ടുണ്ട് .നീലയമരി സമൂലം ചതച്ച് വെള്ളത്തിൽ തിളപ്പിക്കുമ്പോൾ അടിയിൽ അടിഞ്ഞു കൂടുന്ന വസ്തു ഉണക്കിയതിൽ സൾഫ്യൂറിക്കമ്ലം ചേർക്കുമ്പോൾ സൾഫ്യൂറിക്കമ്ലത്തിൽ ലയിച്ചു കിട്ടുന്ന വസ്തുവാണ് ഇൻഡിഗോട്ടിൻ.
ഔഷധഗുണങ്ങൾ
ആമവാതം, സന്ധിവാതം,വാതരക്തം, ഉദരരോഗങ്ങൾ,മഞ്ഞപിത്തം,തലയ്ക്ക് ഭാരം ,ഓർമ്മക്കുറവ് എന്നിവയുടെ ചികിത്സയ്ക്കും ,മുടിയഴക് വർദ്ധിപ്പിക്കുന്നതിനും നീലയമരി ഉപയോഗിക്കുന്നു .
ചില ഔഷധപ്രയോഗങ്ങൾ
വിഷശമനത്തിന്
വിഷജന്തുക്കൾ കടിച്ച മുറിവിൽ നീലയമരി സമൂലം അരച്ച് പുരട്ടുകയും കുറച്ചു ഇലയുടെ നീര് ഉള്ളിൽ കഴിക്കുകയും ചെയ്താൽ വിഷജന്തുക്കൾ കടിച്ചതുമൂലമുണ്ടാകുന്ന വിഷം ശമിക്കും .
ചെവിയിൽ പഴുപ്പ്
നീലയമരിയുടെ ഇലയുടെ നീര് ചെവിയിൽ ഒഴിച്ചാൽ ചെവിയിൽനിന്ന് പഴുപ്പ് വരുന്നത് മാറിക്കിട്ടും.
മഞ്ഞപ്പിത്തം മാറാൻ
നീലയമരി ഇലയുടെ നീര് തേനും ചേർത്ത് ദിവസവും കഴിച്ചാൽ മഞ്ഞപ്പിത്തം ശമിക്കും.
മുഖത്തെ കറുത്ത പാടിന്
നീലയമരി സമൂലവും , രക്തചന്ദനവും ചേർത്ത് അരച്ച് മുഖത്ത് പുരട്ടിയാൽ മുഖത്തെ കറുത്ത പാടുകൾ മാറിക്കിട്ടും .
മുടിയുടെ ആരോഗ്യത്തിന്
നീലയമരിയുടെ ഇല ഇട്ട് കാച്ചിയ എണ്ണ തലയിൽ പതിവായി തേച്ചാൽ അകാല നര മാറുകയും,തലയിലെ താരൻ ഇല്ലാതാകുകയും , മുടി സമൃദ്ധമായി വളരുകയും, മുടിക്ക് നല്ല കറുപ്പ് നിറം കിട്ടുകയും ചെയ്യും .
വയറുവേദനയ്ക്ക്
നീലയമരിയുടെ വേര് കഷായം ഉണ്ടാക്കി കഴിച്ചാൽ വയറുവേദന ശമിക്കും .
വ്രണങ്ങൾ പെട്ടന്ന് കരിയാൻ
ഉണങ്ങാത്ത വ്രണങ്ങൾ പെട്ടന്ന് കരിയാൻ നീലയമരി ഇട്ട് കാച്ചിയ എണ്ണ പുരട്ടിയാൽ മതിയാകും.
മൂത്രതടസ്സം മാറാൻ
നീലയമരി സമൂലം അരച്ച് ചൂടാക്കി ചെറുചൂടോടെ നാഭിക്ക് കീഴെ പുരട്ടിയാൽ മൂത്രതടസ്സം മാറിക്കിട്ടും.
ശരീരത്തിലുണ്ടാകുന്ന നീര് മാറാൻ
നീലയമരിയുടെ ഇല ഇടിച്ചു പിഴിഞ്ഞ നീര് കുടിച്ചാൽ വൃക്കരോഗം മൂലം ശരീരത്തിലുണ്ടാകുന്ന നീര് മാറിക്കിട്ടും.
അപസ്മാരത്തിന്
രണ്ട് ഔൺസ് നീലയമരി നീര് തുല്യം പാലും ചേർത്തു രാവിലെ വെറും വയറ്റിൽ കഴിച്ചാൽ അപസ്മാരം ശമിക്കും.
ചർമ്മത്തിലുണ്ടാകുന്ന നിറവ്യത്യാസം മാറാൻ
നീലഅമരിയുടെ ഇലയും, മൺചട്ടിയും ചേർത്ത് അരച്ച് മുഖത്ത് പുരട്ടിയാൽ മുഖത്തുണ്ടാകുന്ന നിറവ്യത്യാസങ്ങൾ മാറിക്കിട്ടും.
ചുമ ,ആസ്മ എന്നിവ ശമിക്കാൻ
ചുമ ,ആസ്മ എന്നീ രോഗങ്ങൾക്ക് നീലയമരി നീര് പതിവായി കഴിക്കുന്നത് വളരെ നല്ലതാണ്.
മൂത്രത്തിലെ കല്ലും , മൂത്രത്തിലെ പഴുപ്പും
നീല അമരിയുടെ വേര് കഷായം വച്ച് കുറച്ചു ദിവസം പതിവായി കഴിച്ചാൽ മൂത്രത്തിലെ കല്ലും മൂത്രത്തിലെ പഴുപ്പും മാറും .
ചൊറിയും , ചിരങ്ങും മാറാൻ
നീലയമരി ഇല അരച്ച് പുരട്ടിയാൽ ചൊറിയും ചിരങ്ങും മാറും.
കുടലിറക്കം മാറാൻ
നീലയമരിയുടെ വേര് കഷായം വച്ചതിൽ നീലയമരിയുടെ വേര് അരച്ച് കൽക്കമാക്കി ചേർത്ത് എണ്ണ കാച്ചി കഴിച്ചാൽ കുടലിറക്കം ശമിക്കും .